ఆర్ఎస్ఎస్, బీజేపీలపై కాంగ్రెస్ నేత రాహుల్ గాంధీ విమర్శలు

అమెరికాలో పర్యటిస్తోన్న కాంగ్రెస్‌ అగ్రనేత రాహుల్‌ గాంధీ.. డాలస్‌లోని ప్రవాస భారతీయులతో సమావేశమయ్యారు. ఈ సందర్భంగా భారత్‌ గొప్పదనాన్ని కొనియాడారు. భిన్నత్వంలో ఏకత్వానికి ప్రతీకగా నిలుస్తుందని, భాషలు, సంప్రదాయాలు వేరైనా అంతా ఒక్కటిగా కలిసి మెలిసి ఉంటామని అన్నారు. భాషలు, సంప్రదాయాల పేరుతో ఎవర్నీ వేరు చేసి చూడొద్దని ఆయన అన్నారు. ఆర్ఎస్ఎస్ భావజాలాన్ని దేశం మొత్తం రుద్దే ప్రయత్నం చేస్తున్నారని ఆరోపించారు. ఈ సందర్భంగా గురించి రాహుల్ గాంధీ ప్రత్యేకంగా ప్రస్తావించడం విశేషం.

‘‘భారత జాతీయగీతం జనగణమన అన్ని రాష్ట్రాలను ప్రతిబింబిస్తుంది. సమానత్వానికి ప్రతీకగా నిలుస్తుంది... అంతేగానీ.. ఒక రాష్ట్రం ఎక్కువ.. మరొకటి తక్కువ అని అందులో ఎక్కడా ఉండదు.. ఈ గీతం మన దేశాన్ని రాష్ట్రాల సమాఖ్యగా చెబుతుంది.. అప్పుడు ఒక రాష్ట్రం కంటే ఇంకో రాష్ట్రం ఎక్కువా కాదు.. తక్కువా కాదు. అలాగే భాష, సంప్రదాయాలు కూడా. తలపాగా ధరించని సోదరుడికి కూడా అంతే గౌరవం ఉంటుంది.. మీరు తలపాగా ధరించడం వల్ల మాకు నచ్చరు అనడం సరికాదు.. తమిళం మాట్లాడేవారు మాకు నచ్చరు అని.. హిందీ మాట్లాడేవారే ఇష్టం.. అతడు మళయాలం మాట్లాడతాడు.. మాకు ఇష్టం ఉండదు అని మనం చెప్పడం సరికాదు.. ఓ మతం గొప్పది.. మరొకటి చెడ్డది కాదు’’ అని రాహుల్‌ వ్యాఖ్యానించారు.

‘ఉదాహరణకు తెలుగు భాషనే తీసుకోండి.. మనం తెలుగు అని చెబుతున్నప్పుడు అది కేవలం భాష కాదు.. ఒక చరిత్ర, ఒక సంప్రదాయం, సంస్కృతి. హిందీతో పోలిస్తే తెలుగు భాష అంత గొప్పది కాదని ఒకవేళ ఆ రాష్ట్ర ప్రజలతో మీరు అంటే వారిని మీరు అవమానించినట్లే..! అలా పోలుస్తూ.. తెలుగు చరిత్ర, సంప్రదాయం, సంస్కృతి, పూర్వీకులు ముఖ్యం కాదని మీరు చెప్పినట్లే..!’ అని లోక్‌సభ ప్రతిపక్ష నేత ఎంపీ అన్నారు. ఈ చిన్న తేడాను కొందరు అర్థం చేసుకోకపోవడం వల్లే భారత్‌లో దీనికోసం పోరాటం జరుగుతోందంటూ బీజేపీపై విమర్శలు గుప్పించారు. అలాగే, దేశం మొత్తం ఒకటే ఆలోచన అని ఆర్ఎస్ఎస్ నమ్ముతుంది కానీ, మేము మాత్రం భారల్ అంటే బహుళ ఆలోచనల సమూహారం అని బలంగా విశ్వసిస్తామని అన్నారు.

అమెరికాలో మాదిరిగానే.. అందరికీ ప్రాతినిధ్యం ఉండాలని మేం కోరుకుంటున్నామని రాహుల్ అన్నారు. కులం, మతం, భాష, సంప్రదాయాలతో సంబంధం లేకుండా ప్రతి ఒక్కరూ కలలు కనేందుకు అర్హులేనని రాహుల్ పేర్కొన్నారు. కానీ, భారత్‌లో ఇప్పుడా పరిస్థితుల కోసం పోరాడాల్సి వస్తోందని మోదీ నాయకత్వంలోని ఎన్డీయే సర్కారుపై విమర్శలు చేశారు.