నదిలో కొట్టుకుపోయిన అధికారి.. కాపాడేందుకు గజ ఈతగాడు 10 వేలు డిమాండ్

ప్రస్తుతం దేశం మొత్తం భారీ వర్షాలు తీవ్ర అతలాకుతలం చేస్తున్నాయి. తెలుగు రాష్ట్రాల్లో నదులు, వాగులు, వంకలు పొంగిపొర్లుతున్నాయి. భారీ వర్షాల ధాటికి జనం మొత్తం అస్తవ్యస్తం అయిపోయింది. ఈ క్రమంలోనే ఉత్తర్‌ప్రదేశ్‌లో ఓ అమానుష ఘటన చోటు చేసుకుంది. ఆ రాష్ట్ర ఆరోగ్య శాఖ డిప్యూటీ డైరెక్టర్.. గంగా నదిలోకి దిగి కొట్టుకుపోయాడు. అయితే అతడ్ని కాపాడాలని స్నేహితులు.. అక్కడ ఉన్న గజ ఈతగాళ్లను కోరగా.. వాళ్లు డబ్బులు డిమాండ్ చేశారు. ముందు కాపాడండి.. డబ్బులు ఇస్తాం అని చెప్పినా వినలేదు. వారి వద్ద డబ్బులు లేకపోవడంతో ఆన్‌లైన్‌లో పంపించాలని డిమాండ్ చేశారు. అయితే వాళ్లు ఆన్‌లైన్‌లో డబ్బులు పంపించేసరికే జరగాల్సిన నష్టం జరిగిపోయింది. నది ఉద్ధృతికి ఆ ఆరోగ్యశాఖ డిప్యూటీ డైరెక్టర్‌ గల్లంతయ్యారు. ఎంత వెతికినా అతని జాడ మాత్రం దొరకలేదు.

ఉత్తర్‌ప్రదేశ్‌ ఆరోగ్యశాఖ డిప్యూటీ డైరెక్టర్‌ ఆదిత్య వర్థన్‌ సింగ్‌.. శనివారం బిల్‌హౌర్‌లోని నానమౌ వద్ద గంగానది ఘాట్‌లో సూర్యుడిని ప్రార్థనలు చేస్తూ నదిలో పుణ్యస్నానానికి దిగాడు. ఈ క్రమంలోనే అతడిని ఫ్రెండ్స్‌ ఫొటోలు తీశారు. ఈ క్రమంలోనే నదిలోకి మరింత లోతుకు వెళ్లాడు. ఈ క్రమంలోనే గంగానది ఘాట్‌లో ఏర్పాటు చేసిన వార్నింగ్‌ మార్క్‌ను కూడా ఆదిత్య వర్థన్ సింగ్ దాటేశాడు. అయితే అతడికి ఈత బాగానే వచ్చినా.. గంగానది ఉద్ధృతంగా ప్రవహించచడంతో.. వరద ఉద్ధృతికి తట్టుకొలేక అందులో పడి కొట్టుకుపోయాడు. అయితే అది గమనించిన ఆదిత్య వర్థన్ సింగ్.. అక్కడే ఉన్న ప్రైవేట్ గజ ఈతగాళ్ల వద్దకు వెళ్లి విషయం చెప్పారు. తమ మిత్రుడు ఆదిత్యను రక్షించాలని వారిని కోరారు.

అయితే తమకు రూ.10 వేలు ఇస్తే గానీ నదిలోకి దిగేది లేదని గజ ఈతగాళ్లు పట్టుబట్టారు. కానీ తమ వద్ద అంత డబ్బు చేతిలో లేదని చెప్పినా వినలేదు. గూగుల్‌ పే ద్వారా చెల్లించాలని వారు చెప్పగా.. వారు అతడికి యూపీఐ పేమెంట్ చేశారు. అయితే అప్పటికే అంతా అయిపోయింది. ఆదిత్య వర్థన్ సింగ్.. వరద నీటిలో కొట్టుకుపోయి గల్లంతయ్యాడు. ఆ తర్వాత ఎంత వెతికినా అతడి ఆచూకీ లభించలేదు. ఈ విషయాన్ని ఉన్నతాధికారులకు అందించగా.. వారు ఎస్‌డీఆర్ఎఫ్, ఫ్లడ్ యూనిట్, పోలీసులు, ప్రైవేటు గజ ఈతగాళ్లను కూడా రంగంలోకి దింపి.. శనివారమే కాకుండా ఆదివారం కూడా గాలింపు చేపట్టారు.

అయినప్పటికీ ఆదిత్య వర్థన్ సింగ్ ఆచూకీ లభించలేదు. ఈ విషయాన్ని బిల్‌హర్‌ ఏసీపీ అజయ్‌ కుమార్‌ తెలిపారు. ఆదిత్య వర్థన్ సింగ్ కొట్టుకుపోగానే.. గజ ఈతగాళ్లు సకాలంలో స్పందించి అతడిని కాపాడి ఉంటే పరిస్థితి మరోలా ఉండేదని.. స్నేహితులు చెబుతున్నారు. వారికి పంపించిన రూ.10 వేలకు సంబంధించి గూగుల్ పే స్క్రీన్ షాట్‌ను కూడా పోలీసులకు అందించారు. ఈ విషయంపై గజ ఈతగాళ్లు మాత్రం భిన్నంగా వాదిస్తున్నారు. తాము కేవలం స్టీమర్‌ డీజిల్‌ కోసమే డబ్బులు అడిగామని చెబుతున్నారు. దీనిపై స్పందించిన ఏసీపీ అజయ్ కుమార్.. ఈ ఘటనపై విచారణ జరిపి చట్టపరమైన చర్యలు తీసుకుంటామని చెప్పారు.