ఏపీలో కొత్తగా రైల్వే స్టేషన్.. తొలిసారి రైలొచ్చింది, ఎన్నో ఏళ్ల కల నెరవేరిన వేళ

ఏపీలో మరో కొత్త రైల్వే స్టేషన్ ఏర్పాటు చేశారు. ప్రకాశం జిల్లా పొదిలితో పాటుగా ఆ చుట్టు పక్కల గ్రామాల ప్రజలు ఎంతోకాలంగా ఎదురు చూస్తున్న.. ఎన్నో ఏళ్ల కల మొత్తానికి నెరవేరింది. కొత్త రైల్వే స్టేషన్‌లో రైలుతో ట్రయల్ రన్ నిర్వహించారు. నడికుడి - శ్రీకాళహస్తి రైల్వేలైన్‌ నిర్మాణ పనులు వేగంగా జరుగుతున్నాయి. ప్రస్తుతం పొదిలి మండలంలో కొంతమేర పనులు పూర్తయ్యాయి. దీంతో రెండు ఇంజిన్లు, కొన్ని బోగీలతో రైలును బుచ్చన్నపాలెం, కాటూరివారిపాలెం, రాజుపాలెం మీదుగా అధికారులు ప్రయోగాత్మకంగా నడిపారు. పొదిలి ప్రాంతానికి మొదటిసారిగా రైలు రావడంతో స్థానికులు సంతోషంగా ఉన్నారు. కొంతమంది మొబైల్‌లో ఫొటోలు దిగి ఆనందంగా గడిపారు.

నడికుడి-శ్రీకాళహస్తి మధ్య కొత్త రైల్వే మార్గం పనులు జరుగుతున్నాయి. నడికుడి నుంచి ప్రకాశం జిల్లాలోని దర్శి, పొదిలి, కనిగిరి మీదుగా శ్రీకాళహస్తి వరకు సాగుతున్న కొత్త రైల్వే నిర్మాణ పనులు చేపట్టగా.. ప్రస్తుతం ప్రకాశం జిల్లా పొదిలి వరకు పూర్తయ్యాయి. పొదిలిలో కూడా ట్రాక్ ఏర్పాటు పూర్తికాగా.. రైల్వే స్టేషన్‌ కూడా ఉంది. ఇప్పుడు ట్రయల్ రన్‌లో భాగంగా రైలును నడిపారు. తమ ప్రాంతానికి తొలిసారి రైలు రావడంతో చుట్టుపక్కల ప్రజలు ఆసక్తిగా చూశారు. పొదిలి ప్రాంతానికి రైలు వస్తుందని తాము కలలో కూడా అనుకోలేదంటున్నారు.

నడికుడి-శ్రీకాళహస్తి రైల్వే మార్గంలో మొదటి దశలో దర్శి వరకు ట్రాక్ పనులు.. రైలుతో ట్రయల్ రన్ ఇప్పటికే పూర్తయ్యింది. ఇప్పుడు రెండో దశలో పొదిలి వరకు ట్రాక్‌ పనులు పూర్తయ్యాయి.. ట్రయల్ రన్ నిర్వహించారు. ఇక కీలకమైన మూడో దశలో పొదిలి నుంచి కనిగిరి వరకు ట్రాక్ పనులు వేగవంతం అయ్యాయి. ఈ ట్రాక్ పొదిలి మండలంలోని రాజుపాలెం, బుచ్చనపాలెం, దాసర్లపల్లి, కాటూరివారిపాలెం మీదుగా నడుస్తుంది. పొదిలి సమీపంలోని రాజుపాలెం దగ్గర కొత్త రైల్వే స్టేషన్‌ ఏర్పాటు చేస్తున్నారు. ఈ రైల్వే స్టేషన్‌కు సంబంధించి ఫ్లాట్‌ఫాంలు, భవనాల నిర్మాణం పూర్తికాలేదు.

ఈ నడికుడి-శ్రీకాళహస్తి రైలు మార్గం పనులు ఎప్పుడో ప్రారంభమయ్యాయి కానీ బాగా ఆలస్యం కూడా అయ్యాయి. ఈ రైల్వే లైన్‌కు సంబంధించి.. ఉమ్మడి గుంటూరు జిల్లా శావల్యాపురం నుంచి ప్రకాశం జిల్లాలోని గుండ్లకమ్మ, కురిచేడు మీదుగా దర్శి వరకు ట్రాక్ పనులు పూర్తయ్యాయి. ప్రస్తుతం నడికుడి నుంచి దర్శి వరకు నడుపుతున్న రైళ్లు పొదిలి వరకు వెళతాయి. పొదిలికి తొలిసారి రైలు రావడంతో ఆ ప్రాంతవాసుల ఆనందంగా ఉన్నారు. మొత్తానికి ప్రకాశం జిల్లాలో రైల్వే లైన్ లేని ప్రాంతంగా ఉన్న కనిగిరి, పొదిలి, దర్శివైపు కూడా కొత్త రైలు మార్గం అందుబాటులోకి వస్తోంది.