కదులుతున్న బస్సులో ఇదేం పని.. డ్రైవర్, మహిళ కండక్టర్‌ సస్పెండ్

కర్ణాటక రాష్ట్ర రోడ్డు రవాణా సంస్థకు చెందిన ఓ బస్సు డ్రైవర్, మహిళా కండక్టర్ చేసిన పని.. వారిద్దరి ఉద్యోగాలు ఊస్ట్ అయ్యేలా చేసింది. వర్షం పడుతున్న సమయంలో గొడుగు పట్టుకుని డ్రైవర్ బస్సును నడపగా.. దాన్ని ఆ బస్సులో ఉన్న మహిళా కండక్టర్ వీడియో తీసిందా. ఇక ఆ వీడియోను డ్రైవర్ సోషల్ మీడియాలో పోస్ట్ చేశాడు. కొద్దిసేపట్లోనే ఆ వీడియో వైరల్ కావడంతో.. బస్సు గురించి, ఆర్టీసీ అధికారుల గురించి నెటిజన్లు ప్రశ్నల వర్షం కురిపించారు. దీంతో రంగంలోకి దిగిన అధికారులు బస్సును తనిఖీ చేయగా.. అంతా సక్రమంగానే ఉంది. కేవలం వీడియో కోసమే వారిద్దరూ అలా చేశారని గుర్తించిన ఉన్నతాధికారులు.. డ్రైవర్, కండక్టర్‌ను సస్పెండ్ చేశారు.

కర్ణాటకలోని ధార్వాడ యూనిట్‌లో బెటగేరి - ధార్వాడ మార్గంలో నడిచే నార్త్‌వెస్ట్రన్ కర్ణాటక రోడ్ ట్రాన్స్‌పోర్ట్ కార్పోరేషన్‌కు చెందిన బస్సు‌ అది. డ్రైవర్ హనుమంతప్ప, కండక్టర్ అనిత విధుల్లో ఉన్నారు. సాయంత్రం జోరుగా వర్షం కురుస్తున్న సమయంలో బస్సులో ఎవరూ లేకపోవడంతో డ్రైవర్, కండక్టర్ కలిసి ఈ గొడుగు సీన్‌ను సరదాగా క్రియేట్ చేశారు. కాకపోతే దాన్ని వీడియో తీసి సోషల్ మీడియాలో పెట్టడమే వారు చేసిన తప్పు. ఈ వీడియో చూసినవాళ్లు ఆర్టీసీని తిట్టిపోస్తున్నారు. వీడియోను సరిగా చూడకుండా ఇలాంటి చెత్త బస్సులు నడుపుతున్నారని ఆడిపోసుకుంటున్నారు. ఆర్టీసీ డ్రైవర్లు ఎంత కష్టపడుతున్నారో అని సానుభూతి చూపిస్తున్నారు.

ఈ వీడియోపై నార్త్ వెస్టరన్ కర్ణాటక ఆర్టీసీ అధికారులు స్పందించారు. వర్షం కురుస్తున్నప్పుడు బస్సులో ఎక్కడా లీకేజీ లేదని స్పష్టం చేశారు. బస్సులో వాటర్ లీకైనట్టు డ్రైవర్, కండక్టర్, ప్రయాణికుల నుంచి ఎలాంటి ఫిర్యాదు నమోదు కాలేదన్నారు. ఆఖరికి ఆర్టీసీ టెక్నికల్ ఇంజినీర్లు కూడా బస్సును పరిశీలించారని.. పైకప్పు లీకేజీ కావడం లేదని నిర్ధారించారని వెల్లడించారు. డ్రైవర్, కండక్టర్‌ను విచారించగా కేవలం వినోదం కోసమే వీడియో చేసినట్టు చెప్పారన్నారు. సంస్థ పరువు ప్రతిష్టల విషయంలో నిర్లక్ష్యంగా వ్యవహరించిన డ్రైవర్, కండక్టర్‌ను విధుల నుంచి తొలగించినట్టు తెలిపారు.