వైసీపీ అభ్యర్థికి అల్లు అర్జున్ మద్దతు.. భార్య స్నేహారెడ్డితో కలిసి ఆయన ఇంటికెళ్లి మరీ

సార్వత్రిక ఎన్నికలవేళ ఆంధ్రప్రదేశ్‌లో సినీ గ్లామర్ కనిపిస్తోంది. జనసేన అధినేత పవన్ కళ్యాణ్ తరఫున.. అలాగే కూటమి తరఫున పలువురు సినిమా సెలబ్రిటీలు ప్రచారం చేస్తున్నారు. అయితే ఐకాన్ స్టార్ అల్లు అర్జున్ కూడా వైఎస్సార్‌సీపీ ఎమ్మెల్యే అభ్యర్థిని మద్దతు తెలిపారు. అల్లు అర్జున్ నంద్యాలలో సందడి చేశారు. ఎన్నికల సమయంలో తన మిత్రుడి విజయం కోసం ప్రచారం చేయడానికి బన్నీ నంద్యాల వెళ్లారు. వైఎస్సార్‌ కాంగ్రెస్‌ పార్టీ నుంచి నంద్యాల నియోజకవర్గంలో ఎన్నికల బరిలో ఉన్న శిల్పా రవిచంద్రారెడ్డి కోసం ప్రచారం చేయడానికి అల్లు అర్జున్ వెళ్లారు.

భార్య స్నేహా రెడ్డితో కలిసి శనివారం మధ్యాహ్నం అల్లు అర్జున్ నంద్యాల చేరుకున్నారు. వారికి గజమాలతో శిల్పా రవిచంద్రారెడ్డి దంపతులు ఘనస్వాగతం పలికారు. అల్లు అర్జున్‌ నంద్యాలకు వస్తున్న విషయం తెలియడంతో ముందుగానే ఆయన అభిమానులు భారీ ఎత్తున చేరుకున్నారు. బన్నీ వాహనాల వెంట భారీ ర్యాలీగా వెళ్లారు. మధ్యలో ఓ సెంటర్ వద్ద గజమాలతో బన్నీకి ఘనస్వాగతం పలికారు. ఆ సమయంలో బన్నీ రేంజ్ రోవర్ కారును పెద్దఎత్తున అభిమానులు చుట్టుముట్టారు.

అభిమానులకు అభివాదం చేసేందుకు బన్నీ కారు సన్‌రూఫ్ నుంచి బయటికి వచ్చారు. అయితే ఆ సమయంలో కొంత మంది అభిమానులు కారుపైకి ఎక్కారు. బన్నీతో కరచాలనం చేసేందుకు ప్రయత్నించారు. అలా చేయొద్దని అభిమానులకు బన్నీ నచ్చజెప్పారు. ఇక అక్కడి నుంచి వేలాది మంది అభిమానుల మధ్య శిల్పా రవిచంద్రారెడ్డి ఇంటికి బన్నీ దంపతులు చేరుకున్నారు. శిల్పా రవిచంద్రారెడ్డి ఇంటి పైనుంచి అభిమానులకు అభివాదం చేశారు. అల్లు అర్జున్ భార్య స్నేహారెడ్డి సైతం అభిమానులకు అభివాదం చేశారు.

2019 ఎన్నికల్లో తొలిసారి నంద్యాల నుంచి శిల్పా రవిచంద్రారెడ్డి పోటీ చేశారు. ఆ సమయంలో కూడా బన్నీ తన మిత్రుడు విజయం సాధించాలని మద్దతు తెలిపారు. ఆ ఎన్నికల్లో టీడీపీ అభ్యర్థి భూమా బ్రహ్మనందరెడ్డిపై 35 వేలకు పైగా ఓట్ల మెజారిటీతో గెలిచారు. మళ్లీ ఇప్పుడు కూడా శిల్పా రవి నంద్యాల నుంచే ఎన్నికల బరిలో ఉన్నారు. మరోసారి తన మిత్రుడి కోసం ప్రచారం చేయడానికి బన్నీ వెళ్లారు.

శిల్పా రవిచంద్రారెడ్డి భార్య నాగిని రెడ్డి, అల్లు అర్జున్‌ సతీమణి స్నేహా రెడ్డి క్లోజ్ ఫ్రెండ్స్. వారిద్దరూ క్లాస్‌మేట్స్ కూడా. స్నేహారెడ్డిని అల్లు అర్జున్ వివాహం చేసుకున్న తర్వాత.. రవిచంద్రారెడ్డి, బన్నీ మంచి స్నేహితులు అయ్యారు. ఇరు కుటుంబాల్లో జరుగుతున్న శుభకార్యాల్లోనూ వారు పాల్గొన్నారు. స్నేహానికి అత్యంత విలువ ఇచ్చే వ్యక్తి అల్లు అర్జున్‌ అని గతంలో ఓ ఇంటర్వ్యూలో రవిచంద్రారెడ్డి అన్నారు. మరోవైపు అల్లు అర్జున్ పిఠాపురంలో పోటీ చేస్తున్న జనసేన పార్టీ అధినేత పవన్ కళ్యాణ్‌కు కూడా మద్దతు తెలిపారు.