ఏపీ ఎన్నికల ఫలితాలపై కోమటిరెడ్డి జోస్యం.. ఒక్క మాటలో తేల్చి చెప్పారు

ఆంధ్రప్రదేశ్ ఎన్నిక ఫలితాలు అందరిలో ఉత్కంఠరేపుతున్నాయి.. తెలంగాణతో పాటుగా పొరుగు రాష్ట్రాల్లో కూడా గెలుపెవరిది అనే చర్చ జరుగుతోంది. వైఎస్సార్‌సీపీ మళ్లి అధికారంలోకి వస్తుందా.. ఈసారి కూటమికి జనాలు పట్టం కట్టారా.. ఎక్కడ చూసినా ఇదే టాపిక్. ఇక బెట్టింగ్‌ల గురించి ప్రత్యేకంగా చెప్పనక్కర్లేదు.. పోటీపడి మరీ పందాలు కాస్తున్నారు. అయితే ఏపీ ఎన్నికల ఫలితాలపై తెలంగాణ ఎమ్మెల్యే కోమటిరెడ్డి రాజగోపాల్ రెడ్డి ఆసక్తికర వ్యాఖ్యలు చేశారు. తన పుట్టిన రోజు సందర్భంగా ఆయన తిరుమల శ్రీవారిని దర్శించుకున్నారు.. ఉదయం వీఐపీ బ్రేక్ దర్శన సమయంలో స్వామివారి సేవలో పాల్గొన్నారు. దర్శనం అనంతరం వేద పండితులు ఆశీర్వచనాలు అందించగా.. ఆలయ అధికారులు తీర్థ ప్రసాదాలు అందజేశారు.

తన పుట్టిన రోజు సందర్భంగా తిరుమల శ్రీవారిని దర్శించుకోవడం ఆనందగా ఉందన్నారు ఎమ్మెల్యే కోమటిరెడ్డి రాజగోపాల్ రెడ్డి. ఆంధ్రప్రదేశ్ ఎన్నికల్లో ప్రజల నాడి సస్పెన్స్‌గా ఉందని.. రెండోసారి వైఎస్సార్‌సీపీకి అధికారం ఇస్తారా.. ప్రభుత్వ మార్పు కోరుకుంటున్నారా అన్న అంశంపై ఉత్కంఠ కొనసాగుతుందన్నారు. ఏ సర్వేలోనూ ప్రజా నాడి బయటకు రాలేదన్నారు. అందుకే తాను కూడా ఆంధ్రప్రదేశ్ ఎన్నికల ఫలితాలపై తన అంచనానను చెప్పలేకపోతున్నానన్నారు.

తెలంగాణలో మాత్రం కాంగ్రెస్, బీజేపీ మధ్య మాత్రమే గట్టి పోటీ ఉంటుందన్నారు కోమటిరెడ్డి రాజగోపాల్ రెడ్డి. తెలంగాణలో కాంగ్రెస్, బీజేపీలు సమానంగా సీట్లు గెలుచుకునే అవకాశం ఉందని జోస్యం చెప్పారు. భువనగిరి కాంగ్రెస్ పార్టీ అభ్యర్థి కిరణ్ కచ్చితంగా గెలవబోతున్నారని.. భవిష్యత్‌ని నిర్ణయించే ఎన్నికలు కాబట్టి ప్రజలు మంచి తీర్పు ఇస్తారని చెప్పుకొచ్చారు. బీఆర్ఎస్ పార్టీ పాతాళంలోకి వెళ్లిపోయిందని.. కాంగ్రెస్ పార్టీ ఇచ్చిన హామీల మేరకు ప్రజలు తమవైపే ఉన్నారన్నారు. మెజార్టీ ఎంపీ స్థానాలు కాంగ్రెస్ కైవసం చేసుకుంటుందని ధీమాను వ్యక్తం చేశారు. ఇండియా కూటమి బలంగా పుంజుకుందని.. బీజేపీకి అంత ఈజీగా లేదన్నారు కోమటిరెడ్డి. దేశవ్యాప్తంగా చూస్తే.. మొదట్లో బీజేపీ హావా కొనసాగిందని.. ఆ తర్వాత ఉత్తరాదిన కాంగ్రెస్, ఇండియా కూటమి బాగా పుంజుకున్నట్లు చెప్పుకొచ్చారు రాజగోపాల్ రెడ్డి.