మరికొన్నిరోజులు తీహార్ జైలులోనే ఢిల్లీ సీఎం కేజ్రీవాల్‌

ఢిల్లీ మద్యం పాలసీ కేసులో ఇప్పటివరకు ఢిల్లీ ముఖ్యమంత్రి, ఆమ్ ఆద్మీ పార్టీ నేషనల్ కన్వీనర్ అరవింద్ కేజ్రీవాల్‌తోపాటు.. మాజీ మంత్రులు సత్యేందర్ జైన్, మనీష్ సిసోడియాలు తీహార్ జైలులోనే ఏళ్ల తరబడి ఉంటున్నారు. ఈ క్రమంలోనే కొన్ని నెలల క్రితం అరవింద్ కేజ్రీవాల్ కూడా తీహార్ జైలుకు వెళ్లగా.. వీరికి బెయిల్ మాత్రం లభించడం లేదు. ఈడీ కేసులో బెయిల్ లభించినా.. సీబీఐ కేసులో మాత్రం అరవింద్ కేజ్రీవాల్‌కు చుక్కెదురైంది. ఇప్పటికే ఈడీ దాఖలు చేసిన కేసులో సుప్రీంకోర్టు బెయిల్ మంజూరు చేయగా.. సీబీఐ దాఖలు చేసిన కేసులో తాజాగా ఢిల్లీ హైకోర్టు అరవింద్ కేజ్రీవాల్‌కు షాక్ ఇచ్చింది. సీబీఐ అరెస్ట్ చేయడాన్ని సమర్థించిన ఢిల్లీ హైకోర్టు.. కేజ్రీవాల్ పిటిషన్‌ను కొట్టివేసింది.

ఢిల్లీ మద్యం కేసులో అక్రమాలపై.. కేజ్రీవాల్‌ను సీబీఐ అరెస్టును చేయడాన్ని ఢిల్లీ హైకోర్టు సమర్థించింది. ఈ కేసులో తనను సీబీఐ అరెస్ట్‌ చేయడాన్ని సవాల్ చేస్తూ కేజ్రీవాల్‌.. ఢిల్లీ హైకోర్టులో పిటిషన్‌ దాఖలు చేయగా.. తాజాగా విచారణ కోర్టు జరిపింది. సరైన కారణాలు లేకుండా సీబీఐ అరెస్ట్‌ చేసిందని చెప్పడానికి ఎలాంటి ఆధారాలు లేవని గుర్తించిన జస్టిస్‌ నీనా బన్సల్ కృష్ణ నేతృత్వంలోని ధర్మాసనం.. ఆ పిటిషన్‌ను కొట్టి వేసింది. దీంతో తనకు బెయిల్‌ మంజూరు చేయాలని కేజ్రీవాల్ చేసుకున్న దరఖాస్తును కూడా ఢిల్లీ హైకోర్టు కొట్టి వేసింది. అయితే బెయిల్‌ కోసం ట్రయల్‌ కోర్టుకు వెళ్లి దరఖాస్తు చేసుకోవాలని కేజ్రీవాల్‌కు ఢిల్లీ హైకోర్టు సూచించింది.

ఢిల్లీ మద్యం విధానం కేసులో మనీలాండరింగ్‌ ఆరోపణలపై మొదట అరవింద్ కేజ్రీవాల్‌ను ఈ ఏడాది మార్చి 21 వ తేదీన ఎన్‌ఫోర్స్‌మెంట్ డైరెక్టరేట్ అరెస్ట్‌ చేసింది. ఈ కేసులో సుప్రీంకోర్టును కేజ్రీవాల్ ఆశ్రయించగా.. కోర్టు బెయిల్ మంజూరు చేసింది. ఆలోపే సీబీఐ రంగంలోకి దిగి.. కేసు నమోదుచేసి.. తీహార్ జైలులో ఉన్న కేజ్రీవాల్‌ను తమ కస్టడీలోకి తీసుకుంది. ఈ క్రమంలోనే ఈడీ కేసులో కేజ్రీవాల్‌కు ఇప్పటికే బెయిల్ మంజూరు అయింది.

అయితే సీబీఐ నమోదు చేసిన కేసులో బెయిల్ కోసం కేజ్రీవాల్‌.. ఢిల్లీ హైకోర్టును ఆశ్రయించగా తాజాగా ఆ పిటిషన్ కొట్టివేయడంతో జైలులోనే ఉండనున్నారు. అయితే ఈడీ కేసులో జులై 12 వ తేదీన సుప్రీంకోర్టు మధ్యంతర బెయిల్‌ మంజూరు చేసినప్పటికీ.. సీబీఐ కేసులో బెయిల్ రాకపోవడంతో అప్పటి నుంచి కేజ్రీవాల్ జైల్లోనే ఉన్నారు.