నిజమైన ఫోటోలు, డీప్‌ఫేక్ ఫోటోలు గుర్తించలేకపోతున్నారా.. ఈ టిప్స్ పాటించండి: కేంద్రం

రోజురోజుకూ టెక్నాలజీ పెరిగిపోతున్న నేపథ్యంలో కొత్త కొత్త సమస్యలు పుట్టుకొస్తున్నాయి. మంచి కోసం టెక్నాలజీని డెవలప్ చేస్తే.. కొంత మంది ఆ టెక్నాలజీని దుర్వినియోగం చేస్తున్నారు. ప్రస్తుతం డీప్‌ఫేక్‍‌ వాయిస్‌లు, డీప్‌ఫేక్‍‌ ఫోటోలు, డీప్‌ఫేక్‍‌ వీడియోలు.. తీవ్ర కలకలం రేపుతున్నాయి. ఈ క్రమంలోనే చాలా మంది సెలబ్రిటీలు ఈ డీప్‌ఫేక్ బారిన పడి.. తీవ్ర ఆందోళన చెందుతున్నారు. ఈ క్రమంలోనే ఆర్టిఫిషియల్ ఇంటెలిజెన్స్‌తో తయారు చేసిన డీప్‌ఫేక్‍‌ ఫోటోలను ఎలా గుర్తించాలో కేంద్ర ప్రభుత్వం కొన్ని టిప్స్ చెప్పింది. అంతేకాకుండా ఎలా గుర్తించాలో ఓ వీడియో రూపంలో విడుదల చేసింది.

ఏఐ టెక్నాలజీతో సృష్టించిన డీప్‌ఫేక్‌ వీడియోలు, ఫొటోలు వ్యాప్తి చెందడం తీవ్ర కలవరానికి గురి చేస్తోంది. అయితే ఇలాంటి డీప్‌ఫేక్ ఫోటోలను గుర్తించేందుకు కేంద్ర ప్రభుత్వానికి చెందిన ప్రెస్‌ ఇన్ఫర్మేషన్‌ బ్యూరో - పీఐబీ తాజాగా ఓ వీడియోను విడుదల చేసింది. అయితే వేరే టెక్నాలజీ ఏమీ ఉపయోగించకుండానే.. చిన్న చిన్న టిప్స్ ఫాలో అయి.. ఏవి నిజమైన ఫోటోలో, డీప్‌ఫేక్ ఫోటోలో గుర్తించవచ్చని వెల్లడించింది. అయితే డీప్‌ఫేక్ ఫోటాను ఎలా గుర్తించాలి అనే విషయాన్ని ఆ వీడియోలో పీఐబీ అన్ని అంశాలను క్షుణ్ణంగా వివరించింది.

ఆర్టిఫిషియల్ ఇంటెలిజెన్స్‌తో తయారు చేసిన డీప్‌ఫేక్ ఫొటోలో ఉన్న వ్యక్తి.. నిజమైన వ్యక్తికి తేడా ఉంటుంది. అంతేకాకుండా చేతివేళ్లు, కాలి వేళ్లు నిజంగా ఉన్న వాటి కంటే వేరుగా కన్పిస్తాయని ఆ వీడియోలో పీఐబీ పేర్కొంది. ఇక మార్ఫింగ్ చేసే ఫొటోల్లో అందులో ఉన్న వ్యక్తి నీడలు కొంచెం తేడాగా ఉంటాయని వెల్లడించింది. ఇలా ఆ ఫోటోలను క్షుణ్ణంగా పరిశీలిస్తే ఏది నిజమైందో ఏది డీప్‌ఫేక్ ఫోటోనో ఈజీగా కనిపెట్టవచ్చని తెలిపింది. దీంతో పీఐబీ విడుదల చేసిన ఆ వీడియో ప్రస్తుతం సోషల్ మీడియాలో తెగ వైరల్‌ అవుతోంది.

 ఇటీవల కొందరు సినిమా సెలబ్రిటీలు, క్రీడాకారులు, రాజకీయ నాయకుల డీప్‌ఫేక్‌ ఫోటోలు, డీప్‌ఫేక్ వీడియోలు సోషల్ మీడియాలో వైరల్ కావడం పెను దుమారానికి కారణం అయింది. ఈ డీప్‌ఫేక్‌లను అరికట్టాలని కేంద్ర ప్రభుత్వానికి చాలా మంది విజ్ఞప్తి చేశారు. దీంతో ఈ డీప్‌ఫేక్ పట్ల తీవ్ర ఆగ్రహం వ్యక్తం చేసిన కేంద్ర ప్రభుత్వం.. నకిలీ ఫోటోలు, వీడియోలను అడ్డుకునేందుకు కొత్త ఫ్రేమ్‌వర్క్‌ను రూపొందిస్తామని తెలిపింది. ప్రస్తుతం జరుగుతున్న లోక్‌సభ ఎన్నికల తర్వాత డీప్‌ఫేక్‌పై చట్టం తీసుకొచ్చే అవకాశాలు ఉన్నాయని కేంద్ర ప్రభుత్వ వర్గాలు పేర్కొన్నాయి.