నన్ను కొనేంత బలం బీజేపీకి లేదు.. కమలం పార్టీలో చేరికపై ప్రకాష్ రాజ్ వ్యాఖ్యలు

బీజేపీలోకి విలక్షణ నటుడు ప్రకాష్ రాజ్ చేరబోతున్నట్లు సోషల్ మీడియాలో ఒక వార్త తెగ చక్కర్లు కొడుతోంది. దేశంలో ప్రస్తుత సార్వత్రిక ఎన్నికలకు ముందు ప్రకాష్ రాజ్.. కమలం పార్టీలో చేరనున్నట్లు వార్తలు వస్తున్నాయి. ఈ క్రమంలోనే సోషల్ మీడియాలో వైరల్ అవుతున్న పోస్ట్‌కు ప్రకాష్ రాజ్ స్పందించారు. ఈ నేపథ్యంలోనే తాను బీజేపీ పార్టీ కండువా కప్పుకోనున్నట్లు వస్తున్న వార్తలు అసత్యమని ప్రకాష్ రాజ్ కొట్టిపారేశారు. ఈ ప్రచారం అంతా అబద్ధమని ఖండించారు. అంతే కాకుండా ఈ ప్రచారానికి తన స్టైల్‌లో కౌంటర్ కూడా ఇచ్చారు.

దిస్కిన్‌ డాక్టర్‌ అనే ట్విటర్ అకౌంట్‌ నుంచి.. ఈ వార్త వైరల్ అయింది. ప్రకాష్‌ రాజ్‌ త్వరలోనే బీజేపీలోకి వెళ్తున్నారని దిస్కిన్ డాక్టర్ అకౌంట్ నుంచి ట్వీట్‌ చేశారు. దీంతో ఈ పోస్ట్ క్షణాల్లోనే వైరల్‌గా మారింది. ఎప్పుడూ బీజేపీని, ప్రధాని నరేంద్ర మోదీ ప్రభుత్వ విధానాలను విమర్శించే ప్రకాష్‌ రాజ్‌.. అదే పార్టీలో చేరడం ఏంటనే సందేహం నెటిజన్లకు వచ్చింది. ఆ ట్వీట్ ప్రకాష్ రాజ్ వద్దకు చేరడానికి ముందే లక్షలాది మంది దాన్ని చూశారు. ఎట్టకేలకు ఆ ట్వీట్‌ ప్రకాష్ రాజ్‌ చూడడంతో దానికి రిప్లై ఇచ్చారు. తనను కొనేంత సైద్ధాంతిక బలం బీజేపీకి లేదని వ్యంగ్యంగా ప్రకాష్ రాజ్ ట్వీట్ చేశారు. మరోవైపు.. ఈ లోక్‌సభ ఎన్నికల్లో పోటీ చేసేందుకు తనకు వివిధ రాజకీయ పార్టీలు టికెట్‌ ఆఫర్‌ చేస్తున్నాయని ఈ ఏడాది జనవరిలో ప్రకాష్ రాజ్ చెప్పారు. అయితే అందుకు ఒక కారణం ఉందని చెప్పారు.

తాను ప్రధాని మోదీని, బీజేపీ సర్కార్‌ను తరచూ విమర్శిస్తున్నాను కాబట్టే టికెట్‌ ఇచ్చేందుకు ఆ పార్టీలు ముందుకు వచ్చాయని పేర్కొన్నారు. అంతేకానీ తన సిద్ధాంతాలు నచ్చి ఆ పార్టీలు రావడం లేదని చెప్పారు. అయితే అలాంటి ట్రాప్‌లో తాను పడబోనని స్పష్టం చేసిన ప్రకాష్ రాజ్‌.. తనను సంప్రదించిన పార్టీలు, టికెట్ ఆఫర్ చేసిన పార్టీల పేర్లు మాత్రం చెప్పలేదు. ఇక గత సార్వత్రిక ఎన్నికల్లో ప్రకాష్ రాజ్.. బెంగళూరు సెంట్రల్‌ లోక్‌సభ నియోజకవర్గం నుంచి స్వతంత్ర అభ్యర్థిగా పోటీ చేసి ఓటమి పాలయ్యారు.