విశాఖలో మరో కొత్త మ్యూజియం

విశాఖపట్నం ఆర్‌కే బీచ్‌రోడ్డులో మరో కొత్త మ్యూజియం రానుంది. ఇప్పటికే ఐదు మ్యూజియాలు ఉన్నాయి. అందులో జీవీఎంసీకి చెందిన మత్స్యదర్శినిని మినహాయిస్తే మిగిలిన నాలుగు తూర్పు నౌకాదళానికి చెందినవే. అందులో ఒకటి నేవీకి సంబంధించిన నౌకలు, ఆయుధాలతో కూడిన విశాఖ మ్యూజియం కాగా మరొకటి కురుసుర సబ్‌మెరైన్‌ మ్యూజియం. మిగిలిన రెండిండిలో ఒకటి టీయూ-142 యుద్ధ విమానం కాగా మరొకటి సీ హ్యారియర్‌ హెలికాప్టర్‌ మ్యూజియం. చాలాకాలంగా బీచ్‌రోడ్డులో నేవీ మ్యూజియం కాంప్లెక్స్‌ ఏర్పాటుచేయాలని భావిస్తోంది. దీనికి వీఎంఆర్‌డీఏ సహకారం కోరింది. ఎలా ఉండాలనే దానిపై ఐదేళ్ల క్రితమే చర్చలు జరిగాయి. అయితే అన్నింటిని తీసుకువచ్చి ఆర్‌కే బీచ్‌లో పెడితే ట్రాఫిక్‌ సమస్య పెరిగిపోతుందని, పార్కింగ్‌ సదుపాయాలు లేవని స్థానిక రెసిడెంట్స్‌ వెల్ఫెర్‌ అసోసియేషన్‌ అభ్యంతరాలు వ్యక్తంచేయడంతో కాంప్లెక్స్‌ నిర్మాణం ప్రతిపాదన ఆగిపోయింది. అయితే నేవీలో డీ కమిషనింగ్‌ చేసిన వాటిని వీఎంఆర్‌డీఏ చాలా చక్కటి మ్యూజియాలుగా మలిచి ప్రజాదరణ పొందేలా తీర్చిదిద్దడంతో తూర్పు నౌకాదళం మరో ప్రతిపాదనతో ముందుకు వచ్చింది. నేవీలో పదిహేడేళ్లు సుదీర్ఘ సేవలు అందించి ఈ ఏడాది జూన్‌ 28వ తేదీన ఐఎన్‌ఎస్‌ డేగాలో డీ కమిషనింగ్‌ జరిగిన ‘యుహెచ్‌-3హెచ్‌’ హెలికాప్టర్‌ను ఇస్తామని, దానిని కూడా మ్యూజియంగా మలచాలని కలెక్టర్‌ ద్వారా వీఎంఆర్‌డీఏను కోరింది. దానికి వారు సానుకూలంగా స్పందించడంతో అందుకు తగిన ఏర్పాట్లు మొదలయ్యాయి. ప్రస్తుతం టీయూ-142 యుద్ధ విమానం, సీ హ్యారియర్‌ మ్యూజియాల చెంతనే ఏయూ కన్వెన్షన్‌ సెంటర్‌ ముందు యుహెచ్‌-3హెచ్‌ మ్యూజియం ఏర్పాటు చేయాలని నిర్ణయించారు. సీ హ్యారియర్‌లా దీనిని గాలిలో వేలాడ దీయకుండా కిందనే ఉంచేలా డిజైన్‌ తయారుచేశారు. మూడు వైపులా ఫేస్‌డ్‌ (ముఖద్వారం) వచ్చేలా అద్దాలతో చక్కటి డిజైన్‌ రూపొందించారు. దీనికి సుమారుగా రూ.80 లక్షల వ్యయం అవుతుందని అంచనా వేశారు. తాజాగా వీఎంఆర్‌డీఏ ముఖద్వారం నిర్మాణానికి టెండర్లు పిలిచింది. ఇది కూడా పూర్తయితే బీచ్‌కు అదనపు ఆకర్షణ అవుతుంది.