మళ్లీ బరితెగించిన చైనా.. అరుణాచల్ ప్రదేశ్‌ సరిహద్దుల్లో హెలిపోర్ట్ నిర్మాణం

సరిహద్దుల్లో తరచూ కవ్విస్తున్న చైనా.. మరోసారి బరితెగించింది. అరుణాచల్ ప్రదేశ్ సరిహద్దులకు సమీపంలో తాజాగా కొత్త హెలిపోర్ట్‌ను నిర్మిస్తోంది. ఏదైనా అత్యవసర పరిస్థితి ఎదురైతే సరిహద్దులకు సైన్యాన్ని వేగంగా తరలించేందుకు డ్రాగన్ ఈ హెలిపోర్ట్‌ నిర్మాణాన్ని చేపట్టింది. ఈ హెలిపోర్ట్‌ నిర్మాణానికి సంబంధించిన శాటిలైట్ చిత్రాలు తాజాగా బయటికి రావడంతో డ్రాగన్ దుశ్చర్య బయటికి వచ్చింది. ఈ హెలిపోర్ట్‌ ప్రాంతం టిబెట్ భూభాగంలోకి వస్తుండగా.. భారత్‌కు చెక్ పెట్టేందుకు చైనా నిర్మిస్తోందనే వాదనలు తెరపైకి వస్తున్నాయి. అరుణాచల్ ప్రదేశ్‌ సరిహద్దుల్లోని భారత్ చైనా వాస్తవాధీన రేఖకు సుమారు 20 కిలోమీటర్ల దూరంలో ఈ హెలిపోర్ట్‌ను చైనా నిర్మిస్తోంది.

భారత్-చైనా సరిహద్దుల్లో తమ సైనిక కార్యక‌లాపాల‌ను వేగ‌ం చేసేందుకు డ్రాగన్‌కు ఈ హెలిపోర్టు కీలకకం కానుంది. గోంగ్రిగాబు క్యూ న‌ది స‌మీపంలో ఈ హెలిపోర్టును మెరుపు వేగంతో చైనా నిర్మిస్తోంది. అయితే ఆ ప్రాంతం టిబెట్ స్వయం ప్రతిప‌త్తి ప్రాంతంలో ఉండగా.. అది చైనా ఆధీనంలో ఉంది. ఇక ఈ ప్రాంతంపై భార‌త్‌తో చైనాకు ఎలాంటి విభేదాలు లేనప్పటికీ.. భారత సరిహద్దుల్లోకి సైన్యాన్ని, ఆయుధాలను వేగంగా తరలించేందుకు కీలకం కానుంది. ఆ ప్రాంతం అరుణాచల్ ప్రదేశ్‌లోని సున్నితమైన ఫిష్‌టెయిల్స్ ప్రాంతానికి సమీపంలో ఉంది.

ఈఓఎస్ డేటా అనలిటిక్స్‌లో అందుబాటులో ఉన్న ఓపెన్ సోర్స్ శాటిలైట్ ఇమేజరీ ప్రకారం 2023 డిసెంబర్ 1వ తేదీ వరకు అక్కడ ఎలాంటి నిర్మాణాలు కనిపించలేదు. కానీ డిసెంబర్ 31వ తేదీన తీసిన ఫోటోల్లో.. హెలిపోర్ట్ నిర్మాణం కోసం అక్కడ పనులు ప్రారంభించినట్లు కనిపిస్తోంది. ఇక 2024 సెప్టెంబరు 16వ తేదీన మాక్సర్ తీసిన హై రిజల్యూషన్ ఫోటోల్లో అత్యాధునిక హెలిపోర్ట్ నిర్మాణం స్పష్టంగా కనిపిస్తోంది. ఇక ప్రస్తుతానికి నిర్మాణంలో ఉన్న ఆ హెలిపోర్ట్‌లో 600 మీటర్ల రన్‌వేను కలిగి ఉన్నట్లు తెలుస్తోంది.

కొండ ప్రాంతాల్లో హెలికాప్టర్లు టేకాఫ్‌ల‌కు ఇది ఉప‌యోగ‌ప‌డనుంది. హెలిపోర్టులో 3 హ్యాంగ‌ర్లు ఉన్నాయి. హెలికాప్టర్లను సరైన స్థానంలో ఉంచేందుకు, ఎయిర్ ట్రాఫిక్ కంట్రోల్ సౌకర్యం, వాటికి అనుబంధ‌మైన నిర్మాణాలు కూడా ఏర్పాటు చేస్తున్నారు. మ‌రోవైపు వాస్తవాధీన రేఖ వెంట చైనా జియోకాంగ్ గ్రామాల‌ను నిర్మిస్తోంది. వివాదాస్పద ప్రాంతాల్లో త‌మ ఆధిపత్యాన్ని చూపించుకునేందుకు చైనా ఇలాంటి చర్యలకు దిగుతోంది.