పిన్నెల్లి బెయిల్‌ పిటిషన్‌పై జులై 18న తీర్పు

వైసీపీ సీనియర్ లీడర్, మాచర్ల మాజీ ఎమ్మెల్యే పిన్నెల్లి రామకృష్ణారెడ్డి బెయిల్ పిటిషన్‌ మీద తీర్పు వాయిదా పడింది. పిన్నెల్లి బెయిల్ పిటిషన్ మీద తీర్పును కోర్టు జులై 18వ తేదీకి వాయిదా వేసింది. ఏపీ అసెంబ్లీ ఎన్నికల పోలింగ్ సమయంలో పల్నాడు జిల్లా రెంటచింతల మండలం పాల్వాయిగేటు పోలింగ్‌ కేంద్రంలో టీడీపీ ఏజెంట్ మీద దాడి చేశారని పిన్నెల్లి మీద ఆరోపణలు ఉన్నాయి. అలాగే కారంపూడి సీఐ నారాయణస్వామిపై దాడి చేశారంటూ ఆయనను పోలీసులు అరెస్ట్ చేశారు. ఈ కేసుల్లో పిన్నెల్లి రామకృష్ణారెడ్డి నెల్లూరు జైలులో ప్రస్తుతం రిమాండ్ ఖైదీగా ఉన్నారు. ఈ నేపథ్యంలో ఈ రెండు కేసుల్లో బెయిల్ ఇవ్వాలంటూ పిన్నెళ్లి రామకృష్ణారెడ్డి గుంటూరు సెషన్స్ కోర్టును ఆశ్రయించగా.. కోర్టు తన తీర్పును జులై 18కి వాయిదా వేసింది.మరోవైపు బెయిల్ కోరుతూ పిన్నెల్లి రామకృష్ణారెడ్డి తొలుత మాచర్ల కోర్టులో బెయిల్ పిటిషన్ వేశారు. అయితే కోర్టు బెయిల్ ఇవ్వడానికి నిరాకరించింది. దీంతో పిన్నెల్లి ఏపీ గుంటూరు 4వ అదనపు జిల్లా సెషన్స్ కోర్టును ఆశ్రయించారు. టీడీపీ ఏజెంట్ మీద దాడి, సీఐపై దాడి కేసుల్లో తనకు బెయిల్ ఇవ్వాలంటూ బెయిల్ పిటిషన్ దాఖలు చేశారు.ఈ పిటిషన్ మీద బుధవారం విచారణ జరగ్గా.. పిన్నె్ల్లికి బెయిల్ మంజూరు చేయాలంటూ పిటిషనర్ తరుఫు న్యాయవాదులు వాదించారు. అయితే ఈ కేసులో మరికొంత మందిని అరెస్ట్ చేయాల్సి ఉందన్న ప్రభుత్వ తరుఫు న్యాయవాది.. పిన్నెల్లి నేరచరిత్రను దృష్టిలో పెట్టుకుని ఆయనకు బెయిల్ ఇవ్వవద్దంటూ వాదనలు వినిపించారు.

ఈ నేపథ్యంలో ఇరువురి వాదనలను పరిగణనలోకి తీసుకున్న న్యాయస్థానం.. తీర్పును జులై 18కి వాయిదా వేసింది. ఈ మేరకు న్యాయమూర్తి ఆదేశాలు జారీ చేశారు. మరోవైపు పిన్నెల్లి మీద ఈవీఎం ధ్వంసం కేస కూడా నమోదైంది. ఎన్నికల పోలింగ్ సమయంలో పోలింగ్ బూత్‌లోకి ప్రవేశించి పిన్నెల్లి ఈవీఎం ధ్వంసం చేసినట్లు సోషల్ మీడియాలో వీడియోలు వైరల్ అయ్యాయి. దీనిపై కేంద్ర ఎన్నికల సంఘం కూడా సీరియస్ అయ్యింది. అలాగే టీడీపీ ఏజెంట్ మీద దాడి, సీఐ మీద దాడి ఘటనలతో మాచర్ల మాజీ ఎమ్మెల్యే పిన్నెల్లి రామకృష్ణారెడ్డి రాష్ట్రవ్యాప్తంగా చర్చనీయాంశమయ్యారు.