రక్షణ రంగంపై మోదీ కీలక వ్యాఖ్యలు.. భారీగా లాభపడిన 5 స్టాక్స్ ఇవే!

రక్షణ రంగానికి చెందిన పలు కంపెనీల స్టాక్స్ గత ఏడాది కాలంలో మంచి పనితీరు కనబరుస్తున్నాయి. దేశీయంగా రక్షణ ఉత్పత్తుల తయారీకి కేంద్రం ప్రోత్యాహం కల్పిస్తున్న నేపథ్యంలో ఈ సెక్టార్ స్టాక్స్ భారీ లాభాలు నమోదు చేస్తున్నాయి. అలాగే స్వాతంత్య్ర దినోత్సవ సందర్భంగా ఎర్రకోటపై జెండా ఎగరవేసిన ప్రధాన మంత్రి నరేంద్ర మోదీ.. దేశ ప్రజలను ఉద్దేశించి మాట్లాడుతూ డిఫెన్స్ ప్రొడక్షన్‌పై కీలక వ్యాఖ్యలు చేశారు. భారత్ స్వయం సమృద్ధి సాధించేలా మేక్ ఇండియా కీలమని తెలిపారు. వికసిత్ భారత్- 2047 లక్ష్యాలను చేరుకునేందుకు రక్షణ ఉత్పత్తుల ఎగుమతులకు భారత్ కేంద్ర బిందువుగా మారాల్సిన అవసరం ఉందని ప్రధాని మోదీ ఆకాక్షించారు.

భారత రక్షణ రంగ ఉత్పత్తుల తయారీ 2023-24 లో చూసుకుంటే మంచి వృద్ధి నమోదు చేసింది. వీటి విలువ రూ. 1,26,887 కోట్లకు చేరింది. ఇంతకుముందు ఏడాదితో పోల్చితే 16.8 శాతం పెరగడం గమనార్హం. ఇటీవలే ప్రవేశపెట్టిన బడ్జెట్‌లో రక్షణ రంగానికి రూ. 6.21 లక్షల కోట్లు కేటాయించింది కేంద్రం. ఈ క్రమంలో హిందుస్తాన్ ఏరోనాటిక్స్ లిమిటెడ్, భారత్ డైనమిక్స్ లిమిటెడ్, భారత్ ఎలక్ట్రానిక్స్ లిమిటెడ్, ఆస్ట్రా మైక్రోవేవ్ ప్రొడక్ట్స్, సోలార్ ఇండస్ట్రీస్ కంపెనీల షేర్లు దూసుకెళ్లే అవకాశం ఉందని ఐసీఐసీఐ సెక్యూరీటిస్ పేర్కొంది. రక్షణ రంగంలోని వివిధ కంపెనీల స్టాక్స్‌కి బై రేటింగ్ ఇచ్చింది. దీంతో ఆయా కంపెనీల షేర్లు ఇవాళ ఆగస్టు 16, 2024 రోజున స్టాక్ మార్కెట్ ట్రేడింగ్‌లో లాభాల్లో ట్రేడింగ్ అయ్యాయి.

హిందుస్తాన్ ఏరోనాటిక్స్ లిమిటెట్- హాల్ షేరు ఇవాళ 2.07 శాతం లాభంతో రూ. 4,758 వద్ద ముగిసింది. ఒక దశలో రూ. 4794 దాటి ట్రేడింగ్ అయింది.

ఇక భారత్ డైనమిక్స్ కంపెనీ షేరు ఇవాళ ఇంట్రాడే ట్రేడింగ్‌లో రూ.1340 స్థాయిని తాకింది. మార్కెట్లు ముగిసే నాటికి 0.36 శాతం లాభంతో రూ. 1322.50 వద్ద స్థిరపడింది.

భారత్ ఎలక్ట్రానిక్స్ లిమిటెడ్ స్టాక్ ఇవాళ మార్కెట్లు ముగిసే నాటికి 3.35 శాతం లాభంతో రూ. 303.55 వద్ద స్థిరపడింది.

సోలార్ ఇండస్ట్రీస్ ఇండియా షేరు ఇవాళ 3.22 శాతం లాభంతో రూ. 10,490 వద్ద ముగిసింది.

ఆస్ట్రా మైక్రోవేవ్ ప్రొడక్ట్స్ కంపెనీ స్టాక్ 6.05 శాతం లాభపడి రూ. 880 వద్ద ముగిసింది.