వరద బాధితులకు వెల్లువెత్తుతున్న విరాళాలు,,,రూ.10 కోట్లు విరాళంగా ఇచ్చిన ఉద్యోగులు

ఏపీలో వరద బాధితులకు అండగా నిలిచేందుకు సామాన్యుల నుంచి సంస్థల వరకూ దాతలు ముందుకు వస్తున్నారు. తమకు చేతనైనంత సాయం చేస్తున్నారు. ఈ క్రమంలోనే పలు ప్రభుత్వశాఖల ఉద్యోగులకు కూడా విరాళాలు అందిస్తున్నారు. తాజాగా ఏపీ విద్యుత్‌ ఇంజినీర్ల అసోసియేషన్‌, విద్యుత్‌ ఉద్యోగుల జేఏసీ సంయుక్తంగా రూ. 10 కోట్లు విరాళం ప్రకటించాయి. రెండూ కలిసి సంయుక్తంగా రూ.10,61,18,694 విరాళమిచ్చాయి. ఈ మేరకు సీఎం చంద్రబాబును కలిసి విరాళం తాలూకు చెక్కును అందజేశారు. ఈ సందర్భంగా ఉద్యోగులను చంద్రబాబు అభినందించారు.

మరోవైపు డిక్షన్ గ్రూప్ కోటి రూపాయలు, నెక్కంటి సీ ఫుడ్స్ కోటి రూపాయలు చొప్పున విరాళాలు అందించాయి. ఈ మేరకు మంత్రి లోకేష్‌ను కలిసి విరాళం తాలూకు చెక్ అందించారు ఆయా సంస్థల ప్రతినిధులు. అలాగే సంధ్య ఆక్వా కోటి రూపాయలు విరాళంగా అందించింది. శ్రీకాళహస్తి ఎమ్మెల్యే బొజ్జల సుధీర్ రెడ్డి ఆధ్వర్యంలో శ్రీకాళహస్తి రైస్ మిల్లర్ల అసోసియేషన్ రూ.25 లక్షలు, రేస్ పవర్ సంజయ్ గుప్తా రూ.25 లక్షలు చొప్పున ముఖ్యమంత్రి సహాయనిధికి విరాళంగా ఇచ్చారు. ఎమ్మెల్సీ రామ్ గోపాల్ రెడ్డి ఆధ్వర్యంలో కర్నూలుకు చెందిన డాక్టర్ కేవి సుబ్బారెడ్డి రూ.11 లక్షలు సీఎం సహాయనిధికి విరాళంగా అందించారు.

మరోవైపు మెగా హీరో సాయి ధరమ్ తేజ్ కూడా తన పెద్దమనసు చాటుకున్నారు. వరద బాధితులకు పది లక్షలు విరాళంగా అందించారు. మంత్రి నారా లోకేష్‌ను కలిసిన సాయి ధరమ్ తేజ్.. పది లక్షల విరాళం చెక్కును ఆయనకు అందించారు. అలాగే ఆళ్లగడ్డ ఎమ్మెల్యే భూమా అఖిలప్రియ ఆధ్వర్యంలో ఆల్ఫా ఇన్స్టిట్యూట్ రూ. 5 లక్షలు, రైతులు మరియు కార్యకర్తలు కలిసి రూ.5 లక్షలు విరాళంగా ఇచ్చారు. రక్ష హాస్పిటల్స్ నాగరాజు రూ. 5 లక్షలు, జర్నలిస్టు జాఫర్ లక్ష చొప్పున విరాళం అందించారు. వరద బాధితులకు అండగా ఉండేందుకు ముందుకు వస్తున్న దాతలను సీఎం చంద్రబాబు నాయుడు, మంత్రి నారా లోకేష్ అభినందించారు.