ఏటా జూన్ 25 న "రాజ్యాంగ హత్య దినం".. ఆరోజు ఏం జరిగింది

కేంద్ర ప్రభుత్వం మరో కీలక నిర్ణయం తీసుకుంది. ఇప్పటినుంచి ప్రతీ ఏటా జూన్ 25వ తేదీని సంవిధాన్ హత్య దివస్ (రాజ్యాంగ హత్య దినం) గా పాటించనున్నట్లు ప్రకటించింది. దేశంలో 49 ఏళ్ల క్రితం విధించిన ఎమర్జెన్సీని గుర్తు చేసిన నరేంద్ర మోదీ సర్కార్.. ఈ నిర్ణయాన్ని తీసుకుంది. రాజ్యాంగాన్ని కాలరాసి.. అప్పటి ప్రధానమంత్రి ఇందిరాగాంధీ ఎమర్జెన్సీ విధించిన జూన్ 25 వ తేదీని ఇక నుంచి రాజ్యాంగ హత్య దినంగా పేర్కొంటూ.. శుక్రవారం కేంద్ర ప్రభుత్వం గెజిట్ నోటిఫికేషన్ విడుదల చేసింది. ఇక ఈ విషయాన్ని కేంద్ర హోం శాఖ మంత్రి అమిత్ షా.. ట్విటర్‌లో పేర్కొన్నారు.

1975 జూన్ 25వ తేదీన అప్పటి ప్రధాని ఇందిరా గాంధీ ఎమర్జెన్సీ విధించిన రోజును ఇకపై ఏటా సంవిధాన్‌ హత్యా దినంగా పాటించాలని కేంద్ర హోంమంత్రి అమిత్‌ షా శుక్రవారం ట్విటర్ వేదికగా ప్రకటించారు. జూన్ 25వ తేదీన సంవిధాన్‌ హత్యా దివస్‌గా కేంద్రం ప్రకటించిన విషయాన్ని అమిత్‌ వెల్లడించారు. మాజీ ప్రధాని ఇందిరాగాంధీ తన నియంతృత్వ పాలనతో దేశంలో ఎమర్జెన్సీ విధించి ప్రజాస్వామ్యం గొంతు నులిమేసిందని మండిపడ్డారు.

ఎలాంటి కారణం లేకుండా లక్షలాది మందిని జైల్లో పెట్టారని.. మీడియా గొంతును అణిచివేశారని పేర్కొన్నారు. ఆ చీకటి రోజులకు నిరసనగా సంవిధాన్‌ హత్య దివస్‌ను నిర్వహించాలని నిర్ణయించినట్లు తెలిపారు. ఎమర్జెన్సీ సమయంలో ప్రజలు అనుభవించిన వేదనను.. ఎమర్జెన్సీకి వ్యతిరేకంగా పోరాడిన యోధులను ఈ రాజ్యాంగ హత్య దినం రోజున గుర్తుచేసుకుందామని అమిత్ షా ట్వీట్ చేశారు.

ఎమర్జెన్సీ చీకటి రోజుల్లో లక్షలాది మందిని.. అప్పటి కాంగ్రెస్ ప్రభుత్వం జైలు గోడల మధ్యకు నెట్టిందని బీజేపీ తీవ్ర ఆరోపిస్తోంది. ఎమర్జెన్సీ రోజులకు నిరసనగా ఇక నుంచి రాజ్యాంగ హత్య దినంగా పాటించాలని కేంద్రం నిర్ణయించింది. ఇక 2014 లో అధికారంలోకి వచ్చినప్పటి నుంచి ప్రధానమంత్రి నరేంద్ర మోదీ సహా.. ఇతర బీజేపీ నేతలు అందరూ.. మాజీ ప్రధానమంత్రి ఇందిరాగాంధీ దేశంలో ఎమర్జెన్సీ విధించి చీకటి అధ్యాయానికి తెరలేపారని తరచూ కాంగ్రెస్‌ పార్టీపై తీవ్ర విమర్శలు చేస్తున్న విషయం తెలిసిందే.

దేశ రాజ్యాంగానికి ఏ మాత్రం విలువ ఇవ్వకుండా చేయని కాంగ్రెస్ పార్టీ ఇప్పుడు రాజ్యాంగం పట్ల ప్రేమను ప్రదర్శిస్తోందని.. ఎప్పటికప్పుడు కాంగ్రెస్ పార్టీ నేతలపై నిప్పులు చెరుగుతూనే ఉన్నారు. రాజ్యాంగానికి ఎన్నోసార్లు సవరణలు చేసిన కాంగ్రెస్‌ పార్టీ.. ఇప్పుడు తాము రాజ్యాంగాన్ని మార్చేస్తామని అసత్యాలు ప్రచారం చేస్తోందని బీజేపీ నేతలు విమర్శలు గుప్పిస్తున్నారు.