కశ్మీర్‌లో ఆర్మీ స్థావరంపై ఉగ్రదాడి.. ఒక ముష్కరుడు హతం.. కొనసాగుతోన్న భీకర కాల్పులు

జమ్మూ కశ్మీర్‌లో ముష్కర మూకల వరుస దాడులు ఆందోళనకు గురిచేస్తున్నాయి. గత మూడు రోజుల్లోనే మూడోసారి దాడికి తెగబడ్డారు. తాజాగా, మంగళవారం రాత్రి దోడా జిల్లాలో సైనిక స్థావరంపై దాడి చేశారు. ఈ ఘటనలో ఇద్దరు జవాన్లు గాయపడినట్టు అధికారులు తెలిపారు. ప్రస్తుతం ఆ ప్రాంతంలో సైన్యం, ఉగ్రవాదుల మధ్య భీకర కాల్పులు కొనసాగుతున్నాయి. దోడా జిల్లా ఛాతర్‌గలా ప్రాంతంలోని సైన్యం, జమ్మూ కశ్మీర్ పోలీసులు సంయుక్తంగా ఏర్పాటుచేసిన తాత్కాలిక చెక్‌ పాయింట్‌పై తీవ్రవాదులు దాడిచేసినట్టు పోలీసులు వెల్లడించారు. దాడిలో ఇద్దరు జవాన్లు గాయపడ్డారని, ప్రస్తుతం ఆ ప్రాంతంలో కాల్పులు కొనసాగుతున్నాయని తెలిపారు.

జమ్మూ జోన్ అదనపు డీజీపీ ఆనంద్ జైన్ మాట్లాడుతూ.. దోడాలోని ఛాతర్‌గలా ప్రాంతంలో పోలీస్, రాష్ట్రీయ రైఫిల్స్ సంయుక్త తాత్కాలిక స్థావరంపై మంగళవారం రాత్రి తీవ్రవాదులు దాడిచేశారని చెప్పారు. అప్రమత్తమైన భద్రతా బలగాలు ఎదురుకాల్పులు జరపడంతో ఆ ప్రాంతంలో ఎన్‌కౌంటర్ కొనసాగుతోందని పేర్కొన్నారు. ఓ ఉగ్రవాదిని సైన్యం మట్టుబెట్టిందని, ఉగ్రవాదుల ఏరివేతకు అదనపు బలగాలు అక్కడకు చేరుకున్నట్టు తెలిపారు.

ఆదివారం సాయంత్రం రియాసీ జిల్లాలో యాత్రికుల బస్సుపై ఉగ్రవాదులు కాల్పులకు పాల్పడ్డారు. ఈ ఘటనతో బస్సు లోయలోపడి 9 మంది ప్రాణాలు కోల్పోగా.. 41 మంది గాయపడ్డారు. లోయలో పడిపోయిన బస్సుపై అరగంట పాటు కొండ మీద నుంచి ఉగ్రవాదులు బుల్లెట్ల వర్షం కురిపించారు. ఈ ఘటనకు పాల్పడిన కొద్ది గంటల్లో సోమవారం కథువాలో దాడికి తెగబడ్డారు. ఈ దాడిలో ఒకరు ప్రాణాలు కోల్పోగా.. ఇద్దరు పౌరులు గాయపడ్డారు. అయితే, సైన్యం ఎదురుకాల్పుల్లో ఓ ముష్కరుడు హతమయ్యాడు. కథువాలోని హీరానగర్ సెక్టార్‌లో అంతర్జాతీయ సరిహద్దుకు సమీపాన ఉన్న సైదా సుఖుల్ గ్రామంపై ఉగ్రవాదులు దాడిచేసినట్టు కేంద్ర మంత్రి జితేంద్ర సింగ్ తెలిపారు.