పిన్నెల్లికి ఊహించని ట్విస్ట్.. సుప్రీం కోర్టులో ఏకంగా రెండు పిటిషన్లు

పల్నాడు జిల్లా మాచర్ల ఎమ్మెల్యే పిన్నెల్లి రామకృష్ణారెడ్డిపై నమోదైన కేసుల వ్యవహారం మరో మలుపు తిరిగింది. ఏపీ ఎన్నికల పోలింగ్ రోజు మాచర్ల నియోజకవర్గంలోని పాల్వాయి గేటు ఘటనలో.. టీడీపీ పోలింగ్ ఏజెంట్ నంబూరి శేషగిరిరావు ఫిర్యాదుతో పిన్నెల్లిపై హత్యాయత్నం కేసు నమోదైన సంగతి తెలిసిందే. ఈ కేసుకు సంబంధించి నంబూరి శేషగిరిరావు సుప్రీంకోర్టును ఆశ్రయించారు. పిన్నెల్లి రామకృష్ణారెడ్డి నుంచి తనకు ప్రాణహాని ఉందని దేశ అత్యున్నత న్యాయస్థనాంలో పిటిషన్‌ దాఖలు చేశారు.

ఆంధ్రప్రదేశ్ హైకోర్టు పిన్నెల్లికి ఇచ్చిన అరెస్టు మినహాయింపు ఆదేశాలు రద్దు చేయాలని శేషగిరిరావు ఆ పిటిషన్‌‌లో పేర్కొన్నారు. పాల్వాయిగేటు ఈవీఎం ధ్వంసం ఘటనలో తనపై దాడి చేశారని పిటిషన్‌లో ప్రస్తావించారు. జూన్ 4న కౌంటింగ్‌ రోజు హింసకు పాల్పడే ప్రమాదం ఉందన్నారు శేషగిరిరావు. పాల్వాయిగేటు పోలింగ్ కేంద్రంలో ఈవీఎం ధ్వంసం చేసిన ఘటనపై శేషగిరిరావు మరో పిటిషన్‌ దాఖలు చేశారు. ఈవీఎం ధ్వంసం చేసిన ఘటనలో ఆధారాలున్నా ఎమ్మెల్యే పిన్నెల్లి పేరు లేకుండా కేసు పెట్టారని.. ఎమ్మెల్యే పేరు, అనుచరుల పేర్లు లేకుండా కేసు నమోదు చేశారన్నారు. ఈ కేసులో గుర్తు తెలియని వ్యక్తులంటూ ఎమ్మెల్యేకు అనుకూలంగా వ్యవహరించారని పిటిషన్‌లో ఆరోపించారు.

తాను ప్రస్తావించిన అంశాలను ఏపీ హైకోర్టు పరిగణనలోకి తీసుకోకుండా ముందస్తు బెయిల్‌ ఇచ్చిందని శేషగిరిరావు పిటిషన్‌లో పేర్కొన్నారు. తీవ్ర ఘటనలైనా బెయిల్‌ మంజూరు చేయడం ఆందోళన కలిగిస్తోందని.. మాచర్ల నియోజకవర్గంలో ప్రతిపక్ష పార్టీకి చెందినవారు స్వేచ్ఛగా తిరిగే పరిస్థితి లేదన్నారు. ఇటు శేషగిరిరావు కోర్టులో మరో పిటిషన్‌ దాఖలు చేశారు. ఈ పిటిషన్లపై కోర్టు విచారణ స్వీకరిస్తుందా.. విచారణ ఎప్పుడు చేపడుతుంది అన్నది క్లారిటీ రావాల్సి ఉంది. ఎన్నికల కౌంటింగ్ జూన్ 4న ఉండటంతో.. సుప్రీం కోర్టులో పిటిషన్లు ఆసక్తిరేపుతున్నాయి.