మంకీపాక్స్‌ నివారణకు వ్యాక్సిన్.. తొలి టీకాకు డబ్ల్యూహెచ్ఓ అనుమతి

ప్రస్తుతం ప్రపంచ దేశాలను మంకీపాక్స్ వైరస్ తీవ్ర భయాందోళనలకు గురి చేస్తోంది. ఆఫ్రికా దేశాల్లో పుట్టిన ఈ మంకీపాక్స్ వైరస్.. గత కొన్ని రోజులుగా వివిధ దేశాల్లో వేగంగా వ్యాప్తి చెందుతోంది. ఈ క్రమంలోనే తాజాగా భారత్‌లో కూడా తొలి మంకీపాక్స్ కేసు వెలుగుచూసింది. ఈ క్రమంలోనే గతంలో కరోనా మహమ్మారి కారణంగా ప్రపంచం మొత్తం.. ఏ విధంగా భయాందోళనలకు గురయ్యిందో తాజాగా మంకీపాక్స్ కూడా అదే రకమైన భయాలను కలిగిస్తోంది. ఇలాంటి సమయంలో ప్రాణాంతక మంకీపాక్స్ నివారణకు టీకా అందుబాటులోకి రావడం భారీ ఉపశమనాన్ని కలిస్తోంది. అయితే ఒకటే రకం వ్యాక్సిన్ అందుబాటులోకి రావడంతో.. పరిమిత సంఖ్యలో ఉత్పత్తి అవుతోంది. ఈ క్రమంలోనే ఈ వ్యాక్సిన్‌ను ఎవరికి ఇవ్వాలి అనేది ప్రస్తుతం తీవ్ర చర్చనీయాంశంగా మారింది.

గత కొంత కాలంగా ప్రపంచ దేశాలను వణికిస్తున్న ప్రాణాంతక మంకీపాక్స్‌ విషయంలో కీలక పురోగతి చోటు చేసుకుంది. పెద్దలకు మంకీపాక్స్‌ రాకుండా నివారించడానికి తయారు చేసిన వ్యాక్సిన్‌ అత్యవసర వినియోగానికి వరల్డ్ హెల్త్ ఆర్గనైజేషన్ - డబ్ల్యూహెచ్ఓ తాజాగా అనుమతులు ఇచ్చింది. ఆఫ్రికాతో పాటు ప్రపంచ దేశాల్లో వేగంగా విస్తరిస్తున్న ఈ మంకీపాక్స్‌పై పోరాటంలో ఇది కీలక ముందడుగు అని డబ్ల్యూహెచ్ఓ పేర్కొంది. తాజాగా బవేరియన్‌ నార్డిక్‌ సంస్థ అభివృద్ధి చేసిన ఎంవీఏ-బీఎన్(MVA-BN) మంకీపాక్స్ వ్యాక్సిన్‌కు డబ్ల్యూహెచ్ఓ ఆమోదం తెలిపింది. ఈ వ్యాక్సిన్‌ను అలయన్స్‌ గావీతోపాటు యూనిసెఫ్‌ వంటి సంస్థలు కొనుగోలు చేయొచ్చని తెలిపింది.

అయితే ఈ వ్యాక్సిన్‌ను తయారు చేసే సంస్థ ఒక్కటే కావడంతో ప్రస్తుతం పరిమిత సంఖ్యలోనే ఉత్పత్తి జరుగుతోంది. ఈ క్రమంలోనే ముఖ్యమైన ప్రాంతాల్లో వెంటనే ఈ వ్యాక్సిన్‌ను అందించేందుకు అన్ని రకాల చర్యలు చేపట్టాల్సిన అవసరం ఉందని డబ్ల్యూహెచ్ఓ అభిప్రాయం వ్యక్తం చేసింది. అయితే 18 ఏళ్ల దాటిన వారికి ఈ వ్యాక్సిన్‌ను 2 డోసుల్లో ఇవ్వాలని పేర్కొంది. అయితే 18 ఏళ్ల లోపు ఉన్న వారికి ఈ టీకా ఇచ్చేందుకు అనుమతి లేనప్పటికీ.. మంకీపాక్స్ అధికంగా వ్యాప్తి చెందే ప్రాంతాల్లో నివసించే వారికి దీన్ని అందించవచ్చని డబ్ల్యూహెచ్‌వో స్పష్టం చేసింది. ఈ వ్యాక్సిన్‌ను 2-8 డిగ్రీల సెల్సియస్ వద్ద 8 వారాల వరకు నిల్వ ఉంచవచ్చని వెల్లడించింది.

ఈ వ్యాక్సిన్‌ మొదటి డోస్‌ తీసుకున్న వారిని రక్షించడంలో 76 శాతం ప్రభావాన్ని కలిగి ఉందని తెలుస్తుంది. రెండో డోస్‌ తీసుకున్న వారికి మంకీపాక్స్ వ్యాధి సోకకుండా 82 శాతం ప్రభావాన్ని కలిగి ఉందని డబ్ల్యూహెచ్ఓ డైరెక్టర్ జనరల్ డాక్టర్ టెడ్రోస్ అథనోమ్ ఒక ప్రకటనలో తెలిపారు.