సినీ డైరెక్టర్ కల్యాణ్‌ కృష్ణతో పాటు ఆరుగురు వైఎస్సార్‌సీపీ నేతలపై కేసు
Andhra Pradesh Telugu | Suryaa Desk | Published : Thu, Apr 04, 2024, 07:54 PM
కాకినాడ రూరల్ నియోజకవర్గంలో మాజీ మంత్రి కురసాల కన్నబాబు సోదరుడు, సినీ డైరెక్టర్ కళ్యాణ కృష్ణ.. వైఎస్సార్‌సీపీ నేతలపై కేసు నమోదైంది. శశికాంత్‌నగర్‌లోని ఓ భవనంలో మంగళవారం రాత్రి వైఎస్సార్‌సీపీకి సంబంధించి ప్రచార సామగ్రిని దింపుతుండగా.. ఓటర్లను ప్రలోభాలకు గురిచేసేలా ఇవి ఉన్నాయని బీజేపీ, జనసేన పార్టీల నాయకులు ఎన్నికల కమిషన్‌కు ఫిర్యాదు చేశారు. ఈ క్రమంలో వైఎస్సార్‌సీపీ నేతలు అక్కడికి చేరుకుని అసభ్య పదజాలంతో దూషిస్తూ తమపై దాడికి పాల్పడ్డారని బీజేపీ, జనసేన పార్టీల నేతలు ఫిర్యాదు చేశారు.
ఈ ఘటనలో జడ్పీటీసీ సభ్యుడు రామకృష్ణ జనసేన నాయకుడు కోనేటి రామకృష్ణను తోసివేస్తుండటం.. ప్రతిపక్ష పార్టీల నాయకులపై సర్పంచి సత్యనారాయణ రాయితో దాడికి ప్రయత్నించిన వీడియోలు సోషల్ మీడియాలో వైరల్‌ అయ్యాయి. ఈ ఘటనపై బీజేపీ నేత కోనేటి రామకృష్ణ, జనసేన నాయకుడు తుమ్మలపల్లి నారాయణరావు ఇచ్చిన ఫిర్యాదులతో బుధవారం ఆరుగురిపై సర్పవరం పోలీసులు కేసు నమోదు చేశారు.
కాకినాడ గ్రామీణ జడ్పీటీసీ సభ్యుడు నులుకుర్తి రామకృష్ణ (కిట్టు), కాకినాడ గ్రామీణ వైఎస్సార్‌సీపీ ఎమ్మెల్యే కురసాల కన్నబాబు సోదరుడు, సినీ దర్శకుడు కల్యాణ్‌కృష్ణ, వైఎస్సార్‌సీపీ నాయకుడు కడియాల చిన్నబాబు, తిమ్మాపురం సర్పంచి, జేఎన్‌టీయూకే ఈసీ సభ్యుడు బెజవాడ సత్యనారాయణ, నేమాం సర్పంచి రాందేవు సూర్యప్రకాశరావు(చిన్నా)తో పాటు మరికొందరు వైఎస్సార్‌సీపీ నేతలపై కేసులు నమోదయ్యాయి.
|
|