ఇది థర్డ్ ఏసీనా, లేక జనరల్ కంపార్ట్‌మెంటా.. ఇంతమంది ప్రయాణికులేంటి బ్రో!

సాధారణంగా మనం రైలు ప్రయాణాలు చేయాలంటే.. ముందే రిజర్వేషన్ చేసుకుంటాం. ఆర్థిక స్థోమతను బట్టి.. స్లీపర్, ఏసీ క్లాస్ టికెట్లు బుక్ చేసుకుంటాం. జనరల్ బోగీల్లో వెళ్లలేని వారు, దూర ప్రయాణాలు చేసేవారు రిజర్వేషన్ చేయించుకుంటారు. అయితే గత కొన్ని రోజులుగా సోషల్ మీడియాలో వస్తున్న వీడియోలు చూస్తుంటే రైలు ప్రయాణాలు ఇంత నరకంగా ఉంటాయా అనిపిస్తోంది. రిజర్వేషన్ బోగీల్లోకి కూడా టికెట్ లేని వారు, రిజర్వేషన్ చేయించుకోకుండా జనరల్ టికెట్లు కొనుగోలు చేసిన వారు చొచ్చుకువచ్చి ప్రయాణాలు చేస్తుండటం మనం చూస్తూనే ఉన్నాం. ఈ క్రమంలోనే తాజాగా థర్డ్ ఏసీ కోచ్‌లో కిక్కిరిసిపోయి ఉన్న వీడియో వైరల్ అవుతోంది.

బ్రహ్మపుత్ర ఎక్స్‌ప్రెస్‌ థర్డ్ ఏసీ కంపార్ట్‌మెంట్‌లో ఈ సంఘటన చోటు చేసుకుంది. అందులో ప్రయాణిస్తున్న ఓ ప్రయాణికుడు.. తాను పడిన అవస్థలను వీడియో తీసి సోషల్ మీడియాలో పోస్ట్ చేయడంతో తెగ వైరల్ అవుతోంది. బీహార్ రాజధాని పాట్నాకు చెందిన విజయ్ కుమార్ అనే వ్యక్తి బ్రహ్మపుత్ర ఎక్స్‌ప్రెస్ రైలులోని థర్డ్ ఏసీలో ప్రయాణించేందుకు 8 టికెట్లు బుక్ చేసుకున్నాడు. తీరా రైల్వే స్టేషన్‌కు వెళ్లి రైలు ఎక్కగానే షాక్ అయ్యాడు. అప్పటికే అన్ని సీట్లు ఫుల్ అయిపోగా.. మరికొందరు నిలబడి ఉన్నారు. ఒక్కసారిగా అది థర్డ్ ఏసీ బోగీనేనా లేక జనరల్ కంపార్ట్‌మెంటా అని విజయ్ కుమార్‌కు కొద్దిసేపు అర్థం కాలేదు.

దీంతో విజయ్‌కుమార్‌ కుటుంబం థర్డ్‌ ఏసీ టికెట్లు బుక్ చేసుకున్నా అందులో సీట్లు దక్కలేదు. తాము టికెట్ బుక్ చేసుకున్నామని.. అది కూడా కన్ఫర్మ్‌ అయ్యిందని విజయ్ కుమార్ కుటుంబ సభ్యులు మొత్తుకున్నా అందులో ఉన్న వారు వినలేదు. దీంతో వాళ్లనూ వీళ్లనూ లేపి చివరికి 8 సీట్లలో 6 సీట్లు దక్కించుకున్నాడు. ఆర్‌పీఎఫ్ సిబ్బందికి ఫిర్యాదు చేద్దామనుకున్నా.. వారు అందుబాటులో లేరు.

దీంతో బ్రహ్మపుత్ర ఎక్స్‌ప్రెస్‌లో తనకు ఏర్పడిన పరిస్థితిని విజయ్ కుమార్ వీడియో తీసి ట్విటర్‌లో పోస్ట్ చేయడంతో అది వైరల్‌గా మారింది. ఈ పోస్ట్‌కు రైల్వే శాఖ మంత్రి అశ్వినీ వైష్ణవ్, ప్రధానమంత్రి నరేంద్ర మోదీ, రైల్వే శాఖను ట్యాగ్ చేశారు. ఒక్క బ్రహ్మపుత్రలోనే కాదు చాలా రైళ్లలో ఇదే పరిస్థితి కనిపిస్తోందని నెటిజన్లు కామెంట్లు చేస్తున్నారు. ఈ క్రమంలోనే గతంలో తమకు ఎదురైన అనుభవాలను మిగితా నెటిజన్లు గుర్తు చేసుకున్నారు. పదే పదే ఇలాంటి సంఘటనలు వెలుగు చూస్తున్నా రైల్వే శాఖ మాత్రం పట్టించుకోవడం లేదని నెటిజన్లు మండిపడుతున్నారు. ఇటీవల ఇలాంటి సంఘటనలు చాలా జరగ్గా.. ప్రయాణికులు సోషల్ మీడియాలో వీడియోలు పెట్టారు.