రుక్మిణిగూడలో లోయలో పడిపోయిన వ్యాన్
Andhra Pradesh Telugu | Suryaa Desk | Published : Tue, May 28, 2024, 07:38 PM
సీతంపేట మండలం పెదరామ పంచాయతీ పరిధి రుక్మిణిగూడ వద్ద సోమవారం ప్రమాదం చోటు చేసుకుంది. ఓ వ్యాన్ అదుపు తప్పి లోయలోకి జారుకుంది. అయితే అక్కడున్న బండరాళ్ల కారణంగా వాహనం లోయలో పడలేదు. దీంతో అంతా ఊపిరిపీల్చుకున్నారు. వివరాల్లోకి వెళ్తే.. శుభకార్యం నిమిత్తం రుక్మిణిగూడ గ్రామానికి చెందిన గిరిజనులు ఓ వ్యాన్లో నీలకంఠాపురం వైపు బయల్దేరారు. అయితే వారి గ్రామ సమీపంలోనే మలుపు వద్ద ఘాట్ రోడ్డు దిగుతున్న సమయంలో ఆ వాహనం గేర్ సరిగ్గా పడలేదు. దీంతో వ్యాన్ అదుపు తప్పి లోయలోకి జారుకుంది. కాగా రహదారికి ఆనుకొని ఉన్న పెద్ద బండరాళ్లు వ్యాన్ ముందు భాగం ఢీకొనడంతో వాహనం అక్కడే ఆగిపోయింది. దీంతో త్రుటిలో పెను ప్రమాదం తప్పింది. ఎవరికీ ఏమీ కాలేదు. వ్యాన్లో ఉన్న 30 మంది గిరిజనులు హమ్మమ్యా? అనుకుంటూ ఇళ్లకు చేరారు. కాగా ఒకే రోజు మండలంలో రెండు ఘటనలు జరగడంపై స్థానికులు ఆందోళన వ్యక్తం చేశారు.
|
|