ఆర్మీ కొత్త చీఫ్‌గా లెఫ్టినెంట్ జనరల్ ఉపేంద్ర ద్వివేది

ఆర్మీ కొత్త చీఫ్‌గా లెఫ్టినెంట్ జనరల్ ఉపేంద్ర ద్వివేదీ నియమితులయ్యారు. ప్రస్తుత సైన్యాధిపతి లెఫ్టినెంట్ జనరల్ మనోజ్ సి పాండే పదవీకాలం జూన్ 30తో ముగియనుంది. రెండేళ్ల కిందట 2022 ఏప్రిల్ 30 ఆర్మీ చీఫ్‌గా బాధ్యతలు చేపట్టిన పాండే పదవీకాలం మే 31తో ముగియగా.. లోక్‌సభ ఎన్నికల నేపథ్యంలో నెల రోజుల పాటు పొడిగించారు. దీంతో ఆర్మీకి కొత్త చీఫ్‌ ఎంపిక అనివార్యమైంది. సీనియార్టీ ఆధారంగా వైస్ చీఫ్‌గా ఉన్న లెఫ్టినెంట్ జనరల్ ద్వివేదీని కేంద్ర ప్రభుత్వం ఎంపిక చేసింది. 1964 జులై 1న జన్మించిన ఉపేంద్ర.. డిసెంబరు 15, 1984లో ఇండియన్ ఆర్మీకి చెందిన జమ్మూ-కశ్మీర్‌ రైఫిల్స్‌‌లో విధుల్లో చేరారు.

 తన 40 ఏళ్ల సర్వీసులో అనేక స్థాయిల్లో ఆయన బాధ్యతలు నిర్వహించారు. జమ్మూ కశ్మీర్ 18 రైఫిల్స్ రెజ్మింట్ కమాండ్ సహా అసోం రైఫిల్స్ బ్రిగేడ్, డీఐజీగా.. 9 కార్ప్స్ డీఐజీ ఆయన విధులు నిర్వర్తించినట్టు ప్రభుత్వం విడుదల చేసిన ప్రకటనలో వెల్లడించింది. ఆర్మీ వైస్ చీఫ్‌గా నియమితులు కావడానికి ముందు నార్తర్న్ కమాండ్‌కు డైరెక్టర్ జనరల్ ఇన్‌ఫాంట్రీ, జనరల్ ఆఫీసర్ కమాండింగ్ ఇన్ చీఫ్‌గా 2022 నుంచి 2024 వరకూ ఉన్నారు. ద్వివేదీకి సేవలకు గుర్తుగా పరమ విశిష్ట సేవా మెడల్, అతి విశిష్ట సేవా మెడల్‌లు వరించాయి. కొత్త సైన్యాధిపతిగా జూన్ 30న మధ్యాహ్నం జనరల్ ఉపేంద్ర ద్వివేదీ బాధ్యతలు చేపట్టనున్నారు.

మధ్యప్రదేశ్‌లోని రేవా సైనిక స్కూల్, నేషనల్ డిఫెన్స్ కాలేజీ, యూఎస్ ఆర్మీ వార్ కాలేజీతో పాటు డీఎస్ఎస్‌సీ వెల్లింగ్టన్, మౌ ఆర్మీ వార్ కాలేజీలో ఆయన విద్యాభ్యాసం సాగింది. కార్లిస్లేలోని US ఆర్మీ వార్ కాలేజీలో NDCకి సమానమైన కోర్సులో 'డిస్టింగ్విష్డ్ ఫెలో' పొందారు. స్ట్రాటజిక్ స్టడీస్ అండ్ మిలటరీ సైన్స్‌లో మాస్టర్స్ డిగ్రీ, డిఫెన్స్ అండ్ మేనేజ్‌మెంట్ స్టడీస్‌లో ఎంఫిల్ పూర్తిచేశారు. అంతేకాదు, మూడు జీఓసీ-ఇన్- సి కమాండేషన్ కార్డ్స్‌ను కూడా అందుకున్నారు.