వాలంటీర్ల విషయంలో ఏపీ ప్రభుత్వం కీలక ప్రకటన.. జులైలో పింఛన్ పంపిణీ ఎలాగంటే

ఆంధ్రప్రదేశ్‍లో వాలంటీర్ల భవిష్యత్తుపై అనిశ్చితి కొనసాగుతోంది. వాలంటీర్లను కొనసాగిస్తారా లేదా తొలగిస్తారా అనే దానిపై ప్రభుత్వం నుంచి క్లారిటీ రాలేదు. వాలంటీర్ వ్యవస్థ కొనసాగించే అవకాశాలు ఉన్నా.. ప్రస్తుతం ఉన్న వాలంటీర్ల పరిస్థితి ఏంటనేదీ స్పష్టత లేదు. ఏపీలో టీడీపీ ప్రభుత్వం ఏర్పాటైన తర్వాత తొలి కేబినెట్ భేటీ సోమవారం జరిగింది. అయితే ఈ భేటీలోనూ వాలంటీర్ల విషయంలో ఎలాంటి నిర్ణయం తీసుకోలేదు. మంత్రివర్గ సమావేశం అనంతరం మంత్రి పార్థసారథి విలేకర్ల సమావేశం నిర్వహించారు. మంత్రివర్గ భేటీలో ఆమోదం తెలిపిన విషయాలు, చర్చించిన అంశాల గురించి వివరించారు. ఇదే సమయంలో వాలంటీర్ల గురించి విలేకర్లు అడిగిన ప్రశ్నలకు మంత్రి సమాధానం ఇచ్చారు.

వాలంటీర్లను ఎలా ఉపయోగించుకోవాలనే దానిపై ప్రభుత్వం ఆలోచన చేస్తోందని మంత్రి కొలుసు పార్థసారథి తెలిపారు. అయితే జులై ఒకటి నుంచి పింఛన్ల పంపిణీ మాత్రం సచివాలయ సిబ్బంది చూస్తారని తెలిపారు. పింఛన్ల పంపిణీ బాధ్యతను సచివాలయ సిబ్బందికి అప్పగించినట్లు తెలిపారు. ఇక ఏపీ కేబినెట్ భేటీలో పింఛన్ల పెంపునకు ఆమోదం తెలిపారు. ఎన్టీఆర్ భరోసా పేరిట అందించే సామాజిక పింఛన్ల మొత్తాన్ని నెలకు రూ.3000 నుంచి రూ.4000 పెంచే ప్రతిపాదనలకు మంత్రివర్గం ఆమోదం తెలిపింది. ఈ పెంచిన పింఛన్ మొత్తాన్ని ఇంటి వద్దనే అందజేయనున్నారు.

 ఎన్నికల ప్రచారం సమయంలో తాము అధికారంలోకి వస్తే ఏప్రిల్ నెల నుంచి పెంచిన పింఛన్ అమలు చేస్తామని చంద్రబాబు హామీ ఇచ్చారు. ఈ నేపథ్యంలో ఈ మూడు నెలల బకాయిలు మూడువేలతో కలిపి మొత్తం రూ.7000లను ఇంటివద్దనే సచివాలయ సిబ్బంది పంపిణీ చేస్తారు. రాష్ట్రంలోని మొత్త 65 లక్షల మంది పింఛన్ దారులకు ఇంటివద్దనే పింఛన్ల పంపిణీ కార్యక్రమం జరగనుంది. ఇచ్చిన హామీ మేరకు దివ్యాంగుల పింఛన్ రూ.6,000, పూర్తి అంగవైకల్యం ఉన్నవారి పింఛన్ రూ.15000లకు పెంచారు.

మరోవైపు ఆంధ్రప్రదేశ్ మంత్రివర్గం సమావేశంలో గంజాయి నివారణకు ప్రత్యేక చర్యలు చేపట్టాలని నిర్ణయించారు. ఇందుకోసం హోం మంత్రి వంగలపూడి అనిత నేతృత్వంలో కేబినెట్ సబ్ కమిటీని ఏర్పాటు చేయాలని నిర్ణయించారు. హోం, రెవెన్యూ, ఆరోగ్య, గిరిజనమంత్రిత్వశాఖలతో కలిసి ఉపసంఘం ఏర్పాటు చేయనున్నారు. అలాగే రాజధాని అమరావతి, పోలవరం, మద్యం, విద్యుత్, పర్యావరణం, ఆర్థిక అంశాలపై శ్వేత పత్రం విడుదల చేయాలని ఏపీ కేబినెట్ నిర్ణయించింది.