వయనాడ్ వరద బాధితులకు అందిన సాయంలో ఈఎంఐ కట్ చేసుకున్న బ్యాంక్

అసలే కొండ చరియలు విరిగిపడి ఇళ్లు, ఆస్తులు, ఊర్లే కొట్టుకుపోయి.. తీవ్ర విషాదంలో మునిగిపోయిన కేరళలోని వయనాడ్ జిల్లా వాసులకు ప్రభుత్వంతోపాటు ఎంతో మంది సెలబ్రిటీలు అండగా నిలిచారు. తమకు వీలైనంత సాయాన్ని సీఎం సహాయనిధికి అందించారు. ఈ క్రమంలోనే ప్రభుత్వం కూడా ప్రకృతి విపత్తు ధాటికి సర్వస్వం కోల్పోయిన వారిని ఆదుకునేందుకు వారికి కొంత మొత్తాన్ని అందించింది. అయితే ప్రభుత్వం వారికి ఇచ్చిన వరద సహాయంలో నుంచి కేరళ గ్రామీణ బ్యాంకు.. ఈ నెల ఈఎంఐ కట్ చేసింది. ఇప్పుడు ఈ ఘటనే తీవ్ర దుమారం రేపుతోంది. అసలే ఆపదలో ఉన్న వారి పట్ల కేరళ గ్రామీణ బ్యాంకు ఇలా ప్రవర్తించడంపై తీవ్ర విమర్శలు వెల్లువెత్తుతున్నాయి.

వయనాడ్‌ బాధితులకు పినరయి విజయన్ నేతృత్వంలోని కేరళ రాష్ట్ర ప్రభుత్వం ఇటీవల అత్యవసర సాయం కింద రూ.10 వేలు అందించింది. ఈ సొమ్మును సర్కార్ నేరుగా బాధితుల కుటుంబ సభ్యుల బ్యాంకు అకౌంట్లలో జమ చేసింది. అయితే ఈ డబ్బు నుంచే కేరళ గ్రామీణ బ్యాంకు ఈనెల ఈఎంఐలను కట్‌ చేసుకోవడంతో ఇప్పుడు తీవ్ర స్థాయిలో విమర్శలు వెల్లువెత్తుతున్నాయి. ఈ వ్యవహారంపై కేరళ ముఖ్యమంత్రి పినరయి విజయన్‌ స్పందించారు. వయనాడ్‌ వరదల బాధితుల రుణాలను రైటాఫ్‌ చేయాలని వివిధ బ్యాంకులకు ఆయన విజ్ఞప్తి చేశారు. కొందరి రుణాలను రైటాఫ్ చేయడం వల్ల బ్యాంకులపై పెద్ద భారం ఏమీ పడదని సీఎం వ్యాఖ్యానించారు.

వెంటనే రుణాలను రైటాఫ్‌ చేసే దిశగా చర్యలు తీసుకోవాలని బ్యాంకర్లను సీఎం పినరయి విజయన్ కోరారు. వడ్డీలో మినహాయింపు, ఈఎంఐల చెల్లింపునకు గడువు పొడిగించడం వంటి వాటి వల్ల బాధితులకు ఎలాంటి ప్రయోజనం ఉండదని.. కొండ చరియలు విరిగిపడి ప్రభావితం చెందిన ప్రాంతాల ప్రజలు తీసుకున్న లోన్లను రైటాఫ్‌ చేయడం ఒక్కటే ఈ సమస్యకు పరిష్కారం అని తెలిపారు. ఇలాంటి క్లిష్ట సమయంలో బాధితుల బ్యాంకు ఖాతాల నుంచి లోన్‌ ఈఎంఐలు కట్ చేయడం పట్ల కేరళ సీఎం తీవ్ర అసంతృప్తి వ్యక్తం చేశారు.

కేరళ గ్రామీణ బ్యాంకులో కేంద్ర ప్రభుత్వానికి 50 శాతం వాటా ఉంటుంది. మిగిలిన 50 శాతం వాటాలో పీఎస్‌యూ కెనరా బ్యాంకు ద్వారా కేంద్రానికి మరో 35 శాతం వాటా ఉంటుంది. ఇక కేరళ రాష్ట్ర ప్రభుత్వానికి 15 శాతం వాటా ఉంది. వరద సాయం నుంచి బ్యాంకులు ఇలా ఈఎంఐలు తీసుకోవడాన్ని కేరళ రాష్ట్ర సహకారశాఖ మంత్రి వీఎన్‌ వాసవన్‌ కూడా తీవ్రంగా తప్పుబట్టారు. ఈ సాయం మొత్తం తమ ఖాతాల్లో జమ అయిన వెంటనే రూ.5 వేలు ఈఎంఐ కట్‌ అయ్యిందని చాలా మంది బాధితులు మీడియాకు వెల్లడించారు.

బాధితుల ఈఎంఐలను వరద సాయం నుంచి కట్ చేసుకున్న విషయాన్ని స్టేట్‌ లెవెల్‌ బ్యాంకర్స్‌ కమిటీ దృష్టికి తీసుకెళ్తామని మంత్రి వాసవన్‌ తెలిపారు. ఇలాంటి సమయంలో బ్యాంకులు మానవతా దృక్పథంతో ఆలోచించి.. నిర్ణయం తీసుకోవాలని సూచించారు. స్టేట్‌ లెవెల్‌ బ్యాంకర్స్‌ కమిటీ కూడా దీనికి సంబంధించి ఎలాంటి మార్గదర్శకాలు జారీ చేయలేదని పేర్కొన్నారు. అయితే ఈ ఘటనపై స్థానిక గ్రామీణ బ్యాంక్‌ చీఫ్‌తో చర్చించినట్లు స్టేట్‌ లెవెల్‌ బ్యాంకర్స్‌ కమిటీ జనరల్‌ మేనేజర్‌ కేఎస్‌ ప్రదీప్‌ తెలిపారు. కొండ చరియలు విరిగిపడటానికి ముందే ఇచ్చిన ఆదేశాల వల్ల ఇలా ఈఎంఐలు కట్ అయినట్లు వివరించారు. ఈ క్రమంలోనే వరద సాయం నుంచి కట్ చేసుకున్న ఈఎంఐ మొత్తాన్ని తిరిగి బాధితుల ఖాతాల్లో జమ చేయాలని కేరళ గ్రామీణ బ్యాంకుకు.. వయనాడ్‌ డిప్యూటీ కలెక్టర్‌ ఆదేశాలు జారీ చేశారు.