భీమిలిలో దారుణం.. ఆడపిల్లల్ని వేధించొద్దని చెప్పినందుకు కోపం, నిండు ప్రాణం బలి
Andhra Pradesh Telugu | Suryaa Desk | Published : Thu, Apr 04, 2024, 07:32 PM
విశాఖ జిల్లా భీమిలిలో దారుణం జరిగింది. అమ్మాయిలను వెంబడించి అల్లరి చేయొద్దని బుద్ధి చెప్పిన వ్యక్తికి నిప్పంటించగా ఆయన ఆస్పత్రిలో చికిత్స పొందుతూ ప్రాణాలు కోల్పోయారు. భీమిలి బీచ్‌రోడ్డులోని చేపలుప్పాడలో ఈ ఘటన ఆలస్యంగా బయటపడింది. పార్వతీపురం మన్యం జిల్లా బత్తిలికి చెందిన చెప్పల నాగభూషణం ఉపాధి కోసం ఐదేళ్ల క్రితం చేపలుప్పాడ ప్రాంతానికి వచ్చారు. బీచ్‌రోడ్డులోని ఐఎన్‌ఎస్‌ కళింగలో సూపర్‌వైజరుగా పనిచేస్తూ చేపలుప్పాడ సమీప చిన ఉప్పాడ గ్రామంలో భార్య, పిల్లలతో ఉంటున్నారు.
ఇటీవల తమ ఇంటికి సమీపంలో అమ్మాయిలను ఆట పట్టిస్తున్న పెద ఉప్పాడ, చిన ఉప్పాడ ఎస్సీకాలనీ, చేపల దిబ్బడిపాలెం గ్రామాలకు చెందిన ముగ్గురు అబ్బాయిలను మందలించారు. దీంతో కక్ష పెంచుకున్న వారు ఇటీవల రాత్రి వేళ జాను ఇంటికి వెళ్లారు. బయటకు రాగానే అతడిపై టిన్నర్‌ (రంగుల్లో కలిపే రసాయనం) జల్లి నిప్పంటించారు. తీవ్ర గాయాలతో బాధ పడుతున్న నాగభూషణంను స్థానికులు కేజీహెచ్‌కి తరలించగా చికిత్స పొందుతూ బుధవారం ప్రాణాలు కోల్పోయారు. పోలీసులు కేసు నమోదు చేసి దర్యాప్తు చేస్తున్నట్లు పోలీసులు తెలిపారు. ఈ ఘటనకు సంబంధించిన పూర్తి వివరాలు తెలియాల్సి ఉంది
|
|