మీకంటే పిరికోళ్లు ఉంటారా,,,?,,,వైఎస్ షర్మిల, వైసీపీ మధ్య ట్వీట్ల వార్

ఏపీల్లో అన్నాచెల్లెలి మధ్య వార్ ముదురుతోంది. ఎన్నికలు పూర్తై.. ప్రభుత్వాలు మారినప్పటికీ.. ఏపీ కాంగ్రెస్ చీఫ్ వైఎస్ షర్మిల, వైసీపీ పార్టీల మధ్య పరస్పర విమర్శలు తగ్గడం లేదు. వైఎస్ జగన్ ఢిల్లీ ధర్నాపై షర్మిల విమర్శలు సంధించగా.. వైసీపీ నుంచి కూడా అదే రేంజులో కౌంటర్ వచ్చింది. తాజాగా ఆదివారం మరోసారి ఎక్స్ వేదికగా వైఎస్ జగన్ మీద, వైసీపీ మీద వైఎస్ షర్మిల విమర్శనాస్త్రాలు సంధించారు. వైఎస్ జగన్ ప్రతిపక్ష హోదా ఇస్తామంటేనే అసెంబ్లీలోకి అడుగుపెడతానని అనడం కంటే పిరికితనం, చేతకానితనం మరెక్కడా ఉండవంటూ వైఎస్ షర్మిల ట్వీ్ట్ చేశారు. దీనికి కౌంటరిచ్చింది వైసీపీ. పిరికితనం మీదా, వైఎస్ జగన్‌దా అంటూ షర్మిలపై ప్రశ్నల వర్షం కురిపిస్తూ ట్వీట్ చేసింది.

 "చంద్రబాబు ఏజెంటుగా రాజకీయాలు చేసేవారికి. ప్రజల తరఫున ప్రతి క్షణం ఆలోచించి వారికోసం పనిచేసేవారికీ మధ్య తేడా ఉంటుంది షర్మిల గారూ.. మీ మాటలు చూస్తే జగన్‌ మీద ద్వేషమే కనిపిస్తోంది తప్ప, ప్రజా సమస్యలు ఎక్కడా కనిపించడం లేదు. ప్రతిపక్షంలో ఉండి, మరో ప్రతిపక్షాన్ని తిడుతున్నారంటే.. మీ అజెండా చంద్రబాబుకు మద్దతు పలకడం, వైఎస్ జగన్‌ను తిట్టడం. దివంగత మహానేత, మీ తండ్రి వైఎస్ఆర్ విగ్రహాలను కాల్చేస్తుంటే.. ఎప్పుడైనా నోరు విప్పారా.. రాష్ట్రంలో టీడీపీ శ్రేణులు హత్యలు, దాడులు, ఆస్తుల విధ్వంసం చేస్తుంటే ఒక్కమాటైనా మాట్లాడారా?" అంటూ వైఎస్ షర్మిలను వైసీపీ ప్రశ్నించింది.

వైఎస్ఆర్ మరణాన్ని అవహేళన చేసిన వారితో మీరు కలిసి నడవడం లేదా.. తెలంగాణలో పుట్టా.. తెలంగాణలోనే ఉంటా అంటూ మాటలు చెప్పి అక్కడ నుంచి పారిపోయి ఇక్కడకు రాలేదా అంటూ వైసీపీ ప్రశ్నించింది. మీకన్నా.. పిరికివాళ్లు, స్థిరత్వం లేనివాళ్లు, అహంకారులు, స్వార్థపరులు ఎవరైనా ఉంటారా.. ఇంతకీ మీరు పోస్టుచేసిన ట్వీట్‌ చంద్రబాబు దగ్గరనుంచి వచ్చిందా.. లేదా ఆయన ఏజెంట్ నుంచి వచ్చిందా అంటూ వైఎస్ షర్మిలను వైసీపీ ప్రశ్నించింది.

మరోవైపు అంతకుముందు వైఎస్ జగన్‌ను ఉద్దేశించి వైఎస్ షర్మిల ఘాటు వ్యాఖ్యలు చేస్తూ ట్వీట్ చేశారు. ప్రతిపక్ష హోదా ఇస్తామంటేనే అసెంబ్లీకి వస్తామనడం వైఎస్ జగన్ అజ్ఞానానికి నిదర్శనమని విమర్శించారు. ఇంతకు మించిన పిరికితనం, అహంకారం ఎక్కడా కనపడవంటూనే.. అసెంబ్లీకి పంపిన ప్రజలను ఇలా మోసం చేయడం మీకే చెల్లిందంటూ ట్వీట్ చేశారు. ఎమ్మెల్యే అంటే మెంబర్ ఆఫ్ లెజిస్లేటివ్ అసెంబ్లీ అని.. మెంబర్ ఆఫ్ మీడియా అసెంబ్లీ కాదని ఎద్దేవా చేశారు.ఎమ్మెల్యేగా గెలిచింది చట్టసభల్లో ప్రజల గొంతుక అవ్వడానికా, లేక మీడియా ముందు సొంత డబ్బా కొట్టుకోవడానికా అంటూ ప్రశ్నించారు. అసెంబ్లీకి వెళ్లకపోతే వైఎస్ జగన్ సహా ఆ పార్టీ ఎమ్మెల్యేలు అందరూ రాజీనామా చేయాలని షర్మిల డిమాండ్ చేశారు.