నాకు న్యాయం చేయండి.. తల్లిని రిక్షాలో కూర్చోబెట్టుకుని టికెట్ కోసం టీడీపీ లీడర్ పోరాటం

తూర్పు గోదావరి జిల్లా అనపర్తి టీడీపీలో అసమ్మతి చల్లారలేదు. పొత్తులో భాగంగా అనపర్తి టికెట్ బీజేపీకి కేటాయించారు. తొలుత నల్లమిల్లి రామకృష్ణారెడ్డికి టికెట్ ఇచ్చినట్లు టీడీపీ అధినేత చంద్రబాబు ప్రకటించారు. అయితే ఆ తర్వాత టీడీపీ, జనసేనతో బీజేపీ కూడా జతకలవటంతో నల్లమిల్లికి ఇబ్బంది తప్పలేదు. పొత్తులో అనపర్తి టికెట్ బీజేపీకి వెళ్లింది. దీంతో అనపర్తి టిడిపిలో తీవ్ర అసంతృప్తి ఏర్పడింది. 42 సంవత్సరాలుగా తెలుగుదేశం పార్టీని అంటిపెట్టుకొని ఉన్న నల్లమిల్లి కుటుంబాన్ని కాదని బయట వారికి ఏ విధంగా సీటు కేటాయిస్తారంటూ టీడీపీ శ్రేణులుఆగ్రహం వ్యక్తం చేస్తున్నారు. నల్లమిల్లికి న్యాయం జరిగేంత వరకు తాము నిద్రపోమని అనపర్తి టీడీపీ కార్యకర్తలు అంటున్నారు.

ఈ క్రమంలోనే శనివారం నల్లమిల్లి రామకృష్ణారెడ్డి ప్రజాభిప్రాయ సేకరణ ప్రారంభించారు. తన తండ్రి, మాజీ ఎమ్మెల్యే నల్లమిల్లి మూలారెడ్డి ఫొటోతో తల్లి సత్యవతిని రిక్షాలో కూర్చోబెట్టి కుటుంబంతో సహా నియోజకవర్గంలోని గ్రామాల్లో పర్యటిస్తూ ప్రజాభిప్రాయ సేకరణ చేస్తున్నారు.శనివారం బిక్కవోలు మండలం పందులపాక గ్రామంలో కుటుంబంతో సహా నల్లమిల్లి పర్యటించారు. నల్లమిల్లి ప్రజాభిప్రాయ సేకరణకు కార్యకర్తలు సంఘీభావాన్ని తెలియజేస్తున్నారు. ప్రజలు సైతం నల్లమిల్లికి హారతులు పడుతున్నారు. మీ వెంట మేమున్నాం అంటూ మద్దతు తెలుపుతున్నారు.

ఈ నేపథ్యంలో ఇప్పటికైనా తెలుగుదేశం పార్టీ తక్షణమే అనపర్తి నియోజకవర్గం అభ్యర్థిగా నల్లమిల్లి రామకృష్ణారెడ్డి పేరును ప్రకటించాలని ఆ పార్టీ కార్యకర్తలు డిమాండ్ చేస్తున్నారు. ఎన్నో ఏళ్లుగా పార్టీని నమ్ముకుని పనిచేస్తున్న కుటుంబానికి అన్యాయం చేయవద్దని చెబుతున్నారు. మరోవైపు నల్లమిల్లి రామకృష్ణారెడ్డిని బుజ్జగించేందుకు చంద్రబాబు ఇప్పటికే ఓసారి ఫోన్ చేశారు. పొత్తులో భాగంగా బీజేపీకి ఇవ్వాల్సి వచ్చిందని.. అధికారంలోకి వస్తే న్యాయం చేస్తామని హామీ ఇచ్చారు. అయితే చంద్రబాబుతో నిర్మొహమాటంగా నియోజకవర్గ పరిస్థితిని, కార్యకర్తల ఆవేదనను నల్లమిల్లి వివరించారు. అనంతరం ప్రజాభిప్రాయ సేకరణ ప్రారంభించారు.