హృదయాన్ని కదిలిస్తోన్న వయనాడ్ చిన్నారి లేఖ

వయనాడ్‌లో ప్రకృతి విలయంలో ఇప్పటి వరకూ మృతుల సంఖ్య 369 దాటింది. ఇంకా రెస్క్యూ ఆపరేషన్ కొనసాగుతోంది. విపత్తు సమయంలో సైన్యం, ఎన్డీఆర్ఎఫ్, అటవీ శాఖ అధికారులు స్పందించిన తీరుపై సర్వత్రా ప్రశంసలు కురుస్తున్నాయి. తమ ప్రాణాలను సైతం లెక్కచేయకుండా మట్టి దిబ్బల్లో, కొండ చరియల్లో చిక్కుకుపోయిన బాధితులను కాపాడుతున్నారు. దేశంపై వారికి ఉన్న ప్రేమ, విధి నిర్వహణలో నిబద్ధతను చూసి చలించిపోయిన ఓ ఎనిమిదేళ్ల చిన్నారి సైన్యానికి లేఖ రాసింది. హృదయాన్ని కదలించే ఈ లేఖకు ఆర్మీ స్పందించడంతో ప్రస్తుతం సోషల్‌ మీడియాలో వైరల్‌గా మారింది.

 వయనాడ్‌కు చెందిన రాయన్ అనే 3వ తరగతి విద్యార్థి భారత సైన్యానికి లేఖ రాస్తూ ‘డియర్ ఇండియన్‌ ఆర్మీ.. నేను పుట్టిన వయనాడ్‌లో ప్రకృతి విధ్వంసం సృష్టించింది.. కొండచరియలు విరిగిపడి శిథిలాల కింద చిక్కుకున్న ఎంతో మందిని మీరు ప్రాణాలకు తెగించి రక్షించడం చూశా.. ఆహారం లేకపోయినా బిస్కెట్లతోనే కడుపు నింపుకుంటూ బాధితులను కాపాడటానికి మీరు వంతెన నిర్మిస్తున్న వీడియోను నేను చూశాను... ప్రజల ప్రాణాల కోసం మీరు చేస్తున్న సాహసం చూస్తుంటే నాకు గర్వంగా ఉంది. నేను ఏదో ఒక రోజు సైన్యంలో చేరి మీలాగా దేశాన్ని రక్షిస్తా’ అని రాసుకొచ్చాడు.

స్థానిక ఏఎంపీఎల్ పాఠశాలలో చదువుతున్న రాయన్ రాసిన లేఖను అందుకున్న ఆర్మీ అధికారులు సంతోషం వ్యక్తం చేశారు. ఇటువంటి వారు ఇచ్చే ప్రేరణవల్ల తాము దేశం కోసం మరింత కష్టపడి పని చేయాలనే ఇష్టం పెరుగుతుంది.. యువ యోధుడికి ధన్యవాదాలు’ అని సమాధానం ఇచ్చారు. ఆ చిన్నారి లేఖను సోషల్‌ మీడియాలో షేర్ చేశారు.

‘లేఖలోని నీ మాటలు మాహృదయాన్ని తాకాయి.. ప్రతికూల సమయాల్లో ఆత్మవిశ్వాసం కోల్పోరాదనే లక్ష్యంతో ఉన్నాం.. మీ లేఖ ఈ లక్ష్యాన్ని పునరుద్ఘాటిస్తుంది.. మీలాంటి హీరోలు మా వంతు సాయం చేయడానికి మాకు స్ఫూర్తినిస్తున్నారు.. మీరు యూనిఫాం ధరించి మాతో పాటు నిలబడే రోజు కోసం మేము ఆసక్తిగా ఎదురుచూస్తున్నాం.. అందరం కలిసి మన దేశం గర్వపడేలా చేస్తాం. యువ యోధుడా, మీ ధైర్యం, స్ఫూర్తికి ధన్యవాదాలు’ అని ఇండియన్ ఆర్మీ సదరన్ కమాండ్ ట్వీట్ చేసింది.

వయనాడ్‌లో కొండచరియలు విరిగిపడి ముండక్కి, చురోల్‌మలలో భూస్థాపితమయ్యాయి. వంతెనలు కొట్టుకుపోవడంతో ఆర్మీ యుద్ద ప్రాతిపదికన తాత్కాలిక నిర్మాణాలు చేపడుతున్న వీడియో సోషల్ మీడియాలో వైరల్ అవుతున్నాయి. ఇండియన్ ఆర్మీ మద్రాస్ ఇంజినీరింగ్ విభాగం 190 అడుగుల పొడవైన వంతెనను 24 గంటల్లోపే నిర్మించింది. బుధవారం రాత్రి 9.30 గంటలకు నిర్మాణం చేపట్టి.. మర్నాడు గురువారం సాయంత్రం 5.30 గంటలకు పూర్తిచేసింది.