ఆ రేటు కంటే తక్కువైతే.. ఆ నెయ్యిలో ఏదో ఉందనే అర్థం.. సీబీఐ మాజీ జేడీ లక్ష్మినారాయణ

తిరుపతి లడ్డూ వివాదం చల్లారడం లేదు. ఈ వ్యవహారం కారణంగా ఏపీలో రాజకీయ కాక రేగుతోంది. వైసీపీ ప్రభుత్వం హయాంలో ఈ తప్పు జరిగిందని టీడీపీ ఆరోపిస్తుండగా.. ఆరోపణలు కాదని, అవసరమైతే సీబీఐ దర్యాప్తు జరిపించాలని వైసీపీ డిమాండ్ చేస్తోంది. తమ హయాంలో నెయ్యిని నిర్ధారణ పరీక్షల తర్వాతే కొనుగోలు చేసినట్లు చెప్తోంది. ఈ నేపథ్యంలో తిరుమల లడ్డూ తయారీలో కల్తీ నెయ్యి వాడారనే వార్తలపై సీబీఐ మాజీ జేడీ, జై భారత్ నేషనల్ పార్టీ అధ్యక్షుడు లక్ష్మినారాయణ స్పందించారు. ఈ మేరకు ఎక్స్ వేదికగా లక్ష్మి నారాయణ ట్వీట్ చేశారు. తిరుమల లడ్డూ తయారీలో కల్తీ నెయ్యి వాడకం ఆరోపణల నేపథ్యంలో ప్రభుత్వానికి పలు సూచనలు చేశారు సీబీఐ మాజీ జేడీ లక్ష్మినారాయణ. ఇలా చేస్తే కల్తీ నెయ్యి వాడే అవకాశం ఉండదని సూచించారు.

"ఒక కిలో స్వచ్ఛమైన ఆవు నెయ్యి తయారీకి 25 నుంచి 30 లీటర్ల ఆవు పాలు అవసరం. నెయ్యి చేయడానికి పాలను తోడుపెట్టి పెరుగుగా మార్చి, దానిని చిలికి వెన్నగా, ఆ తరువాత నెయ్యిగా మార్చాలి. ఈ ప్రక్రియ ద్వారా నెయ్యి తయారు చేయడానికి రూ. కిలో 1500 నుంచి 2100/- (పాల ధర - రూ. 1250 -1800, కూలీ ధర రూ. 100-200, ప్యాకేజింగ్ రూ. 50-100) ఖర్చవుతుంది. దేశీ ఆవు పాలైతే ఖర్చు ఇంకా చాలా ఎక్కువ. ఈ రేటు కంటే తక్కువగా స్వచ్ఛమైన ఆవు నెయ్యి అని విక్రయించే ఏ నెయ్యిలోనైనా సాధారణంగా స్కిమ్డ్ మిల్క్/క్రీమ్ లేదా మిక్స్డ్ మిల్క్ సోర్స్‌లు లేదా కూరగాయలు లేదా జంతువుల కొవ్వులు లేదా రసాయనాలను కలుపుతారు. దీనివల్ల నెయ్యి కలుషితమవుతుంది " అంటూ లక్ష్మినారాయణ ట్వీట్ చేశారు

" ఇలాంటి నెయ్యిని పవిత్రమైన ప్రసాదం తయారీలో ఉపయోగించినట్లయితే చాలా అభ్యంతరకరం. టీటీడీలో ఇటీవల జరిగినట్లు చెబుతున్న నెయ్యి ఉదంతం, సీబీఐ లేదా జ్యుడీషియల్ కమిషన్ ద్వారా విచారణ జరిపించి అవినీతి, క్విడ్ ప్రోకో ఉంటే వాటిని వెలికి తీయాల్సిన అవసరం ఉంది. వీటిని నివారించడానికి దేవాలయాల్లో గోశాలల ఏర్పాటు వంటి దీర్ఘకాలిక చర్యలతో ప్రభుత్వాలు ముందుకు రావాలి. గోశాలలు స్వచ్ఛమైన నెయ్యి సరఫరా, గో సంతతి రక్షణ, పరిశుభ్రమైన గో ఉత్పత్తుల సరఫరా, సేవ, ఉపాధి అవకాశాల కల్పన, ఆలయ భూములను సమర్థవంతంగా వినియోగించేలా చేస్తాయి." అంటూ లక్ష్మినారాయణ ట్వీట్ చేశారు.