‘పవన్ కళ్యాణే సీఎం కావాలని కోరుకుంటున్నా’.. వేణు స్వామిలో ఇంత మార్పు వచ్చిందా?

ఏపీ ఎన్నికల ఫలితాలకు మరికొద్ది రోజుల సమయం ఉంది. ఓవైపు అధికార వైఎస్సార్సీపీ, మరోవైపు టీడీపీ కూటమి.. ఎవరికి వారే విజయంపై పూర్తి ధీమాతో ఉన్నారు. 2019కి మించి సీట్లు గెలుస్తామని.. ఊహించని స్థాయిలో తమ విజయం ఉంటుందని వైఎస్సార్సీపీ చెబుతుంటే.. ఈసారి జగన్ పార్టీని చిత్తుగా ఓడిస్తామని టీడీపీ చెబుతోంది. జూన్ 9న విశాఖలో జగన్ ప్రమాణ స్వీకారం చేయబోతున్నారంటూ వైఎస్సార్సీపీ ప్రకటించగా.. టీడీపీ సైతం విజయవాడలో బాబు ప్రమాణ స్వీకారానికి ముహూర్తం ఖరారు చేసే పనిలో ఉంది. ఎన్నికల ఫలితాలు రాక ముందే.. ఎగ్జిట్ పోల్స్ ఫలితాలైనా వెల్లడి కాకముందే ఈ రెండు పార్టీలు విజయం పట్ల ధీమా వ్యక్తం చేస్తుండటం అందర్నీ ఆశ్చర్యానికి గురి చేస్తోంది.

అటు వైఎస్సార్సీపీ, ఇటు టీడీపీ కూటమి సోషల్ మీడియాలో ఎప్పటికప్పుడు తమకు అనుకూలంగా ఉండే సర్వేలు, వీడియోలను వదులుతూ జనాలను కన్ఫ్యూజన్‌కు గురి చేస్తున్నాయి. తాజాగా పవన్ కళ్యాణ్ సీఎం కావాలని కోరుకుంటున్నానంటూ వేణుస్వామి మాట్లాడిన వీడియో సోషల్ మీడియాలో హల్చల్ చేస్తోంది.

‘పవన్ కళ్యాణ్ గారు సీఎం కావాలనే కోరిక నాకూ ఉంది. పవన్ కళ్యాణ్ అంటే విపరీతమైన పిచ్చి.. జగన్‌ను ఓడగొట్టి రేపు పవన్ కళ్యాణే సీఎం కావాలి’ అంటూ వేణుస్వామి మాట్లాడిన వీడియోను వైరల్ చేస్తున్నారు. 2024 ఎన్నికల్లో వైఎస్ జగన్ మరోసారి విజయం సాధిస్తారని వేణుస్వామి ఎప్పటి నుంచో చెబుతోన్న సంగతి తెలిసిందే. ఈ నేపథ్యంలో పవన్ కళ్యాణ్ సీఎం కావాలని తాను కోరుకుంటానంటూ వేణుస్వామి మాట్లాడటం అందర్నీ ఆశ్చర్యానికి గురి చేస్తోంది.

అయితే ఈ వీడియో రెండు నెలల కిందటిది. ఓ యూట్యూబ్ ఛానెల్‌కు ఇచ్చిన ఇంటర్వ్యూలో వేణుస్వామి ఈ వ్యాఖ్యలు చేశారు. ఆయన జనసేనాని గురించి చాలా సేపు మాట్లాడగా.. అందులో నుంచి తమకు అనుకూలమైన క్లిప్‌ను మాత్రం కట్ చేసి సోషల్ మీడియాలో వైరల్ చేస్తున్నారు. ఆ వీడియోలో వేణు స్వామి మాట్లాడుతూ.. పవన్ కళ్యాణ్ ఎవరు చెప్పిన వినరని.. ఆయనకు చెప్పేది ఒక్క గురూజీ మాత్రమేనని.. కానీ ఆయన చెప్పరన్నారు. పవన్ కళ్యాణ్‌కు సినిమాల్లో తిరుగులేదని.. కానీ రాజకీయాల్లో మాత్రం ఆయన ముక్కుసూటి వైఖరి కారణంగా ఆశించిన స్థాయిలో సక్సెస్ కాలేరన్నారు.

పవన్ కళ్యాణ్ 2019లో సీఎం కాబోడని 2017లోనే తాను జోస్యం చెప్పానన్న వేణు స్వామి.. ఆ లైవ్ ముగిసిన తర్వాత నెల రోజులపాటు తన ఫోన్‌తోపాటు తన పీఏల ఫోన్లను ఆఫ్ చేయాల్సి వచ్చిందన్నారు. ఫోన్ ఎత్తితే చెవిలో నుంచి రక్తం వచ్చేలా బూతులు తిట్టారన్నారు. ఐమ్యాక్స్‌లో సినిమాకు వెళ్లాలన్నా.. బౌన్సర్లను వెంట తీసుకెళ్లాల్సి వచ్చిందన్నారు.