అర్ధరాత్రి వేళ.. కారులో. . సీసీ కెమెరా పట్టేసిందిగా!
Andhra Pradesh Telugu | Suryaa Desk | Published : Mon, Aug 05, 2024, 08:05 PM
అర్ధరాత్రి వేళ కారులో రయ్ మంటూ తిరుగుతూ ,,,జాతీయ రహదారిపై చక్కర్లు కొడుతుంటారు. అలాగని వీరంతా పనిలేని పోకిరీలు అనుకుంటే పొరబాటే. వీళ్ల పని వేరే ఉంది. ప్రపంచమంతా పడుకున్న సమయంలో వీరు నిద్రలేస్తారు. మూడో కంటికి తెలియకుండా కారులో తిరుగుతూ తమ పని కానిచ్చేస్తుంటారు. ఇన్నిరోజులూ వీరి యవ్వారం సవ్యంగానే సాగింది. కానీ అనుకోకుండా సీసీటీవీ కెమెరా ద్వారా వీరి బండారం మొత్తం బయటపడింది. దీంతో పోలీసులు వీరిని గుర్తించే పనిలో పడ్డారు.
పల్నాడు జిల్లా రొంపిచర్లలో డీజిల్ చోరీ ముఠా హల్‌చల్ చేస్తోంది. గుర్తు తెలియని వ్యక్తులు కారులో వచ్చి లారీల్లో ఉన్న డీజిల్ చోరీ చేస్తున్న వైనం తాజాగా వెలుగుచూసింది. అద్దంకి- నార్కట్‌పల్లి హైవేపై పెట్రోల్ బంక్ వద్ద అర్ధరాత్రి వేళ ఓ ముఠా డీజిల్ దొంగిలిస్తున్న సంగతి తాజాగా బయటపడింది. లారీ డ్రైవర్లు నిద్రపోతున్న సమయంలో దొంగల ముఠా డీజిల్ చోరీ చేస్తున్న దృశ్యాలు పెట్రోల్ బంక్ వద్ద ఏర్పాటు చేసిన సీసీటీవీ కెమెరాలో రికార్డయ్యాయి.
దీనిపై లారీ డ్రైవర్లు ఆందోళన వ్యక్తం చేస్తున్నారు. ఈ దొంగల ముఠా పనిపట్టాలని పోలీసులను కోరుతున్నారు. రోడ్డు పక్కన లారీ ఆపి విశ్రాంతి తీసుకుంటూ ఉంటే.. లారీల్లోని డీజిల్ చోరీ చేస్తున్నారని.. ఇలా అయితే తాము బతికేది ఎలాగంటూ ఆవేదన వ్యక్తం చేస్తున్నారు. మరోవైపు సీసీ ఫుటేజీ ఆధారంగా చోరీ చేస్తున్న ముఠాను కనిపెట్టే పనిలో పోలీసులు ఉన్నారు. కారు నంబర్ గుర్తించి దాని ఆధారంగా నిందితులను గుర్తించాలని భావిస్తున్నారు.
|
|