వైద్యుల నిర్లక్ష్యంతో ఓ తల్లికి కడుపుకోత.. ఫ్లెక్సీలతో వినూత్నంగా నిరసన

క్రికెట్ ఆడుతుండగా పాము కాటుకు గురైన బాలుడ్ని.. తల్లిదండ్రులు ఆస్పత్రికి తీసుకెళ్తే వైద్యులు నిర్లక్ష్యంగా వ్యవహరించారు. ముల్లు గుచ్చుకుందని రెండు గంటల పాటు సమయం వృథాచేశారు. తీరా పరిస్థితి విషమించడంతో పెద్దాసుపత్రికి తీసుకెళ్లాలని చెప్పి చేతులు దులుపుకున్నారు. అయితే, పెద్దాసుపత్రికి తీసుకెళ్తుండగా.. మార్గమధ్యలో ఆ చిన్నారి ప్రాణాలు గాల్లో కలిసిపోయాయి. కన్నవారికి గుండెకోత మిగిల్చిన ఈ విషాదకర ఘటన.. శ్రీకాకుళం జిల్లా టెక్కలిలో చోటుచేసుకుంది. డాక్టర్లు నిర్లక్ష్యంతో తమ కుమారుడు చనిపోయాడని తల్లిదండ్రులు.. వినూత్న నిరసన తెలిపారు.

వివరాల్లోకి వెళ్తే.. మండలం రావివలస పంచాయతీ చిన్ననారాయణపురం గ్రామానికి చెందిన దాసరి మురళి, నిరోషాల కుమారుడు 12 ఏళ్ల సాయి వినీత్‌.. స్నేహితులతో కలిసి మే 21న క్రికెట్‌ ఆడుతుండగా పాము కాటు వేసింది. ఇంటికి వచ్చిన సాయి.. ఏదో కుట్టినట్లు అనిపించిందని తల్లిదండ్రులకు చెప్పాడు. తొలుత ముల్లు గుచ్చుకుందని భావించినా.. కొద్దిసేపటికే బాలుడు అస్వస్థతకు గురవడంతో తల్లిదండ్రులు ఆందోళనకు గురయ్యారు. వెంటనే చిన్నారిని టెక్కలి జిల్లా ఆసుపత్రికి తీసుకువెళ్లారు.

అయితే, అక్కడి డాక్టర్లు కూడా ముల్లు గుచ్చుకుందని చికిత్స చేయకుండా రెండు గంటల పాటు తాత్సారం చేశారు. సమయం వృథా చేయడంతో పరిస్థితి విషమించిందని మృతుడి తల్లిదండ్రులు ఆరోపించారు. చివరకు పరిస్థితి విషమించడంతో శ్రీకాకుళం ఆసుపత్రికి తీసుకువెళ్లాలని చెప్పారని వాపోయారు. అక్కడకు తీసుకువెళ్తుండగా సాయి వినీత్ మార్గమధ్యలో మృతిచెందాడు. కొడుకును పోగొట్టుకున్న ఆ తల్లిదండ్రులు బాధ వర్ణనాతీతం. తీవ్ర ఆవేదనకు గురైన కుటుంబ సభ్యులు వైద్య సిబ్బంది తీరుపై వినూత్న రీతిలో నిరసన తెలియజేశారు.

‘పాముకాటుకు, ముల్లుకు తేడా తెలియని వైద్య సిబ్బందికి శతకోటి వందనాలు’ అంటూ టెక్కలి జిల్లా ఆసుపత్రి సమీపంలోని ఓ జంక్షన్ వద్ద ఓ ఫ్లెక్సీని ఏర్పాటు చేశారు. నిర్లక్ష్యంగా వ్యవహరించి తమ కుమారుడి మరణానికి కారణమైన సిబ్బందిపై చర్యలు తీసుకోవాలని వైద్యశాఖ కమిషనర్‌ను వేడుకున్నారు. ‘మే 21న టెక్కలి జిల్లా ఆసుపత్రి వైద్య సిబ్బంది నిర్లక్ష్యం కారణం.. నిండుప్రాణాలను బలితీసుకుని, ఓ తల్లికి బిడ్డను దూరం చేసి కడుపుకోత మిగిల్చిన మీకు.. నా కొడుకుతో పాటు శ్రద్ధాంజిలి’ అని దాసరి మురళి, నిరోషాలు ఫ్లెక్సీ వేయించారు. ప్రస్తుతం ఇది చర్చనీయాంశంగా మారింది.