మల్లన్న దర్శనానికి పోటెత్తిన భక్తులు.. నారా భువనేశ్వరి ఏం చేశారంటే

ఆంధ్రప్రదేశ్ ముఖ్యమంత్రి నారా చంద్రబాబు నాయుడు సతీమణి నారా భువనేశ్వరి శనివారం శ్రీశైలం పుణ్యక్షేత్రాన్ని సందర్శించారు. శ్రీశైలం భ్రమరాంబికా మల్లికార్జునస్వామికి ప్రత్యేక పూజలు నిర్వహించారు. ఆలయానికి వచ్చిన భువనేశ్వరికి ఈవో పెద్దిరాజు, అర్చకులు ఆలయ మర్యాదలతో ఘనంగా స్వాగతం పలికారు. అనంతరం స్వామివారికి రుద్రాభిషేకం, అమ్మవారికి కుంకుమార్చన పూజలు చేశారు. ఆ తర్వాత వేదాశీర్వాదం పలికి తీర్థప్రసాదాలను అందజేశారు. ఇక దర్శనం అనంతరం నారా భువనేశ్వరితో ఫోటోలు దిగేందుకు పలువురు భక్తులు ఆసక్తి చూపారు. అయితే శ్రీశైలంలో భక్తుల రద్దీ అధికంగా ఉండటంతో మిగతా భక్తులకు ఇబ్బంది కలగకూడదనే ఉద్దేశంతో నారా భువనేశ్వరి ఫోటోలు దిగకుండా త్వరగా అక్కడి నుంచి వెళ్లిపోయారు.

మరోవైపు తన కోసం భక్తులను ఎవరినీ ఇబ్బంది పెట్టవద్దని నారా భువనేశ్వరి శ్రీశైలం పర్యటనకు ముందు అధికారులకు సూచించారు. భక్తుల రద్దీని దృష్టిలో ఉంచుకుని వారిని ఇబ్బంది పెట్టవద్దని సూచించారు. తాను ఆలయానికి వస్తున్నట్లు ఎక్కువగా హడావిడి, హంగామా చేయవద్దంటూ భువనేశ్వరి శ్రీశైలం ఆలయ అధికారులకు తెలిపారు. అనంతరం దర్శనానికి వచ్చిన భువనేశ్వరి త్వరగా దర్శనం చేసుకుని అక్కడి నుంచి వెళ్లిపోయారు. మరోవైపు ఇటీవలే సీఎం చంద్రబాబు నాయుడు కూడా శ్రీశైలం మల్లన్నను దర్శించుకున్నారు. అనంతరం శ్రీశైలం ప్రాజెక్టు వద్ద కృష్ణమ్మకు జలహారతి సమర్పించారు.

మరోవైపు వారాంతం కావటం, శ్రీశైలం డ్యాం పది గేట్లు తెరవడంతో శ్రీశైలానికి భక్తుల రద్దీ పెరిగింది. రెండు తెలుగు రాష్ట్రాల నుంచి సందర్శకులు పెద్ద ఎత్తున తరలి వస్తున్నారు. శ్రీశైలం మల్లన్న దర్శనం చేసుకుని.. ఆ తర్వాత కృష్ణమ్మ పరవళ్లను ఎంజాయ్ చేస్తున్నారు. పర్యాటకుల రద్దీతో శ్రీశైలం జలాశయం మార్గాల్లో వాహనాలు బారులు తీరాయి. దీంతో ట్రాఫిక్‌ జామ్‌ ఏర్పడింది. మరోవైపు ఎగువ ప్రాంతాల నుంచి వరద ప్రవాహం కొనసాగుతూ ఉండటంతో.. శ్రీశైలం డ్యాం పదిగేట్లు తెరిచి నీటిని దిగువకు విడుదల చేస్తున్నారు. పది క్రస్ట్‌ గేట్ల ద్వారా 4,64,740 క్యూసెక్కుల నీటిని నాగార్జున సాగర్‌కు విడుదల చేస్తున్నారు.