ఓట్లు లెక్కించకుండానే పిఠాపురం ఫలితం.. 93 వేల మెజార్టీ.! గెలిచింది గీతక్కా? పవనా

దేశ మొత్తం ఎన్నికల ఫలితాలన్నీ ఓ లెక్క అయితే.. ఆంధ్రప్రదేశ్.. అందులోనూ పిఠాపురం రిజల్ట్ గురించి ఉత్కంఠగా ఎదురుచూస్తున్నారు. ఇక్కడ నుంచి కూటమి అభ్యర్ధిగా జనసేన అధినేత పవన్ కళ్యాణ్ పోటీ చేయగా.. అతనికి పోటీగా వైసీపీ నుంచి వంగా గీతా పోటీ చేశారు. వీరిద్దరి మధ్య పోటీ హోరా హోరీగా సాగడంతో.. మేం గెలుస్తాం అంటే మేం గెలుస్తాం అంటూ పోటాపోటీగా పొలిటికల్ ఫైటింగ్‌కి దిగుతున్నాయి ఆయా పార్టీలు.

ఇక పవన్ కళ్యాణ్ అయితే.. తాను ఆల్రెడీ గెలిచేశానని.. లక్షకి పైగా మెజారిటీ వస్తుందని.. ఫలితం రావడం మాత్రమే ఆలస్యం అని ఎన్నికలకు ముందే చెప్పేశారు. ఇక వంగా గీత అయితే అతనికంత సీన్ లేదని.. గీతా లోకల్.. అతను మాటలు చెప్తాడు.. మేం చేతలు చూపిస్తాం.. ఓట్లు పడేది మాత్రం మాకేనని గెలుపుపై ధీమా వ్యక్తం చేశారు.

మొత్తం పిఠాపురం నియోజక వర్గంలో 2.29 లక్షల మంది ఓటర్లు ఉండగా.. అందులో కాపు ఓట్లు 75 వేలకు పైగా ఉండటంతో.. ఆ కాపు ఓటర్లే డిసైడింగ్ ఫ్యాక్టర్‌గా నిలవనున్నారు. అయితే అటు పవన్ కళ్యాణ్.. ఇటు వంగా గీత ఇద్దరూ కాపు సామాజిక వర్గానికి చెందిన వారే కావడంతో కాపు ఓటర్లు ఎవరికి ‘కాపు’కాశారనేది ఆసక్తిగా మారింది.

ఈ నేపథ్యంలో.. అసలు ఓట్ల లెక్కింపు ప్రారంభం కాకుండా.. కనీసం ఎగ్జిట్ పోల్స్ రాకుండానే పిఠాపురం ఫలితం వచ్చేసింది వికీపీడియాలో. అదెట్టాగంటే.. గెలుపు మాదంటే మాది అంటూ అత్యుత్సాహం ప్రదర్శిస్తున్న.. ఆయా పార్టీల కార్యకర్తలు, అభిమానులు పిఠాపురం ఫలితాలను తేల్చేశారు.

వికీపీడియాలో ఎవరైనా ఎడిట్ చేసే ఆప్షన్ ఉండటంతో.. మొదటి పవన్ కళ్యాణ్ 93 వేలకు పైగా మెజారిటీతో గెలిచినట్టుగా పోస్ట్‌లు దర్శనం ఇచ్చాయి. పవన్ కళ్యాణ్‌కి 1,36,741 ఓట్లు వస్తే.. వంగా గీతకి కేవలం 43,260 ఓట్లు పడినట్టుగా ఎడిట్ చేసి సోషల్ మీడియాలో వైరల్ చేశారు. అయితే ఆ తరువాత కొద్దిసేపటికే.. జనసైనికుల అత్యుత్సాహానికి కౌంటర్‌గా వైసీపీ అభిమానులు.. వంగా గీత అదే 93 వేల మెజారిటీతో గెలిచినట్టు ఎడిట్ చేశారు. దీంతో పిఠాపురం ఫలితం వికీపీడియా వేదికగా రిజల్ట్‌కి ముందే వైరల్ అయిపోయింది.

అయితే సోమవారం నాడు అంటే జూన్ 04న ఎన్నికల ఫలితాలు రాబోతుండగా.. విశాఖపట్నంలో ప్రమాణ స్వీకారానికి సీఎం జగన్ భారీ ఏర్పాట్లు చేస్తుంటే.. అమరావతి వేదికగా చంద్రబాబు సీఎంగా ప్రమాణ స్వీకారం చేస్తారని అంటున్నారు టీడీపీ వర్గాలు. మొత్తానికి అయితే 2024 ఎన్నికల ఫలితం అయితే.. ఆంధ్రప్రదేశ్ ఎన్నికల చరిత్రలో అత్యంత ఉత్కంఠ కలిగించేదిగా నిలిచిపోనుంది.