అమెరికాలో ఘోర రోడ్డు ప్రమాదం.. ముగ్గురు హైదరాబాదీలు సహా నలుగురు మృతి

అగ్రరాజ్యం అమెరికాలో సంభవించిన ఘోర రోడ్డు ప్రమాదంలో ముగ్గురు హైదరాబాద్ యువకులు సహా నలుగురు భారతీయులు మృతిచెందారు. శుక్రవారం చోటుచేసుకున్న ఈ దుర్ఘటన ఆలస్యంగా వెలుగులోకి వచ్చింది. టెక్సాస్‌లోని అన్నా యూఎస్ రూట్ 75లో జరిగిన ఈ ప్రమాదంలో మృతులను హైదరాబాద్‌కు చెందిన ఆర్యన్‌ రఘునాథ్, ఫరూఖ్, లోకేశ్‌ పాలచర్ల, తమిళనాడుకు చెందిన దర్శిని వాసుదేవన్‌‌గా గుర్తించారు. కార్‌ పూలింగ్‌ ద్వారా ఈ నలుగురు బెన్‌టోన్‌విల్లె ప్రాంతానికి వెళ్లేందుకు ఒకే వాహనంలో ఎక్కారని అధికారులు తెలిపారు.

ఐదు వాహనాలు ఒకదానినొకటి అతివేగంగా ఢీకొనడంతో ఈ ప్రమాదం సంభవించినట్లు వెల్లడించారు. బెంటన్‌విల్లేలో ఉంటోన్న ఆర్యన్ రఘునాథ్.. డల్లాస్‌లో బంధువును కలిసి ఇంటికి తిరిగి వెళ్తున్నారు. లోకేశ్ పాలచర్ల బెంటన్‌విల్లేలోని తన భార్యను కలిసేందుకు, దర్శిని వాసుదేవన్, ఫరూఖ్‌‌లు తాము చదువుతోన్న టెక్సాస్ యూనివర్సిటీకి వెళ్లేందుకు ఒకే కారు ఎక్కారు. వాహనాలు ఢీకొట్టిన తర్వాత వీరు ప్రయాణిస్తున్న కారుకు మంటలు అంటుకోవడంతో బయటకు రాలేకపోయినట్లు సమాచారం. మృతదేహాలు గుర్తు పట్టలేనంతగా కాలిపోవడంతో కార్‌ పూలింగ్‌ యాప్‌లో నమోదైన వివరాల ఆధారంగా ప్రాథమిక నిర్ధారణకు వచ్చినట్లు తెలుస్తోంది. వీరి మృతిపై స్నేహితులు, బంధువులు తీవ్ర దిగ్భ్రాంతి వ్యక్తం చేశారు.

హైదరాబాద్‌లోని కూకట్‌పల్లిలో ఉన్న మాక్స్ అగ్రి జెనెటిక్స్ లిమిటెడ్ సంస్థ యజమాని సుభాష్ చంద్ర రెడ్డి కుమారుడు ఆర్యన్ రఘనాథ్. వీరి స్వస్థలం కర్ణాటకలోని రాయచూర్ కాగా.. హైదరాబాద్‌కు వచ్చి స్థిరపడ్డారు. కోయంబత్తూరులోని అమృత విశ్వ విద్యాపీఠమ్‌లో ఇంజినీరింగ్ పూర్తిచేసిన ఆర్యన్.. ఈ ఏడాది మేలో ఎంఎస్ కోసం అమెరికాకు వెళ్లాడు. ఎంఎస్ తర్వాత స్వదేశానికి వచ్చేయమని తల్లిదండ్రులు చెబితే.. తాను అమెరికాలో రెండేళ్ల ఉద్యోగం చేస్తానని చెప్పాడు. కానీ, ఇంతలోనే తిరిగి రాని లోకాలకు వెళ్లిపోయాడని తల్లిదండ్రులు కన్నీరుమున్నీరుగా విలపిస్తున్నారు.

ఇక, దర్శిని వాసుదేవన్ తల్లిదండ్రులు.. కారు ప్రమాదానికి జరగడానికి కొన్ని క్షణాల ముందే తమ కుమార్తెతో మాట్లాడారు. వాళ్లతో మాట్లాడి ఫోన్ పెట్టేసిన సెకెన్లలోనే ఘోరం జరిగిపోయింది. తమ కుమార్తె మృతదేహాన్ని భారత్‌కు రప్పించేందుకు సాయం చేయాలని కేంద్ర ప్రభుత్వాన్ని వారు అభ్యర్దిస్తున్నారు.