ఇస్రోలో పెద్ద జాబ్.. వందెకరాల ఆసామి.. వీడు మామూలోడు కాదు

బీటెక్‌లు, పీజీలు పూర్తి చేసినా.. చదువుకు తగ్గ ఉద్యోగం రాక.. 30 ఏళ్లు దాటినా పెళ్లిళ్లు కాక ఇబ్బందిపడుతోన్న యువకులు మన దగ్గర ఎంతో మంది ఉన్నారు. జీవితంలో కాలేజీ ముఖం చూడకపోయినా.. పదో తరగతి కూడా పాసవ్వకపోయినా.. ఐఏఎస్ ఆఫీసర్ రేంజ్‌లో బిల్డప్ ఇస్తూ.. పెళ్లి పేరిట అమ్మాయిలను మోసం చేస్తున్న వారికి మన దగ్గర కొదవేం లేదు. కష్టపడి పని చేస్తే ఏం లాభం.. అదే మోసం చేస్తే ఫుల్‌గా ఎంజాయ్ చేయొచ్చని భావించే కేటుగాళ్లు చివరకు పోలీసుల చేతికి చిక్కుతున్నారు. ఈ కోవకే వస్తాడు తిరుపతి జిల్లాకు చెందిన అనిల్ బాబు అలియాస్ కళ్యాణ్ రెడ్డి అనే వ్యక్తి.

తిరుపతి జిల్లాలోని వెంకటగిరి ప్రాంతానికి చెందిన అనిల్ బాబు ఖమ్మం జిల్లా మధిరలోని టీచర్స్ కాలనీలో ఉంటున్నాడు. ఇతగాడు చదివింది 9వ తరగతి వరకే. కానీ చేసిన మోసాలు మాత్రం ఓ రేంజ్‌లో ఉన్నాయి. మ్యాట్రిమోనీ వెబ్‌సైట్లో కళ్యాణ్ రెడ్డి పేరిట తన వివరాలు నమోదు చేసి.. సంబంధాల కోసం తన రేంజ్‌నే మార్చేశాడు. ఎవరైనా పెళ్లి సంబంధాల కోసం సంప్రదిస్తే.. అబ్బాయి తండ్రి నంటూ మాట్లాడతాడు. ‘నేను, నా భార్య ఇంజినీర్లమండీ.. మా అబ్బాయి ఇస్రోలో ఉద్యోగం పని చేస్తున్నాడు. మాకు హైదరాబాద్, బెంగళూరు నగరాల్లో బంగ్లాలు, విల్లాలు ఉన్నాయి. వందెకరాల పొలం కూడా ఉంది’ అంటూ గొప్పగా పరిచయం చేసుకుంటాడు. తాము బిజీగా ఉండటం వల్ల పెళ్లి చూపులకు రాలేకపోతున్నామని.. తమ అబ్బాయి మాత్రం వస్తాడని చెప్పి నమ్మించేవాడు.

బాబు బాగా రిచ్ అని నమ్మించేందుకు చేవెళ్లలో ఓ ఫామ్ హౌస్, బెంగళూరులో ఓ విల్లాను అద్దెకు తీసుకున్నాడు. పెళ్లి సంబంధం కోసం ఇంటికొచ్చిన వారికి.. ఇవి తమ సొంతమని చెప్పి నమ్మించేవాడు. ఇలా మాయ మాటలు చెప్పి.. ఇప్పటికే నలుగురు అమ్మాయిలను కళ్యాణ్ రెడ్డి పెళ్లి చేసుకున్నాడు. ఎప్పుడూ పక్కనే ఓ వ్యక్తితోపాటు పంతుల్ని కూడా ఉంచుకునేవాడంటే మనోడి ప్లానింగ్, టైమింగ్ ఎలా ఉందో అర్థం చేసుకోవచ్చు.

ఇప్పటికే నలుగురు అమ్మాయిలను, వాళ్ల కుటుంబీకులను ఈజీగా బురిడీ కొట్టించిన అనిల్ బాబు.. ఐదో పెళ్లి చేసుకునే క్రమంలో దొరికిపోయాడు. గత ఏడాది ఏలూరు జిల్లా భీమడోలు ప్రాంతానికి చెందిన లక్ష్మీకుమారి అనే మహిళను కలిసిన ఈ కేటుగాడు.. ఆమె రెండో కుమార్తెను పెళ్లి చేసుకుంటానని.. మూడో కుమార్తెకు తాను పని చేస్తున్న ఇస్రోలో ఉద్యోగం ఇప్పిస్తానని హామీ ఇచ్చాడు. కాకపోతే కొంచెం ఖర్చవుతుందని చెప్పాడు.

అబ్బా.. మా అల్లుడు ఎంత మంచోడు.. డబ్బులు పోయినా సరే నా ఇద్దరు బిడ్డల లైఫ్ సెటిల్ అవుతుందని లక్ష్మీ కుమారి ఆశపడింది. దీంతో ‘అల్లుడు గారు’ అడిగినప్పుడల్లా కాదనకుండా.. రూ.9.5 లక్షలకుపైగా ఇచ్చేసింది. మనోడి దగ్గర పని చేసే వ్యక్తితో కాబోయే మరదలికి ఇంటర్వ్యూ జరిపినట్లుగా చేయించి.. ఓ అపాయింట్మెంట్ ఆర్డర్‌ను చేతిలో పెట్టాడు. ఇంకేం ఇస్రోలో జాబొచ్చిందని ఆ అమ్మాయి కుటుంబం సంబరపడింది. కానీ ఆ అపాయింట్‌మెంట్ ఆర్డర్ కాపీ నకిలీదని తేలడంతో ‘పోయాం మోసం’ అని అర్థమైంది.

దీంతో లబోదిబోమంటూ భీమడోలు పోలీసు స్టేషన్లో ఫిర్యాదు చేశారు. బాధితులు చెప్పిందంతా విన్న పోలీసులకు మనోడు మామూలోడు కాదని అర్థమైంది. జాగ్రత్త ప్లాన్ చేసిన పోలీసులు బాధితురాలి ఊరి సమీపంలోనే కళ్యాణ్ రెడ్డితోపాటు.. అతడికి సహకరిస్తోన్న మరో ఇద్దర్ని అరెస్ట్ చేశారు. ఈ కేటుగాడు పెళ్లిళ్లు, వారి కుటుంబంలోని వారికి ఉద్యోగాల పేరిట ఇప్పటి దాకా పలువుర్ని మోసం చేసి కోటిన్నర రూపాయల దాకా నొక్కేశాడని ఏలూరు ఎస్పీ ప్రతాప్ శివకిశోర్ చెప్పారు. ఈ గ్యాంగ్ దగ్గర్నుంచి ఓ కారు, రూ.2 లక్షలు క్యాష్, ల్యాప్‌టాప్‌లు, ఫేక్ ఆఫర్ లెటర్లు, సెల్‌ ఫోన్లు, మోసం చేయడానికి వాడిన సిమ్ కార్డులను పోలీసులు స్వాధీనం చేసుకున్నారు.