వైఎస్సార్‌సీపీలో మార్పులు, కొత్తగా వారికి పదవులు

ఆంధ్రప్రదేశ్ ఎన్నికల్లో ఘోర ఓటమి తర్వాత వైఎస్సార్‌‌సీపీలో మార్పులకు శ్రీకారం చుట్టారు అధినేత వైఎస్ జగన్‌మోహన్ రెడ్డి. పార్టీలో కొన్ని మార్పులు, చేర్పులు చేపట్టారు.. పలువురికి కీలక బాధ్యతల్ని అప్పగించారు. వైఎస్సార్‌సీపీ రాష్ట్ర ప్రధాన కార్యదర్శులుగా మాజీ ఎమ్మెల్యే గడికోట శ్రీకాంత్‌రెడ్డి (రాయచోటి), మాజీ ఎమ్మెల్యే చెవిరెడ్డి భాస్కరరెడ్డి (చంద్రగిరి), మాజీ ఎమ్మెల్సీ వేంపల్లి సతీష్‌రెడ్డి (పులివెందుల)లను నియమించారు. ఈ ముగ్గురు నేతలకు రాష్ట్రంలో కొన్ని జిల్లాల్లో పార్టీని సమన్వయం చేసే బాధ్యతలు అప్పగించే ఆలోచనలో ఉన్నారు జగన్.

వైఎస్సార్‌సీపీ ఏలూరు జిల్లా అధ్యక్ష పదవికి ఇటీవలే మాజీ మంత్రి ఆళ్ల నాని రాజీనామా చేసిన సంగతి తెలిసిందే. తాజాగా ఏలూరు జిల్లా అధ్యక్ష పదవిని కైకలూరు మాజీ ఎమ్మెల్యే దూలం నాగేశ్వరరావుకు అప్పగించారు. అంతేకాదు శ్రీకాకుళం జిల్లా టెక్కలి నియోజకవర్గం ఇంఛార్జ్ బాధ్యతల నుంచి ఎమ్మెల్సీ దువ్వాడ శ్రీనివాస్‌ను తప్పించారు జగన్. ఆ నియోజకవర్గ బాధ్యతను పార్టీ సీనియర్ నేత పేరాడ తిలక్‌కు అప్పగించారు. దువ్వాడ శ్రీనివాస్‌ కుటుంబ వివాదం రచ్చకెక్కడంతో ఈ నిర్ణయం తీసుకున్నట్లు చర్చ జరుగుతోంది.

వైఎస్సార్‌సీపీ అనుబంధ విభాగాల్లోనూ అధినేత వైఎస్ జగన్ మరికొన్ని మార్పులు చేశారు. పార్టీకి సంబంధించిన ఆయా విభాగాల రాష్ట్ర అధ్యక్షులను మార్చారు. వైఎస్సార్‌సీపీ యువజన విభాగం రాష్ట్ర అధ్యక్షుడిగా జక్కంపూడి రాజాను నియమించారు. వైఎస్సార్‌సీపీ బీసీ విభాగానికి ఎమ్మెల్సీ రమేశ్‌యాదవ్.. వైఎస్సార్‌సీపీ ఎస్సీ విభాగానికి అధ్యక్షుడిగా మాజీ ఎమ్మెల్యే టీజేఆర్‌ సుధాకర్‌ బాబు, వైఎస్సార్‌సీపీ చేనేత విభాగానికి గంజి చిరంజీవి.. విద్యార్థి విభాగానికి పానుగంటి చైతన్యను అధ్యక్షులుగా నియమిస్తూ నిర్ణయం తీసుకున్నారు.

ఈ మార్పుల్లో ప్రధానంగా చెప్పుకోవాల్సింది ఎమ్మెల్సీ దువ్వాడ శ్రీనివాస్‌ గురించి. కుటుంబ కలహాలు వివాదాస్పదం కావడంతో వైఎస్సార్‌సీపీ అధిష్ఠానం ఈ మేరకు చర్యలు తీసుకుంది. శ్రీనివాస్‌ను టెక్కలి నియోజకవర్గ పార్టీ సమన్వయకర్త బాధ్యతల నుంచి తప్పించి.. ఆ స్థానంలో గత ఎన్నికల్లో శ్రీకాకుళం ఎంపీ‌ స్థానానికి పోటీచేసిన పేరాడ తిలక్‌ను నియమించారు. మరి దువ్వాడ శ్రీనివాస్ అధిష్టానం తీసుకున్న నిర్ణయంపై స్పందించాల్సి ఉంది.