ఏపీకి తిరిగి రానున్న లులూ గ్రూప్.. చంద్రబాబుతో భేటీ.. ఆ ప్రాంతాల్లో పెట్టుబడులు

ఏపీవాసులకు గుడ్ న్యూస్.. ప్రముఖ సంస్థ లులూ గ్రూప్ ఇంటర్నేషనల్ ఏపీలో పెట్టుబడులు పెట్టే అవకాశాలు కనిపిస్తున్నాయి. శనివారం సీఎం చంద్రబాబు నాయుడితో లులూ గ్రూప్ ప్రతినిధులు భేటీ అయ్యారు. లులూ గ్రూప్ ఇంటర్నేషనల్ ఛైర్మన్ అండ్ మేనేజింగ్ డైరెక్టర్ యూసఫ్ అలీ, ఎగ్జిక్యూటివ్ డైరెక్టర్ అష్రఫ్ అలీ.. సీఎం చంద్రబాబుతో భేటీ అయ్యారు. ఆంధ్రప్రదేశ్‌లో పెట్టుబడులు పెట్టేందుకు ఉన్న అవకాశాల గురించి చర్చించారు. ఈ విషయాన్ని సీఎం చంద్రబాబు నాయుడు స్వయంగా ఎక్స్ వేదికగా వెల్లడించారు. లులూ గ్రూప్ ప్రతినిధులకు ఏపీ తిరిగి స్వాగతం పలుకుతోందంటూ చంద్రబాబు ట్వీట్ చేశారు.

మరోవైపు అమరావతిలో లులూ గ్రూప్ ఛైర్మన్ యూసుఫ్ అలీతో జరిగిన భేటీలో ఏపీలో పెట్టుబడులపై చర్చించినట్లు చంద్రబాబు తెలిపారు. విశాఖపట్నంలో లులూ గ్రూప్ షాపింగ్ మాల్, మల్టీప్లెక్స్ నిర్మాణంపై చర్చించినట్లు తెలిపారు. అలాగే విజయవాడలో లులూ హైపర్ మార్కెట్, తిరుపతిలో లులూ మల్టీప్లెక్స్ నిర్మాణం గురించి చర్చించామని.. ఈ చర్చలు సానుకూలంగా జరిగాయని సీఎం చంద్రబాబు తెలిపారు. వీటితో పాటుగా ఫుడ్ ప్రాసెసింగ్ సెక్టార్‌లో రాష్ట్రవ్యాప్తంగా పెట్టుబడులు పెట్టేందుకు ఉన్న అవకాశాలను వారికి వివరించినట్లు తెలిపారు. ప్రభుత్వం నుంచి అన్నిరకాలుగా ప్రోత్సాహం, మద్దతు అందిస్తామని హామీ ఇచ్చినట్లు వివరించారు. ఆంధ్రప్రదేశ్ అభివృద్ధిలో వారు కలిసివస్తారని భావిస్తున్నానని చంద్రబాబు ట్వీట్ చేశారు.

మరోవైపు గత టీడీపీ ప్రభుత్వం హయాంలో విశాఖపట్నంలో మాల్, కన్వెన్షన్ సెంటర్ నిర్మించేందుకు లులూ గ్రూప్.. ఏపీ ప్రభుత్వంతో అవగాహన ఒప్పందం కుదుర్చుకుంది. సుమారుగా రూ.2,200 కోట్ల పెట్టుబడులతో ఏడు వేల మందికి ఉపాధి కల్పించేలా ఈ ఒప్పందం జరిగింది. సీఎం చంద్రబాబు సైతం దీనికి శంకుస్థాపన చేశారు. అయితే 2019 ఎన్నికల్లో టీడీపీ ఓడిపోయింది. వైసీపీ అధికారంలోకి వచ్చింది. అయితే అప్పటి వైసీపీ ప్రభుత్వం.. లులూ గ్రూప్‌కు విశాఖలో ఇచ్చిన భూమికి అద్దె తక్కువగా ఉందని ఒప్పందం రద్దు చేసుకుంది. భూమిని సైతం వెనక్కి తీసుకుంది. దీంతో ఏపీలో ఇప్పట్లో పెట్టుబడులు పెట్టమంటూ లులూ గ్రూప్ వెనక్కి వెళ్లిపోయింది. అయితే తాజాగా ఏపీలో టీడీపీ కూటమి ప్రభుత్వం అధికారంలోకి రావటంతో.. లులూ గ్రూప్ మరోసారి పెట్టుబడులు పెట్టేందుకు ముందుకు వచ్చినట్లు తెలిసింది. ఈ క్రమంలోనే సీఎం చంద్రబాబుతో లులూ గ్రూప్ ఛైర్మన్ భేటీ అయినట్లు సమాచారం.