ఆ ఎమ్మెల్యేలకు చంద్రబాబు వార్నింగ్

ఆంధ్రప్రదేశ్‌ మంత్రివర్గ సమావేశంలో తెలుగుదేశం అధినేత, సీఎం చంద్రబాబు నాయుడు కీలక వ్యాఖ్యలు చేశారు. ఇద్దరు, ముగ్గురు ఎమ్మెల్యేల ప్రవర్తన కారణంగా పార్టీకి, ప్రభుత్వానికి చెడ్డపేరు వస్తోందని అన్నారు. ఇన్నాళ్లు పార్టీ నిర్మించుకున్న మంచిపేరును కొందరు ఎమ్మెల్యేలు దెబ్బతీస్తున్నారని మంత్రులతో అన్నారు. ఆ ఎమ్మెల్యేలు చేసిన పొరపాట్లు పేపర్లలో వస్తున్నాయని ప్రస్తావించిన చంద్రబాబు.. వారికి వార్నింగ్ ఇచ్చారు. అలాంటి ఎమ్మెల్యేల పట్ల మంత్రులు అప్రమత్తంగా ఉండాలని తెలిపారు. వారి వల్ల అందరికీ చెడ్డ పేరు వస్తోందని చంద్రబాబు విచారం వ్యక్తం చేవారు.

ఇదే సమయంలో మంత్రులు కూడా జాగ్రత్తగా ఉండాలని సూచించారు. తమ తమ జిల్లాలోని ఎమ్మెల్యేలు, నాయకులను దిశానిర్దేశం చేయాలని సీఎం చంద్రబాబు సూచించారు. ఇక నుంచి ఇలాంటివి జరగకుండా చూసుకోవాల్సిన బాధ్యత సదరు మంత్రులు, ఎమ్మెల్యేలదే అని పేర్కొన్నారు. ఈ క్రమంలోనే ప్రభుత్వంలో కీలకమైన సమాచారం బయటకు లీక్ అవుతోందని చంద్రబాబు తెలిపారు. ప్రభుత్వం ప్రవేశపెట్టిన శ్వేత పత్రాల్లోని సమాచారం.. ఓటాన్ అకౌంట్ వివరాలు.. ఇతర కీలకమైన నిర్ణయాలు బయటకు వెళ్లడంపై చంద్రబాబు ఆశ్చర్యం వ్యక్తం చేశారు. ప్రభుత్వ శాఖల్లో వైసీపీ వేగులు ఉన్నారన్న అంశం కేబినెట్ భేటీలో విస్తృతంగా చర్చించారు. ఈ సందర్భంగా ప్రభుత్వ శాఖల్లో ప్రక్షాళన ముఖ్యమని కొందరు మంత్రులు చంద్రబాబుకు సూచించినట్టు తెలుస్తోంది.

 ఇక మంత్రుల వంద రోజుల పనితీరుపై ప్రోగ్రెస్‌ రిపోర్టు ఇవ్వనున్నట్టు సీఎం చంద్రబాబు మంత్రివర్గ సమావేశంలో అన్నారు. ఇక జనసేన మంత్రుల రిపోర్ట్ ఆ పార్టీ అధినేత, డిప్యూటీ సీఎం పవన్ కళ్యాణ్‌కు అందజేస్తామని ముఖ్యమంత్రి చెప్పారు. కుటుంబ సభ్యుల ప్రవర్తన మీతిమీరకుండా చూసుకోవాల్సిన బాధ్యత సదరు మంత్రులు, ఎమ్మెల్యేలదే అని ఈ సందర్భంగా చంద్రబాబు వెల్లడించారు. కేబినెట్‌ భేటీ ముగిసిన తర్వాత రాజకీయ అంశాలపై అంతర్గతంగా చంద్రబాబు చర్చించారు. రివర్స్ టెండరింగ్ విధానంపై ముఖ్యమంత్రి, మంత్రుల మధ్య కీలక చర్చ జరిగింది. గత ప్రభుత్వం మాయ చేయడానికే రివర్స్ టెండరింగ్ విధానం ప్రవేశపెట్టిందని మంత్రులు అభిప్రాయపడ్డారు. ఇసుక పాలసీ ఇప్పుడిప్పుడే గాడిన పడుతోందని చంద్రబాబు అన్నారు.