సీఎం కోసం స్వయంగా షాప్‌కి వెళ్లి మైసూర్ పాక్ కొన్న రాహుల్ గాంధీ

తమిళనాడులో ఎన్నికల ప్రచారం నిర్వహిస్తోన్న కాంగ్రెస్‌ అగ్రనేత రాహుల్‌ గాంధీ కాసేపు విరామం తీసుకున్నారు. శుక్రవారం రాత్రి ఆయన ఓ స్వీటు దుకాణానికి వెళ్లి.. ఆ రాష్ట్ర ముఖ్యమంత్రి ఎంకే స్టాలిన్‌  కోసం స్వయంగా స్వీట్లను కొనుగోలు చేశారు. స్వీట్ బాక్స్‌ను డీఎంకే అధినేత స్టాలిన్‌కు అందజేశారు. ఈ కానుకను అందుకున్న ఆయన. రాహుల్‌ అభిమానానికి కృతజ్ఞతలు తెలిపారు. కొయంబత్తూరులో సీఎం స్టాలిన్‌తో కలిసి రాహుల్ గాంధీ శుక్రవారం ఎన్నికల ప్రచార సభలో పాల్గొన్నారు. అనంతరం రాత్రి సింగనల్లూరులోని ఓ మిఠాయి దుకాణానికి రాహుల్‌ వెళ్లారు.

దీనికి సంబంధించిన వీడియోను కాంగ్రెస్‌ పార్టీ తన అధికారిక సోషల్‌ మీడియా ఖాతాలో షేర్ చేసింది. రాహుల్ రోడ్డు మధ్యలోని డివైడర్‌ను దాటి దుకాణానికి వెళ్లడం వీడియోలో కనిపిస్తోంది. ఆయనను చూసి షాపులోని సిబ్బంది ఆశ్చర్యపోయారు. ఏం కావాలి సర్‌? అని అడగ్గా.. ‘మా బ్రదర్‌ స్టాలిన్‌ కోసం మైసూర్‌ పాక్‌ కొనాలి’ అని చెప్పడం వీడియోలో ఉంది. ఈ సందర్భంగా షాప్‌లోని మిఠాయిలను రాహుల్‌ రుచిచూశారు. అనంతరం ప్యాక్ చేసిన సీట్లను తీసుకుని స్టాలిన్‌ ఇంటికి వెళ్లి అందజేశారు.

ఈ వీడియోపై సోషల్‌ మీడియాలో స్టాలిన్ స్పందిస్తూ కృతజ్ఞతలు తెలియజేశారు. ‘‘నా సోదరుడు రాహుల్‌ గాంధీ స్వీట్‌ గిఫ్ట్‌తో నా హృదయం నిండిపోయింది. జూన్‌ 4న (ఎన్నికల ఫలితాలు వెలువడే తేదీ) ఇండియా కూటమి కూడా తప్పకుండా ఇలాంటి తీపి విజయాన్నే అందుకుంటుంది’ అని ఆశాభావం వ్యక్తం చేశారు. ఇక, తమిళనాడులోని 39 లోక్‌సభ స్థానాలకు తొలిదశలో ఏప్రిల్ 19న పోలింగ్ జరగనుంది. గత లోక్‌సభ ఎన్నికల్లో డీఎంకే-కాంగ్రెస్ కూటమి మొత్తం 38 స్థానాల్లో గెలుపొందింది. అప్పుడు బీజేపీతో కలిసి పోటీచేసిన అన్నాడీఎంకే ఒక్క స్థానంతోనే సరిపెట్టుకుంది. ఈ సారి అక్కడ త్రిముఖ పోరు నెలకుంది. బీజేపీ, అన్నాడీఎంకే, డీఎంకేలు వేర్వేరుగా పోటీ చేస్తున్నాయి.

అటు, స్వీట్ షాపు యజమాని బాబు మాట్లాడుతూ.. ‘కోయంబత్తూరులో ఎన్నికల ప్రచారానికి వచ్చిన రాహుల్ గాంధీ మా దుకాణాన్ని సందర్శించడంతో ఆశ్చర్యపోయాం.. ఆయన గులాబ్‌జామ్‌లను ఇష్టపడ్డారు.. కిలో మైసూర్ పాక్ ప్యాక్ చేయించారు.. దుకాణంలో ఉన్న శాంపిల్స్ స్వీట్లను కూడా రుచిచూశారు.. ఆయన మా షాపులోకి రావడం చాలా సంతోషంగా ఉంది.. సిబ్బంది కూడా సంబరపడిపోయారు.. దాదాపు 30 నిమిషాల పాటు ఇక్కడ ఉన్నారు.. ఆయన వస్తారని సమాచారం లేకపోవడంతో ఆశ్యర్యం కలిగించింది.. డబ్బులు ఇవ్వొద్దని చెప్పినా.. మొత్తం చెల్లించి తీసుకెళ్లారు’ అని అన్నారు.