తెలియని నంబర్ నుంచి ఫోన్.. రాత్రిపూట వీడియో కాల్.. కట్ చేస్తే రూ.20 లక్షలు స్వాహా

విశాఖపట్నంలో నయా మోసం వెలుగుచూసింది. వీడియో కాల్ ద్వారా బెదిరించి లక్షలు కాజేసిన వైనం ఆలస్యంగా బయటపడింది. అసలు సంగతిలోకి వస్తే.. విశాఖపట్నానికి చెందిన ఓ వ్యక్తికి తెలియని నెంబర్ నుంచి ఇటీవల ఓ ఫోన్ కాల్ వచ్చింది. ఎవరో అని లిఫ్ట్ చేయగానే అవతలి వ్యక్తి కొరియర్ సర్వీసెస్ నుంచి అని పరిచయం చేసుకున్నాడు. ముంబైకి చెందిన కొరియర్ సర్వీస్ ప్రతినిధిని అంటూ పరిచయం చేసుకున్న ఆగంతకుడు.. మీ పేరు మీద ముంబై నుంచి తైవాన్‌కు పార్శిల్ బుక్ అయ్యిందని చెప్పాడు. అంతటితో ఆగకుండా అందులో డ్రగ్స్, నకిలీ పాసుపోర్టులు, బ్యా్ంక్ అకౌంట్ బుక్‌లు, క్రెడిట్ కార్డులు ఉన్నాయని బెదరగొట్టాడు. పార్శిల్ కస్టమ్స్ అధికారులకు చిక్కిందని, ఎఫ్ఐఆర్ నమోదైందని మరింత భయపెట్టాడు.

దీంతో బిత్తరపోయిన విశాఖవాసి అలాంటి పార్శిల్ తాను బుక్ చేయలేదని వాపోయాడు. తనకు ఏ పాపం తెలియదని మొరపెట్టుకున్నాడు. దీంతో కాల్‍‌ను నార్కోటిక్స్ అధికారులకు బదిలీ చేస్తున్నానన్న ఆగంతకుడు.. మరో వ్యక్తితో మాట్లాడించాడు. ఆ వ్యక్తి కూడా కేసు నమోదైందని, విచారణ కోసం ముంబై రావాల్సి ఉంటుందని వైజాగ్ వ్యక్తిని భయపెట్టాడు. దీంతో భయపడిపోయిన బాధితుడు.. తాను ఏ తప్పూ చేయలేదని ప్రాధేయపడ్డాడు. దీంతో విచారణ కోసం ముంబై రాలేకపోతే వీడియో కాల్ ద్వారా విచారణ చేస్తామంటూ లింక్ పంపించారు. ఈ విషయం చాలా రహస్యమంటూ ఓ రోజు రాత్రి విచారణ పేరుతో వీడియో కాల్ చేసి మరింత బెదరగొట్టారు.

ఇక ఆ తర్వాత తమ మోసంలో మరో స్టెప్ ముందుకెళ్లారు సైబర్ నేరగాళ్లు. మీ అకౌంట్ నుంచి ఉగ్రవాదులకు డబ్బు ట్రాన్స్‌ఫర్ అయ్యిందంటూ విశాఖపట్నం వ్యక్తిని భయపెట్టిన దుండగులు.. దీనిపై మరింత దర్యాప్తు జరిపేందుకు మనీ ట్రాన్స్‌ఫర్ చేయాల్సి ఉంటుందని చెప్పారు. అలా మాటలతో మోసం చేసి, భయపెడుతూ సుమారు 20 లక్షల వరకూ బాధితుడి నుంచి సొమ్ము కాజేశారు. తర్వాత అసలు సంగతి గ్రహించిన బాధితుడు విశాఖ పోలీసులను ఆశ్రయించాడు.

బాధితుడి ఫిర్యాదుతో రంగంలోకి దిగిన వైజాగ్ పోలీసులు.. కూపీ లాగారు. బ్యాంకు ఖాతాల ఆధారంగా దర్యాప్తు జరిపారు. పోలీసుల దర్యాప్తులో మోసం చేసిన సైబర్ నేరగాళ్లు రాజస్థాన్‌కు చెందినవారిగా గుర్తించారు. వెంటనే వైజాగ్ పోలీసుల బృందం అక్కడకు చేరుకుని మోసం చేసిన ఐదుగురు దుండగులను అరెస్ట్ చేసింది. వారి నుంచి మొబైల్ ఫోన్లు స్వాధీనం చేసుకున్నారు. ప్రధాన నిందితుడు పరారీలో ఉండగా.. అతని కోసం గాలిస్తున్నారు.