కాంగ్రెస్‌కు మరో షాక్.. పోటీ నుంచి తప్పుకుని బీజేపీలో చేరిన ఎంపీ అభ్యర్ధి

లోక్‌సభ ఎన్నికల్లో కాంగ్రెస్ పార్టీకి మరో ఎదురుదెబ్బ తగిలింది. మధ్యప్రదేశ్‌లోని ఇండోర్ లోక్‌సభ స్థానానికి ఆ పార్టీ అభ్యర్ధిగా నామినేషన్ వేసిన అక్షయ్ కాంతి బామ్ పోటీ నుంచి తప్పుకున్నారు. తన నామినేషన్‌ను వెనక్కి తీసుకున్న ఆయన.. వెనువెంటనే బీజేపీలో చేరారు. ఈ స్థానంలో నాలుగో దశలో మే 13న పోలింగ్ జరగనుండగా.. నామినేషన్‌కు గడువు సోమవారం (ఏప్రిల్ 29)తో ముగియనుంది. స్థానిక బీజేపీ ఎమ్మెల్యే రమేశ్ మెండోలాతో కలిసి కలెక్టర్ ఆఫీస్‌కు వెళ్లిన ఆయన.. తన నామినేషన్‌ను ఉపసంహరించుకున్నారు. ఇక్కడ బీజేపీ నుంచి సిట్టింగ్ ఎంపీ శంకర్ లాల్వానీ పోటీలో ఉన్నారు. ఇప్పటికే గుజరాత్‌లో సూరత్ స్థానం బీజేపీ ఏకగ్రీవంగా గెలుచుకున్న విషయం తెలిసిందే. అక్కడ కాంగ్రెస్ అభ్యర్ధి నామినేషన్ తిరస్కరణకు గురయ్యింది.

ఇక, బీజేపీలోకి అక్షయ్ బామ్‌ను స్వాగతిస్తున్నట్టు ఆ రాష్ట్ర మంత్రి కైలాస్ విజయ్ వర్గీయ ఎక్స్‌లో ట్వీట్ చేశారు. ‘ఇండోర్‌ కాంగ్రెస్‌ అభ్యర్థి అక్షయ్‌కాంతి బామ్‌కు ప్రధాని నరేంద్ర మోదీ, పార్టీ జాతీయ అధ్యక్షుడు జేపీ నడ్డా, ముఖ్యమంత్రి మోహన్‌ యాదవ్‌, రాష్ట్ర అధ్యక్షుడు వీడీ శర్మ నేతృత్వంలో బీజేపీలోకి స్వాగతం పలుకుతున్నాం’ ఆయన పోస్ట్‌లో పేర్కొన్నారు.

బామ్ నామినేషన్ ఉపసంహరణతో నిరాశకు గురైన కాంగ్రెస్ నాయకులు.. ఆయనకు టిక్కెట్ ఇవ్వాలనే పార్టీ హైకమాండ్ నిర్ణయాన్ని ప్రశ్నిస్తున్నారు. ‘అక్షయ్‌ బామ్‌ గురించి మా పార్టీ నేతలకు వార్నింగ్‌ ఇచ్చాను.. ఆయన నామినేషన్‌ ఉపసంహరించుకుంటానని హెచ్చరించాను.. మాలాంటి పార్టీ కార్యకర్తలు ఏళ్ల తరబడి కాంగ్రెస్‌కు సేవ చేస్తున్నా ఆయనలాంటి వాళ్లకు టికెట్‌ ఇవ్వడం బాధాకరం’ అని స్థానిక కాంగ్రెస్ నేత దేవేంద్ర సింగ్ యాదవ్ అన్నారు.

నామినేషన్ పరిశీలన సమయంలో అక్షయ్ కాంత్ బామ్ నామినేషన్‌పై బీజేపీ లీగల్ సెల్ అభ్యంతరం వ్యక్తం చేసింది. ఆయనపై 17 ఏళ్ల కిందట నమోదయిన భూవివాదం కేసును అఫిడ్‌విట్‌లో పెట్టలేదని ఆరోపించింది. అయితే, వారి వాదనలను రిటర్నింగ్ అధికారి తోసిపుచ్చి, నామినేషన్ ఆమోదించారు