రష్యాతో యుద్ధంపై జెలెన్‌స్కీ‌కి మోదీ కీలక హామీ

ఉక్రెయిన్‌ పర్యటనకు వెళ్లిన భారత ప్రధాన మంత్రి నరేంద్ర మోదీకి అక్కడ ఘన స్వాగతం లభించింది. అంతకు ముందు గురువారం పోలండ్‌ పర్యటన ముగిసిన తర్వాత రైలు మార్గంలో ఉక్రెయిన్‌కు బయల్దేరిన మోదీ.. దాదాపు 10 గంటలు ప్రయాణించి కీవ్‌కు చేరుకున్నారు. రష్యా దండయాత్రతో దెబ్బతిన్న ఉక్రెయిన్‌లో మోదీ పర్యటించడం ఇదే మొదటిసారి. అంతేకాదు, ఆ దేశంలో పర్యటించిన తొలి భారత ప్రధాని కూడా మోదీయే. యుద్ధంలో భారత్‌ ఏ పక్షం వహించబోదని.. కేవలం శాంతికి మాత్రం వారధిగా పని చేస్తుందనే సందేశం ఇచ్చేందుకు మోదీ పర్యటన ముఖ్య ఉద్దేశంగా కనిపిస్తోంది. కీవ్‌కు చేరుకున్న ప్రధాని.. ఉక్రెయిన్‌ అధ్యక్షుడు వొలొడిమీర్ జెలెన్‌స్కీని ఆత్మీయంగా ఆలింగనం చేసుకున్నారు. ఆయనకు షేక్ హ్యాండ్ ఇచ్చి భుజంపై చేయి వేసి భరోసా ఇచ్చారు.

యుద్ధంలో చనిపోయిన మృతుల కోసం నిర్మించిన స్మారక భవనాన్ని మోదీ సందర్శించి.. వారికి నివాళులర్పించారు. ఆ భవనం బయట ఏర్పాటు చేసిన బోర్డ్‌లను చూస్తూ మోదీ విచారం వెలిబుచ్చారు. రష్యా దాడిలో చాలా మంది చిన్నారులు ప్రాణాలు కోల్పోవడంపై మోదీ ఆవేదన వ్యక్తం చేశారు. ఆ చిన్నారుల స్మారకంగా అక్కడ ఓ బొమ్మను ఉంచి మోదీ శ్రద్ధాంజలి ఘటించినట్టు భారత విదేశాంగ శాఖ వెల్లడించింది. యుద్ధాల కారణంగా చిన్నారులు బలి అవుతున్నారని మోదీ అసహనం వ్యక్తం చేశారు మోదీ.

మోదీ ఉక్రెయిన్ పర్యటన గురించి కేంద్ర విదేశాంగ మంత్రి ఎస్ జైశంకర్.. చర్చలు, దౌత్యమార్గాల ద్వారా కీవ్-మాస్కో మధ్య సంఘర్షణ నివారించాలనే వైఖరికి భారత్ కట్టుబడి ఉందనే విషయాన్ని ప్రధాని పునరుద్ఘాటించారని చెప్పారు. ఇందుకు అన్ని విధాలుగా పూర్తి సహాయక సహకారాలు అందజేస్తామని జెలెన్‌స్కీకి హామీ ఇచ్చారని వివరించారు. అలాగే, గత నెలలో రష్యా పర్యటన సందర్భంగా వ్లాదిమిర్ పుతిన్‌తో జరిగిన సంభాషణ గురించి మోదీ చర్చించారని అన్నారు. ఇరువైపులా పరస్పర చర్చల ద్వారా సమస్యను పరిష్కరించుకోవాలనేది భారత్ ఉద్దేశమని కేంద్ర మంత్రి పేర్కొన్నారు.

రష్యా నుంచి 1991లో విడిపోయిన ఉక్రెయిన్.. స్వాతంత్య్ర దేశంగా ఆవిర్భవించింది. అప్పటి నుంచి ఆ దేశంలో ఇంత వరకూ భారత్ ప్రధాని ఎవరూ పర్యటించలేదు. దీంతో మోదీ ఉక్రెయిన్‌ పర్యటనకు ప్రాధాన్యత ఏర్పడింది. ‘ఇది చరిత్రాత్మక పర్యటన.. ఉక్రెయిన్‌తో 1992లో దౌత్య సంబంధాలు మొదలైన తర్వాత భారత ప్రధాని తొలి పర్యటన ఇదే.. గురువారం రాత్రి పొలండ్ నుంచి ప్రత్యేక రైల్లో బయలుదేరిన ప్రధాని.. శుక్రవారం ఉదయం కీవ్‌కు చేరుకున్నారు.. అక్కడ ఉక్రెయిన్ విదేశాంగ శాఖ సహాయ మంత్రి మోదీకి స్వాగతం పలికారు.. అలాగే, భారతీయలు పెద్ద సంఖ్యలో హాజరై జాతీయ జెండాలతో స్వాగతించారు’ అని ఎస్ జైశంకర్ మీడియాకు వెల్లడించారు.