కాంగ్రెస్ పార్టీలోకి బిగ్ బాస్ సెలబ్రిటీ

ఏపీ కాంగ్రెస్ చీఫ్ వైఎస్ షర్మిల నేతృత్వంలో బిగ్ బాస్ సెలబ్రిటీ నూతన్ నాయుడు కాంగ్రెస్ పార్టీలో జాయిన్ అయ్యారు. నూతన్ నాయుడికి కండువా కప్పి వైఎస్ షర్మిల కాంగ్రెస్ పార్టీలోకి ఆహ్వానించారు. బిగ్ బాస్ తెలుగు రెండో సీజన్ ద్వారా నూతన్ నాయుడు ఫేమస్ అయ్యారు. ఆ తర్వాత పలు వివాదాల్లోనూ చిక్కుకున్నారు. అయితే ప్రజా సేవ చేయాలనే ఉద్దేశంతో షర్మిల సమక్షంలో హస్తం పార్టీలోకి నూతన్ నాయుడు చేరారు. నూతన నాయుడు సినిమాల్లో నటించడంతో పాటుగా నిర్మాతగానూ వ్యవహరించారు. అయితే బిగ్ బాస్ సీజన్ ద్వారా.. తెలుగు ప్రేక్షకులకు నూతన్ నాయుడు బాగా పరిచయమయ్యారు. అయితే నూతన్ నాయుడు ఇంతకుముందు ప్రజారాజ్యం పార్టీలోనూ పనిచేశారు. 2009 ఎన్నికల సమయంలో చిరంజీవి ప్రజారాజ్యం పార్టీ తరుఫున పనిచేశారు.

బిగ్ బాస్ సీజన్ తర్వాత తన ఇంట్లో పనిచేసే దళిత యువకుడికి శిరోముండనం చేయించినట్లు నూతన్ నాయుడిపై ఆరోపణలు వ్యక్తమయ్యాయి. ఈ కేసులో నూతన్ నాయుడు అరెస్ట్ అయ్యి కొన్ని రోజులు జైళ్లో ఉన్నారు. ఆ తర్వాత కోర్టు బెయిల్ మంజూరు చేయటంతో బయటకు వచ్చారు. ఆ తర్వాత గత కొంతకాలంగా వార్తల్లో లేని నూతన్ నాయుడు.. ఇప్పుడు కాంగ్రెస్ పార్టీలో చేరి మరోసారి వార్తల్లో నిలిచారు.

ఇక ఏపీ కాంగ్రెస్ విషయానికి వస్తే.. 2024 ఏపీ అసెంబ్లీ ఎన్నికల్లో కాంగ్రెస్ పార్టీ జీరోకే పరిమితమైంది. వామపక్షాలతో కలిసి బరిలోకి దిగిన కాంగ్రెస్ పార్టీ.. పోటీ చేసిన అన్నిచోట్లా ఓటమి పాలైంది. ఏపీ కాంగ్రెస్ చీఫ్ వైఎస్ షర్మిల కూడా కడప ఎంపీగా పోటీ చేసి ఓడిపోయారు. కడప లోక్ సభ ఎన్నికల్లో వైఎస్ అవినాష్ రెడ్డి విజయం సాధించగా.. షర్మిల మూడో స్థానంలో నిలిచారు. అయితే ఎన్నికలకు ముందు వైసీపీ అసంతృప్త నేతలను పార్టీలోకి చేర్చుకుని షర్మిల కాంగ్రెస్ పార్టీకి జవసత్వాలు చేకూర్చడానికి ప్రయత్నించారు. ఎన్నికల్లో ఓడిపోయినప్పటికీ.. వచ్చే ఎన్నికల నాటికి కాంగ్రెస్ పార్టీ ఉనికి చాటేలా చేసేందుకు షర్మిల ప్రయత్నిస్తున్నారు. ఈ క్రమంలోనే పార్టీలోకి వచ్చే నేతలను ఆహ్వానిస్తున్నారు. ఈ క్రమంలోనే బిగ్ బాస్ ఫేమ్ నూతన్ నాయుడు కాంగ్రెస్ పార్టీలో చేరారు.