ఏపీలో స్కూల్ విద్యార్థులకు ఉచితంగా కిట్లు.. ఈసారి ముందుగానే

ఆంధ్రప్రదేశ్‌లో అధికారంలోకి వచ్చిన కూటమి ప్రభుత్వం శాఖలవారీగా ప్రక్షాళన మొదలుపెట్టింది. ఈ మేరకు విద్యాశాఖపై మంత్రి లోకేష్ వరుసగా సమీక్షలు నిర్వహిస్తున్నారు.. అవసరమైన చోట్ల మార్పులు, చేర్పులకు సిద్ధమవుతున్నారు. ఈ క్రమంలో తాజాగా స్కూళ్లకు సంబంధించి కీలక నిర్ణయం తీసుకున్నట్లు తెలుస్తోంది. వచ్చే ఏడాది నుంచి స్కూల్ విద్యార్థులకు కొత్త యూనిఫామ్ ఇవ్వాలని భావిస్తున్నారట.. ప్రభుత్వ, ఎయిడెడ్ స్కూళ్లలో చదువుతున్న విద్యార్థులకు ఇచ్చే యూనిఫామ్‌ను వచ్చే ఏడాది నుంచి మార్చాలని ప్రభుత్వం నిర్ణయించిందని చెబుతున్నారు.

యూనిఫామ్ మాత్రమే కాదు.. బ్యాగ్, షూ, బెల్టులలో నాణ్యత పెంచాలని అధికారులను ప్రభుత్వం ఆదేశించిందట. అక్టోబర్ మొదటి వారంలోనే టెండర్లు నిర్వహించి.. వచ్చే ఏడాది పాఠశాలలు తెరిచే రోజే పిల్లలకు కిట్లు అందించేలా ప్రణాళిక సిద్ధం చేశారట. వాటిపై ఎలాంటి పార్టీల రంగులు లేకుండా ఈ కిట్‌లను సిద్దం చేయనున్నారు. ఈ మేరకు యూనిఫామ్, కిట్లకు సంబంధించి ప్రభుత్వం అనుమతి కోసం ప్రతిపాదనలు పంపించారట. అనుమతి రాగానే అక్టోబరు మొదటి వారంలో టెండర్లు నిర్వహించి.. వచ్చే విద్యా సంవత్సరం జూన్‌ 12 నాటికి కిట్లు అందించేలా సమగ్ర శిక్షా అభియాన్‌ ప్రతిపాదనలు సిద్ధం చేసినట్లు చెబుతున్నారు.

గతంలో ఇచ్చిన బ్యాగ్‌లు, షూ విషయంలో విద్యార్థుల నుంచి ఫిర్యాదులు వచ్చాయట. స్కూల్ విద్యార్ధులకు పంపిణీ చేసిన బ్యాగ్‌లలో నాణ్యత లేదని.. ఎక్కువ పుస్తకాలు పెడితే ఆ బరువుకు హ్యాండిల్‌ తెగిపోతోందని కొందరు విద్యార్ధులు, తల్లిదండ్రుల నుంచి ఫీడ్ బ్యాక్ వచ్చిందరట. అందుకే ఈసారి బ్యాగుల నాణ్యత పెంచాలని ప్రభుత్వం నిర్ణయించింది. అంతేకాదు గత ప్రభుత్వ హయాంలో విద్యార్థులకు అందజేసిన జగనన్న కానుక కిట్లలో కూడా పార్టీ రంగులు అంటూ విమర్శలు వచ్చాయి. ఈసారి ఆ విమర్శలకు తావులేకుండా కూటమి ప్రభుత్వం అప్రమత్తం అయ్యింది.. అందుకే ఈసారి కిట్ల విషయంలో జాగ్రత్తలు తీసుకుంటుందనే వాదన వినిపిస్తోంది.

అంతేకాదు గత వైఎస్సార్‌సీపీ ప్రభుత్వం బకాయి పెట్టిన స్కూల్ ఆయాలు, వాచ్‌మెన్ల జీతాలను కూటమి ప్రభుత్వం ఇటీవల విడుదల చేసిన సంగతి తెలిసిందే. రాష్ట్ర వ్యాప్తంగా స్కూళ్లలో పనిచేస్తున్న ఆయాలు, వాచ్‌మెన్ల జీతాలకు రూ.64.38 కోట్లను ప్రభుత్వం విడుదల చేసింది. అంతేకాదు స్కూళ్లలో టాయిలెట్ల క్లీనింగ్‌ మెటీరియల్ బకాయిలు రూ.25.52 కోట్లు చొప్పున మొత్తంగా రూ.89.9 కోట్ల బకాయిలు విడుదల చేస్తూ ఉత్తర్వులు కూడా ఇచ్చారు. గత ప్రభుత్వ బకాయిల విషయాన్ని పాఠశాల విద్యాశాఖపై మంత్రి లోకేష్ సమీక్ష నిర్వహించిన సమయంలో ప్రస్తావనకు వచ్చింది.. దీంతో వెంటనే స్పందించి సంబంధిత బకాయిలను వెంటనే విడుదల చేయాలని ఆదేశించడంతో.. అధికారులు ఉత్తర్వులు ఇచ్చారు.. ఆ డబ్బులు వారికి జమ చేశారు.