ఉబెర్ ఆటో ఛార్జ్ రూ.7.66 కోట్లు.. ఆ డబ్బుతో కంపెనీ పెట్టొచ్చు కదా భయ్యా

ప్రస్తుతం నగరాలు, పట్టణాల్లో మనం ఎక్కడికైనా వెళ్లాలంటే ఓలా, ఉబర్, ర్యాపిడో వంటి యాప్‌లను మనం ఆశ్రయిస్తూ ఉంటాం. మనం నిలబడి ఉన్న చోటు నుంచి మనం ఎక్కడికైతే వెళ్లాలో అక్కడికి కాలు కదపకుండా వెళ్లేందుకు ఈ ట్యాక్సీ సర్వీసులు ఉపయోగపడతాయి. సొంత వాహనాలు, ప్రభుత్వ రవాణా, షేర్ ఆటోలు కాకుండా.. ఈ ట్యాక్సీ సర్వీసులు కూడా నగరాలు, పట్టణాల్లో విస్తృతంగా పెరిగిపోయాయి. దీంతో జనం వాటి వైపు ఎగబడుతున్నారు. అయితే అందులో మనం రైడ్ బుక్ చేసుకున్నపుడు ఉన్న రేటు.. మనం గమ్యస్థానానికి చేరుకునేసరికి మారిపోతుంది. అదేంటి అంటే వెయిటింగ్ ఛార్జెస్, పీక్ అవర్స్, ట్రాఫిక్ జాం అంటూ ఆ డ్రైవర్లు ఏవేవో సాకులు చెబుతూ ఉంటారు. అయితే ఓ వ్యక్తికి మాత్రం అనూహ్య సంఘటన ఎదురైంది. కొద్దిపాటి దూరానికే ఏకంగా రూ.7.66 కోట్లు ఛార్జీ చూపించడంతో అతడు ఖంగు తిని లబోదిబోమన్నాడు.

ఢిల్లీ రాజధాని ప్రాంతం పరిధిలోని నోయిడాలో ఈ సంఘటన చోటు చేసుకుంది. దీపక్ అనే వ్యక్తి తాను రోజూ వెళ్లే రూట్‌లో తాజాగా ఓ ఉబర్ ఆటోను బుక్ చేసుకున్నాడు. ఆటో బుక్ చేసుకున్న సమయంలో తాను ప్రయాణించడానికి అయ్యే బిల్లు రూ. 62 చూపించింది. దాంతో తక్కువే కదా అని ఆటో బుక్ చేసుకుని.. గమ్యస్థానానికి వెళ్లాడు. ఆ తర్వాత ఉబర్ యాప్‌లో వచ్చిన బిల్ చూసి నోరెళ్లబెట్టాడు. దీపక్‌ ప్రయాణించిన దూరానికి ఏకంగా రూ. 7.66 కోట్ల బిల్ వచ్చినట్లు కనిపించింది. దీంతో ఆశ్చర్యంలో మునిగిపోయిన దీపక్.. కొద్దిసేపటి తర్వాత షాక్‌లో నుంచి బయటికి వచ్చి.. అవాక్కయ్యాడు. అదేంటి తనకు ముందు రూ.62 చూపించిందని అందుకే ఆటో బుక్ చేసుకున్నానని.. చివరికి అది రూ.7.66 కోట్లు రావడంతో అంత డబ్బు ఎలా కట్టాలని ఆటో డ్రైవర్‌తో వాగ్వాదానికి దిగాడు.

దీంతో తన ఫ్రెండ్‌తో కలిసి ఓ వీడియో తీసి జరిగిన విషయాన్ని మొత్తం సోషల్ మీడియాలో వెల్లడించాడు. దీనికి సంబంధించి ఆ రైడ్ బిల్ రూ.7,66,83, 762 ను కూడా ఆ వీడియోలో చూపించాడు. అంతేకాదు తన ఫ్రెండ్‌తో కలిసి ఉబర్ సంస్థపై జోక్స్ కూడా వేశాడు. చంద్రుడిపైకి వెళ్లి వచ్చినా ఈ రూ.7.66 కోట్ల బిల్లు రాదంటూ వారిద్దరూ ఆ వీడియోలో పేర్కొన్నారు.

 ఇక ఈ వీడియో సోషల్ మీడియాలో వారిద్దరూ పోస్ట్ చేశారు. దీంతో ఉబర్ సంస్థపై నెటిజన్ల నుంచి తీవ్ర విమర్శలు వెల్లువెత్తాయి. కొందరు నెటిజన్లు తమకు కూడా గతంలో ఇలాంటి అనుభవాలే ఎదురయ్యాయని గుర్తు చేసుకున్నారు. అయితే వందో, 2 వందలో అంటే పర్లేదు కానీ.. ఇలా కోట్లల్లో బిల్లు రావడం ఏంటని తీవ్రంగా ఆగ్రహం వ్యక్తం చేస్తున్నారు. చివరికి ఈ విషయం కాస్త ఉబర్ సంస్థకు చేరింది. దీంతో దీపక్‌కు క్షమాపణలను తెలియజేసింది. జరిగిన అసౌకర్యానికి చింతిస్తున్నట్లు తెలిపింది. త్వరలోనే దీనికి పరిష్కారాన్ని కనుగొంటామని పేర్కొంది. వీలైనంతవరకు తక్కువ సమయంలోనే దానికి అప్డేట్ ఇస్తామని చెప్పింది.