కూటమి రాకుంటే నాలుక కోసుకుంటా.. మరి నువ్వు?.. బుద్ధా వెంకన్న

2024 ఆంధ్రప్రదేశ్ అసెంబ్లీ ఎన్నికలకు సంబంధించి శనివారం సాయంత్రం వెల్లడైన ఎగ్జిట్ పోల్స్ ఫలితాలు.. రాజకీయ పార్టీలను గందరగోళంలో పడేశాయి. ఆత్మసాక్షి, ఆరా మస్తాన్, రేస్ వంటి ఏజెన్సీలు వైసీపీకి పట్టం కట్టగా.. రైజ్, పీపుల్స్ పల్స్, చాణక్య ఎక్స్‌ వంటి సర్వేలతో పాటుగా పలు జాతీయ సంస్థ సర్వేలు టీడీపీ కూటమికి అనుకూలంగా ఫలితాలను ప్రకటించాయి. అయితే తెలుగు రాష్ట్రాలలో ఆరా మస్తాన్ సర్వే పట్ల విశ్వసనీయత ఉంది. కచ్చితమైన ఫలితాలను అంచనా వేయగలరనే అభిప్రాయం ఉంది. అయితే ఆరా మస్తాన్ సర్వే అంచనాలు టీడీపీకి వ్యతిరేకంగా ఉండటంతో ఆ పార్టీ నేతలు మండిపడుతున్నారు. ఈ క్రమంలోనే టీడీపీ నేత బుద్ధా వెంకన్న ఆరా మస్తాన్‌ను ఓపెన్ ఛాలెంజ్ చేశారు.

గతంలో ఎన్నడూ లేని విధంగా ఏపీలో ఈసారి సర్వే ఫలితాల కోసం ఎదురుచూశారని బుద్ధా వెంకన్న అభిప్రాయపడ్డారు. అయితే ఆరా మస్తాన్ సర్వేలో వైసీపీ వస్తుందని జగన్ చెప్పించారని బుద్ధా వెంకన్న ఆరోపించారు. ఏపీలో కూటమి అధికారంలోకి రాకుంటే తాను నాలుక కోసుకుంటానని... కూటమి అధికారంలోకి వస్తే ఆరా మస్తాన్ నాలుక కోసుకుంటారా అంటూ సవాల్ చేశారు. అలాగే ఎన్నికలలో వైసీపీ ఓడిపోతే.. జీవితంలో అసెంబ్లీలోకి అడుగుపెట్టనని చెప్పే దమ్మూ, ధైర్యం వైఎస్ జగన్‌కు ఉన్నాయా అంటూ బుద్ధా వెంకన్న ప్రశ్నించారు,

" శనివారం వచ్చిన సర్వే్ల్లో ఎక్కువ భాగం కూటమికే అధికారం ఖాయమని చెప్పాయి. ఆరా మస్తాన్ సర్వే మాత్రం భిన్నంగా ఉంది. వైసీపీ క్యాడర్ ఇప్పటికే ఓటమి నైరాశ్యంలో ఉంది. వారిలో ఉత్సాహం నింపేందుకే ఆరా మస్తాన్ సర్వే ఇప్చించారు. ఇది ఫేక్ సర్వే అని వైసీపీ ముఖ్య నేతలు తెలుసు. బెట్టింగుల కోసం మైండ్ గేమ్ ఆడుతున్నారు. వైసీపీ కీలక నేతల అనుచరులు మాత్రం టీడీపీ గెలుస్తుందని పందేలు కాస్తున్నారు. ఆరా మస్తాన్ సర్వే నిజమని నమ్మి వైసీపీ అభిమానులు డబ్బులు పోగొట్టుకోవద్దు" అని బుద్ధా వెంకన్న సూచించారు.

 మరోవైపు ఏపీలో టీడీపీ వేవ్ కనిపిస్తోందన్న బుద్ధా వెంకన్న.. కూటమికి 130కి పైగా స్థానాలు వస్తాయన్నారు. చంద్రబాబు గతంలో చెప్పిన విధంగా సీఎంగానే అసెంబ్లీలో అడుగుపెట్టడం ఖాయమని ధీమా వ్యక్తం చేశారు. అబద్ధపు సర్వే చెప్పినందుకు కూటమి అధికారంలోకి రాగానే ఆరా మస్తాన్ ప్రజలకు బహిరంగ క్షమాపణ చెప్పాలని బుద్ధా వెంకన్న డిమాండ్ చేశారు. అబద్ధపు సర్వే ఎవరు చెప్పించారో చెప్పాలని.. లేదంటే ప్రజాగ్రహానికి గురికాక తప్పదన్నారు. వైసీపీ ఇచ్చిన నివేదికనే ఆరా మస్తాన్ చదివారన్న బుద్ధా వెంకన్న.. ఆయనతకు చిత్తశుద్ధి ఉంటే జూన్ 4 న సాయంత్రం వాస్తవాలు చెప్పాలన్నారు. జాతీయ సర్వేలన్నీ కూటమికే పట్టం కట్టాయన్న బుద్ధా వెంకన్న.. ఇక్కడే ఆరా మస్తాన్ సర్వే అబద్ధమని తేలిపోయిందని చెప్పారు.