ఏపీలో ప్రతి ఏటా అక్టోబర్ 17న రాష్ట్ర పండుగ.. ఉత్తర్వులు జారీ

ఆంధ్రప్రదేశ్ ప్రభుత్వం కీలక నిర్ణయం తీసుకుంది. వాల్మీకి జయంతిని రాష్ట్ర పండుగగా ప్రకటిస్తూ ఉత్తర్వులు జారీ చేసింది. ఈనెల 17 నుంచి అన్ని జిల్లాల్లో అధికారికంగా వాల్మీకి జయంతిని నిర్వహించాలని ఆదేశించారు. రాష్ట్ర స్థాయి వాల్మీకి జయంతి వేడుకను అనంతపురంలో జరపనున్నారు. వాల్మీకి జయంతిని ప్రభుత్వం అధికారికంగా నిర్వహించాలని.. రాష్ట్ర పండుగగా ప్రకటించాలనే డిమాండ్ ఎప్పటి నుంచో వినిపిస్తోంది. తాజాగా ప్రభుత్వం ఉత్తర్వులు జారీ చేసింది.

ఈ నెల 17వ తేదీన వాల్మీకి జయంతిని రాష్ట్ర పండుగగా నిర్వహించాలని రాష్ట్ర బీసీ, ఈడబ్ల్యూఎస్‌ సంక్షేమ, చేనేత, జౌళి శాఖల మంత్రి ఎస్‌ సవిత ఆదేశించారు. రాష్ట్రంలోని అన్ని జిల్లా కేంద్రాల్లోనూ కలెక్టర్ల నేతృత్వంలో నిర్వహించాలన్నారు. రాష్ట్ర స్థాయిలో అనంతపురంలో వాల్మీకి జయంతిని ఘనంగా నిర్వహించాలని.. దీనికి సంబంధించిన ఏర్పాట్లను చేపట్టాలన్నారు. మంత్రి బీసీ సంక్షేమ శాఖ కార్యదర్శి పోలా భాస్కర్‌, ఆ శాఖాధికారులతో మంత్రి సమీక్షా సమావేశం నిర్వహించారు.

వాల్మీకి జయంతిని రాష్ట్ర పండుగగా, అధికారికంగా నిర్వహించాలని సీఎం చంద్రబాబనాయుడు ఆదేశించారన్నారు మంత్రి సవిత. సీఎం ఆదేశాల మేరకు అన్ని జిల్లా కేంద్రాల్లోనూ కలెక్టర్ల నేతృత్వంలో వాల్మీకి జయంతి నిర్వహించేలా చర్యలు తీసుకోవాలన్నారు. ఇందుకు కలెక్టర్లకు ఆదేశాలు జారీచేయాలని బీసీ సంక్షేమ శాఖ కార్యదర్శి పోలా భాస్కర్‌ను మంత్రి ఆదేశించారు. రాష్ట్ర స్థాయిలో వాల్మీకి జయంతిని అనంతపురంలో అదే రోజు నిర్వహించనున్నట్లు వెల్లడిరచారు. ఇందుకు భారీ ఏర్పాట్లు చేయాలన్నారు. ఆనందోత్సహాలతో వాల్మీకి జయంతి నిర్వహించాలని సీఎం చంద్రబాబు ఆదేశించారన్నారు. వాల్మీకి జయంతిని అధికారికంగా నిర్వహించేలా కలెక్టర్లకు ఆదేశాలు జారీచేయనున్నట్లు బీసీ సంక్షేమ శాఖ కార్యదర్శి పోలా భాస్కర్‌ తెలిపారు. ప్రభుత్వం వాల్మీకి జయంతిని రాష్ట్ర పండుగగా ప్రకటించడం.. అధికారికంగా నిర్వహించడంపై వాల్మీకి సంఘాల నేతలు హర్షం వ్యక్తం చేస్తున్నారు.

మరోవైపు రెండు రోజుల క్రితం కూడా వాల్మీకి మహాసేన నేతలు ఈ అంశాన్ని ప్రస్తావించారు. ఈ నెల 17న వాల్మీకి జయంతిని రాష్ట్రవ్యాప్తంగా పండుగలా జరపాలన్న ప్రభుత్వ నిర్ణయాన్ని స్వాగతించారు. అయితే అక్టోబర్ 17న సెలవు దినంగా కూడా ప్రకటించాలని డిమాండ్ చేస్తున్నారు.