కమలా హారిస్‌తో మళ్లీ డిబేట్‌లో పాల్గొనను.. తేల్చి చెప్పిన డొనాల్డ్ ట్రంప్

అమెరికా అధ్యక్ష ఎన్నికల్లో రిపబ్లికన్ పార్టీ తరఫున బరిలో ఉన్న మాజీ అధ్యక్షుడు డొనాల్డ్ ట్రంప్.. తన స్టైల్‌లోనే ముందుకెళ్తున్నారు. ప్రస్తుత ఉపాధ్యక్షురాలు, డెమోక్రాటిక్ పార్టీ అభ్యర్థి కమలా హారిస్ పట్ల.. విమర్శలు గుప్పిస్తున్నారు. ఈ క్రమంలోనే ఇటీవల మొట్టమొదటిసారిగా పెన్సిల్వేనియా రాష్ట్రంలోని నేషనల్ కాన్‌స్టిట్యూషన్ సెంటర్‌లో నిర్వహించిన డిబేట్‌లో తలపడ్డారు. హోరాహోరీగా సాగిన ఈ డిబేట్‌లో డొనాల్డ్ ట్రంప్‌పై కమలా హారిస్‌ పైచేయి సాధించారని మెజారిటీ యూఎస్ మీడియా వర్గాలు వెల్లడించాయి. అయితే దీన్ని మాత్రం డొనాల్డ్ ట్రంప్ నమ్మడం లేదు. ఆ డిబేట్‌లో తానే విజయం సాధించానని చెప్పుకుంటున్నారు. ఈ నేపథ్యంలో తాజాగా కీలక వ్యాఖ్యలు చేశారు.

కమలా హారిస్‌తో తాను మరోసారి చర్చలో పాల్గొనను అని డొనాల్డ్‌ ట్రంప్‌ తాజాగా స్పష్టం చేశారు. ఈ నేపథ్యంలోనే అమెరికా అధ్యక్ష అభ్యర్థుల మధ్య మూడో డిబేట్ ఉండదని ఆయన తేల్చి చెప్పారు. గతంలో కమలా హారిస్ కంటే ముందు డెమోక్రాటిక్ పార్టీ అభ్యర్థిగా ఉన్న ప్రస్తుత అధ్యక్షుడు జో బైడెన్‌తో డొనాల్డ్ ట్రంప్ తలపడ్డారు. అందులో బైడెన్‌పై ట్రంప్‌ పైచేయి సాధించారు. అయితే ప్రస్తుతం జరిగిన కమలా హారిస్-డొనాల్డ్ ట్రంప్ డిబేట్‌లో కమలా హారిస్ గెలుపొందినట్లు పలు సర్వేలు చెబుతున్నాయి.

అయితే రాడికల్‌ లెఫ్ట్‌ అభ్యర్థి కమలా హారిస్‌తో మంగళవారం రాత్రి పెన్సిల్వేనియాలో జరిగిన డిబేట్‌లో తానే గెలిచానని ట్రంప్ తెలిపారు. కానీ సర్వేలు మాత్రం అందుకు భిన్నంగా.. కమలా హారిస్ గెలిచారని చూపిస్తున్నాయని ఆయన తీవ్ర విమర్శలు గుప్పించారు. ఓడిపోయిన కమలా హారిస్‌తో తాను మరోసారి చర్చకు సిద్ధంగా లేనని ఈ సందర్భంగా డొనాల్డ్ ట్రంప్‌.. తన సొంత సోషల్ మీడియా ప్లాట్ల్ ఫామ్ అయిన ట్రూత్ సోషల్‌లో పేర్కొన్నారు.

ఇక తాజా డిబేట్‌లో సీఎన్ఎన్ విడుదల చేసిన సర్వే ప్రకారం 63 శాతం మంది కమలా హారిస్‌కు మద్దతు ఇవ్వగా.. కేవలం 37 శాతం మంది మాత్రమే డొనాల్డ్ ట్రంప్‌కు జై కొట్టారు. యూ గవ్ సర్వే ప్రకారం 43 శాతం మంది కమలా హారిస్ గెలుపొందారని చెప్పగా.. కేవలం 28 శాతం మంది ట్రంప్‌కు మద్దతుగా నిలిచారు. మరో 30 శాతం మంది ఎవరికీ సపోర్ట్ చేయలేదు. ఈ డిబేట్ జరిగిన 24 గంటల్లోనే కమలా హారిస్‌కు ఏకంగా 47 మిలియన్ డాలర్లు అంటే మన భారత కరెన్సీలో దాదాపు రూ.394 కోట్ల విరాళాలు సమకూరినట్లు తెలుస్తోంది. ఇక అక్టోబరు 1వ తేదీన ట్రంప్‌ రన్నింగ్‌ మేట్‌ జేడీ వాన్స్‌, డెమోక్రటిక్‌ వైస్‌ ప్రెసిడెంట్‌ టీమ్‌ వాజ్‌ల మధ్య న్యూయార్క్‌లో డిబేట్ జరగనుంది.