ఆత్మీయుడు, మిత్రుడు చంద్రబాబుకు స్పెషల్ రిక్వెస్ట్.. మోహన్ బాబు ట్వీట్

దేశవ్యాప్తంగా తిరుమల లడ్డూ వివాదం తీవ్రచర్చనీయాంశమైంది. పవిత్రమైన తిరుపతి లడ్డూ తయారీలో జంతువుల కొవ్వు వాడారనే వార్తలను శ్రీవారి భక్తులు జీర్ణించుకోలేకపోతున్నారు. దీనికి సంబంధించిన నిజానిజాలను నిగ్గు తేల్చి.. కారకులను కఠినంగా శిక్షించాలని డిమాండ్ చేస్తున్నారు. ఈ క్రమంలోనే తిరుపతి లడ్డూ వ్యవహారంపై సినీనటుడు మంచు మోహన్ బాబు స్పందించారు. లడ్డూ వివాదం గురించి సంచలన ట్వీట్ చేశారు మోహన్ బాబు. ప్రపంచవ్యాప్తంగా హిందువులు పూజించే కలియుగ దైవం శ్రీ వెంకటేశ్వరస్వామి అని మోహన్ బాబు పేర్కొన్నారు. ఆ దైవానికి నిత్యం సమర్పించేల లడ్డూల తయారీకి ఉపయోగించే ఆవు నెయ్యిలో మూడు నెలల కిందటి వరకూ ఇతర జంతువుల కొవ్వు కలుపుతున్నారని తెలియగానే తల్లడిల్లిపోయానంటూ మోహన్ బాబు ట్వీట్ చేశారు. భక్తుడిగా తీవ్ర దిగ్భ్రాంతికి గురయ్యానని చెప్పుకొచ్చారు.

మరోవైపు తమ యూనివర్సిటీ నుంచి కనిపించే తిరుమల క్షేత్రాన్ని చూసి తమ విశ్వవిద్యాలయంలోని ఉపాధ్యాయులు, విద్యార్థినీ విద్యార్థులు నిత్యం నమస్కరించుకుంటూ ఉంటామన్న మోహన్ బాబు.. ఆ శ్రీవారి దగ్గర ఇలా జరగడం ఘోరం, పాపం, ఘోరాతి ఘోరం, నికృష్టం, అతినీచం, హేయం, అరాచకం అంటూ ఆవేదన వ్యక్తం చేశారు. ఈ వార్తలే కనుక నిజమైతే అందుకు కారణమైన నేరస్థులను శిక్షించాలని ఆత్మీయుడు, మిత్రుడు అయిన ఏపీ సీఎం చంద్రబాబు నాయుడును కోరుకుంటున్నట్లు ట్వీట్ చేశారు. వెంకటేశ్వర స్వామి ఆశీస్సులతో తన మిత్రుడు చంద్రబాబు నూరేళ్లూ చల్లగా ఉండాలని కోరుకుంటున్నట్లు మోహన్ బాబు ట్వీట్ చేశారు.

ఇక లడ్డూల వివాదంపై ఇప్పటికే అధికార టీడీపీ, విపక్ష వైసీపీ మధ్య మాటల యుద్ధం నడుస్తోంది. వైసీపీ ప్రభుత్వం హయాంలో ఈ తప్పు జరిగిందని టీడీపీ ఆరోపిస్తుండగా.. వైసీపీ ఖండిస్తోంది. నెయ్యి నాణ్యత నిర్ధారణ విధానాలను అనుసరించే నెయ్యిని కొనుగోలు చేశారని చెప్తోంది. డైవర్షన్ పాలిటిక్స్‌లో భాగంగానే చంద్రబాబు ఈ కట్టుకథను చెప్తున్నారని ఏపీ మాజీ సీఎం, వైసీపీ అధినేత వైఎస్ జగన్ మోహన్ రెడ్డి ఆరోపిస్తున్నారు. అయితే తమిళనాడుకు చెందిన ఏఆర్ డెయిరీ నుంచి వచ్చిన నాలుగు నెయ్యి ట్యాంకర్ల నుంచి సేకరించిన శాంపిళ్లలో జంతువుల కొవ్వు ఉన్నట్లు తేలిందని టీటీడీ ఈవో శ్యామలరావు ఇప్పటికే వెల్లడించారు. దీనిపై టీటీడీ సమగ్ర నివేదిక తయారుచేస్తోంది.